Bérlinda “Tajdar guwahchi” namliq kitab toghrisida metbu'at yighini ötküzüldi

Gérmaniye paytexti bérlinda ötküzülgen “Tajdar guwahchi” namliq kitab toghrisida metbu'at yighinida sayragül sawutbay xanin d u q re'isi dolqun eysa ependi bilen. 2020-Yili 23-iyun.

Sayragül sawutbay toghriliq yézilghan “Tajdar shahit” namliq kitabning muqawisi.

Sayragül sawutbay toghriliq yézilghan “Tajdar shahit” namliq kitab neshrdin chiqti

22-Iyun küni gérmaniyening “Gherbiy jenub radiyo-téléwiziye qanili” xitaydiki jaza lagérlirining tirik shahiti bolghan sayragül sawutbay toghrisida yézilghan “Tajdar guwahchi” namliq kitabning gérman tili'ida neshrdin chiqqanliqini, 23-iyun bérlinda bu kitabni tonushturush yüzisidin metbu'at yighini ötküzülidighanliqini, mezkur kitabta “Sherqiy türkistandiki milyonlighan Uyghur we qazaq qatarliq milletlerning xitayning jaza lagérlirigha qamilip éghir azablargha muptila boluwatqanliqi tepsiliy bayan qilin'ghanliqi” ni élan qilghanidi.

23-Iyun chüshtin burun gérmaniye paytexti bérlinda “Tajdar guwahchi” namliq kitab toghrisida metbu'at yighini ötküzülgen. Yighin'gha bu kitabning aptori aliksandira kawiliyus, kitabni neshr qilghan “Yawropa neshriyati” ning wekilliri, lagér shahiti sayragül sawutbay, köpligen meshhur axbarat wasitilirining muxbirliri, d u q ning re'isi dolqun eysa qatarliq kishiler qatnashqan.

Metbu'at yighinida aldi bilen “Yawropa neshriyati” ning mes'uli stros ependi söz qilip, bu kitabta xitayning jaza lagérliri siyasitining qurbanigha ayliniwatqan milyonlighan Uyghurlar we qazaqlarning hayat hékayisining tirik lagér shahiti sayragül sawutbayning guwahliqi arqiliq bayan qilin'ghanliqini hemde kitabtiki omumiy mezmunni qisqiche chüshendürüp ötken.

Kitabning aptori aliksandira kawiliyus xanim arqidin söz élip, sayragül sawutbay bilen ötküzgen söhbetliri, özining bu kitabni yézishtiki meqsitining 21-esirde “Sherqiy türkistanda yüz bériwatqan jaza lagérliri siyasitidin ibaret bu qabahetni pütün dunyagha yenimu bekrek yorutup bérishtin ibaret ikenliki” ni bayan qilghan.

Sayragül sawutbay sözge teklip qilin'ghanda, u özining jaza lagérlirida béshidin ötken kechmishlirini, körgen-bilgenlirini, qazaqistan'gha qéchip chiqqandin kéyinki hékayisini we shiwétsiyege kélip yerleshkendin buyanqi turmushini bayan qilip, axirida muxbirlarning so'allirigha jawab bergen.

Teklipke bina'en bu pa'aliyet sorunigha daxil bolghan d u q re'isi dolqun eysa ependi bérlindin ziyaritimizni qobul qilghanda, bu metbu'at yighinigha köpligen muhim axbarat organliridin muxbirlarning kélip qatnashqanliqini tilgha aldi.

Sayragül sawutbay neq meydandin ziyaritimizni qobul qilip, bu metbu'at yighini munasiwiti bilen özining “Sherqiy türkistanda dawam qiliwatqan éghir zulumlarni yene bir qétim dunyagha anglitiwélish pursitige érishkenliki” ni eskertti. Uning bildürüshiche, “Tajdar guwahchi” namliq bu kitabta uning “Sherqiy türkistan, qazaqistan we shiwétsiyedin ibaret 3 dölettiki hayat kechmishliri” etrapliq bayan qilinidiken.

Gérmaniyening myunxén shehiridin bérip sayragül sawutbayning terjimanliqini qilghan méhriban xanimmu bu qétimqi metbu'at yighinining nahayiti netijilik ötküzülgenlikini tekitlidi.