Серикҗан билашоғли өзигә берилгән мирзақамақ җазасиниң давамини алмутадики өйидә давам қилидикән

Мухбиримиз гүлчеһрә
2019-07-30
Share
serikjan-bilash-sottin-oyige-1.jpg “ата юрт пидаийлири” тәшкилатиниң қурғучиси, қазақ паалийәтчи серикҗан билашоғли нурсултан шәһәрлик сот мәһкимисидин чиқиватқан көрүнүши. 2019-Йили 29-июл, қазақистан.
RFA/Gülchéhre

Нурсултан шәһәрлик сот мәһкимиси серикҗан билашоғлиға берилгән мирзақамақ җазасини бәш айдин буян 3 қетим узартқан иди.

8-Июл ечилған сотта серикҗан билашоғли өзигә берилгән мирзақамақниң тәкрар узартилишиға вә уни 20 йилдин буян яшап келиватқан алмутадики өйидә әмәс, бәлки пайтәхт нурсултан шәһиридә нәзәрбәнд қилишниң қазақистан асасий қануниға хилап икәнликини оттуриға қоюп, сотниң қарариға дадиллиқ билән наразилиқ билдүргән иди.

Серикҗанниң адвокати айман өмәрова 24‏-июл алмутада ахбарат елан қилиш йиғини өткүзүп, билашоғлиниң 29‏-июл күни сотлинидиғанлиқини, тәптиш даирилириниң униңға әвәткән әйибнамисидә билашоғлини башқиларни “җиһад” қа чақириш, “миллий өчмәнликкә қутратқулуқ қилиш” билән әйиблигәнликини билдүргән иди. Айман өмәрова йәнә әгәр сотта серикҗанға артилған бу җинайәтләр бекитилгән тәқдирдә униң 2 йилдин 7 йилиғичә қамақ җазасиға һөкүм қилиниш еһтималлиқи барлиқини оттуриға қойған иди.

Буниң билән йеқинқи күнләрдә мәтбуатларда қазақ паалийәтчи серикҗан билашоғли 7 йиллиқ қамаққа һөкүм қилиниш хәвпигә дуч кәлгәнлики һәққидә түрлүк әндишиләр мәйданға кәлди.

Серикҗанниң аяли ләйла адилҗан вә қазақистандики “ата юрт пидаийлири” намлиқ кишилик һоқуқ тәшкилатиниң әзалири 29-июл радийомизға арқа-арқидин авазлиқ учур йоллап, серикҗанниң мирзақамақ җазасиниң нурсултан шәһиридин алмутаға йөткилидиғанлиқини, йәни серикҗанниң мирзақамақни әмди алмутадики өз өйидә өткүзүши һәққидә қарар берилгәнликини хәвәр қилди.

Серкҗанниң вәкили ғәйрәт тәминлигән учурларға қариғанда, бу қетим билашоғлиниң адвокати айман серикҗанниң сотиға қатнашқан икән. Алдинқи қетим, йәни 8-июлдики сотқа у сот башлинишқа пәқәт бир нәччә саәт қалғанда андин уштумтут уқтуруш алғанлиқи түпәйли алмутадин нурсултан шәһиригә беришқа үлгүрәлмигән вә сотқа қатнишалмиған иди.

29-Июлдики сотқа “ата юрт пидаийлири”, “ата юрт” арқилиқ лагерға қамалған туғқанлири һәққидә гуваһлиқ бәргән кишиләр вә серикҗанниң қоллиғучилири болуп, 200 дин көпрәк адәм қатнашқан. Улар сот мәйданида вә сот ахирлашқандиму қоллирида серикҗанға әркинлик, адаләт дегәндәк лозункиларни көтүрүп намайиш қилған.

Нурсултан шәһәрлик сотниң қарари бойичә, серикҗанға берилгән мирзақамақ җазаси йәнә бир ай, йәни 8-айниң оттурилириғичә узартилған. Әмма бу қетим униңға берилгән мирзақамақ җазасиниң давами алмутада иҗра қилинидиғанлиқи қарар қилинған болсиму, әмма йәнә бир қетимлиқ сотниң қәйәрдә ечилидиғанлиқи техи бекитилмигән.

“ата юрт пидаийлири” тәшкилатиниң қурғучиси серикҗан соттин кейин мухбирларға инглиз тилида баянат берип, өзиниң уйғур диярида қанунсиз тутқун қилинған қазақ вә башқа милләтләрниң кишилик һәқ һоқуқлири үчүн, уларға адаләт тәләп қилғанлиқи үчүн тутқун қилинғанлиқини билдүргән. У хитайниң бүгүнки күндә қазақистанни өз ичигә алған оттур асия әллиригә пәқәт иқтисадий җәһәттин сиңип кирипла қалмай, бәлки қазақистанға идеологийә җәһәттинму сиңип кириватқанлиқини илгири сүргән.

У йәнә қазақистан һөкүмитини билип-билмәй хитайниң қазақистандики тәһдитлирини күчәйтиши үчүн хизмәт қиливатиду дәп тәнқид қилған шундақла хитайниң тәсири оттура асияда күндин-күнгә еғирлишиватиду, буниң ақивити хәтәрлик, дәп агаһландурған.

Қазақистан тәптиш даирилири бу йил 3‏-айда алмутада қолға елинған билашоғлиға “миллий өчмәнликкә қутратқулуқ қилиш”, “қанунсиз тәшкилат қуруш җинайити” артқан болса, кейин униңға артқан “җинайәтләр” ни бикар қилип, уни “җиһадқа қутратқулуқ қилиш” билән әйибләшкә урунған иди.

Бу һәқтә зияритимизни қобул қилған билашоғлиниң аяли ләйланиң билдүрүшичә, тәптиш даирилири униң бир қетимлиқ җамаәт сорунида сөзлигән нутқидики “җиһад” тоғрулуқ қилған сөзлирини кесип тәһрирләп, уни әйибләш үчүн қолланмақчи болған. Әмма әслидики толуқ видейолуқ испат алдида серикҗанға артқан аталмиш “җиһадни тәрғиб қилиш” дегәндәк әйибләшлирини “миллий өчмәнликкә қутратқулуқ қилиш” дәп өзгәртишкә мәҗбур болған икән.

29-Июлдики сот мәйданида өзини ақлиған серикҗан билашоғли тәптиш даирилириниң уни “миллий өчмәнликкә қутратқулуқ қилди” дәп әйиблишиниңму асаси йоқлуқини билдүргән. У “мән вә ата юрт пидаийлириға бундақ бир җинайәт арталмайду, чүнки биз һечқачан миллий өчмәнликкә қутратқулуқ қилип бақмидуқ, буниң әксичә биз миллий баравәрлики вә миллий иттипақлиқни тәрғиб қилдуқ. Қазақ қериндашлиримизниң һәқ-һоқуқлирини қоғдаш үчүнла әмәс, бәлки уйғур, қирғиз, татар, өзбекләр үчүнму охшашла адаләт издидуқ. Уларниң аһу-зарини аңлаттуқ. Биз арқилиқ тарқитилған гуваһлиқлар тәсиридә қоюп берилгән миңдәк инсанниң ичидә башқа милләтләрму бар. Биз һәтта зулумға учриған, дәрдини аңлитишни халайдиған хитайларниму чәткә қақмаймиз, уларниму охшашла қарши алимиз” дегән.

Серикҗанниң аяли ләйла ериниң әтә өзи вә икки балиси билән алмутада өз өйидә җәм болушини тәқәззалиқ билән күтмәктә икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт