Үрүмчи достлуқ дохтурханисиниң дохтури сәйярә ниҗат 3 йилдин буян из-дерәксиз ғайип болған

Мухбиримиз шөһрәт һошур
2020-12-31
Share
Үрүмчи достлуқ дохтурханисиниң дохтури сәйярә ниҗат 3 йилдин буян из-дерәксиз ғайип болған Үрүмчи достлуқ дохтурханисиниң дохтури сәйярә ниҗат ханим. (Вақти вә орни ениқ әмәс)
Nadire Nijat teminligen

Үрүмчи достлуқ дохтурханисиниң дохтури сәйярә ниҗат 2017-йили 5-айда тутқун қилинған. Униң ғулҗа шәһиридики ата-аниси шу йили 9‏-айниң 17‏-күни униң үрүмчи шәһәрлик 3‏-қамақханида тутқунда икәнлики һәққидә уқтуруш тапшуривалған. Әмма шуниңдин кейин, униң ата-аниси ғулҗа вә үрүмчидики алақидар сақчи органлириниң һәммисигә берип баққан болсиму, та һазирғичә сәйярәниң нәдилики вә һазирқи әһвали һәққидә һечқандақ учур алалмиған. Бу әһвалдин техи йеқинда хәвәр тапқан сәйярәниң чәт әлдики уруқ-туғқанлири радийомизға бу әһвални инкас қилди. Мухбиримизниң ениқлашлири давамида сәйярә ишлигән дохтурхана вә алақидар сақчи органлириму сәйярә һәққидә мәлумат берәлмиди.

Үрүмчи достлуқ дохтурханисиниң дохтури сәйярә ниҗат ханимни туруш буйруқи.

2014‏-Йили шихәнзә медитсина онверситетини пүттүргән сәйярә ниҗат үрүмчи достлуқ дохтурханисиға хизмәткә чүшүп 3 йил өткәндә, үрүмчидики йүз миңлиған уйғур қатарида униңму бешиға қара халта кийдүрлгән. Хәвәрләрдин мәлум болушичә, уйғур районида бешиға қара халта кийдүрүлгәнләрниң лагерға әкитилгәндин кейин бир қисминиң кесиветилгәнлики, бир қисминиң завут-фабрикиларға мәҗбурий ишчилиққа йолланғанлиқи һәққидә аилисигә ағзаки яки язма уқтуруш берилгән болсиму, йәнә зор бир қисминиң ақивити һәққидә учур берилмигән. Инкас қилинишичә, әнә шу тутуп кетилгәндин кейин из-дерики болмайватқан ғайиплардин бири сәйярәниң америкадики уруқ-туғқанлиридин рәхи һаҗиниң радийомизға инкас қилишичә, сәйярәниң ата-аниси униң тутқундин кейин из-дерики йоқалғанлиқи һәққидә чәт әлдики уруқ-туғқанлириға учур беришкиму җүрәт қилалмиған. Телефонимизни қобул қилған үрүмчи шәһәрлик достлуқ дохтурханисиниң хадими бу дохтурханида сәйярә ниҗат исимлик бир дохтурниң бар яки йоқлиқидин хәвәрсизликини ейтти. У бу ишниң өзиниң вәзипә даирисидә әмәсликини әскәртип, сәйярә һәққидә алақидар бөлүмләрдин учур елип беришниму рәт қилди.

Сәйярәниң түркийәдә яшаватқан һәдисиниң радийомизға инкас қилишичә, сәйярәниң ата-аниси 2017-йили 9-айниң 17-күни, йәни у тутқун қилинип 4 айдин кейин, униң үрүмчи шәһәрлик 3‏-қамақханида икәнлики һәққидә үрүмчи тәңритағ районлуқ сақчи идарисидин уқтуруш тапшуривалған. Уқтурушта сәйяриниң терорлуқ вә диний әсәбийликкә аит қанунсиз материялларни сақлиғанлиқи үчүн җинайи ишлар гуман билән тутулғанлиқи қәйт қилинған.

Тәңритағ районлуқ 3-қамақханиға қилған телефонимиз бағланған болсиму, гундипай соаллиримизға җавап беришни рәт қилди.

Ашкарилинишичә, сәйярә тутқун қилинип узун өтмәй униң аниси билән дадиси башқа бир аталмиш "җинайәт" билән тутқун қилинғанлиқи үчүн униң из-дерикини қилидиған киши қалмиған. Сәйярәниң аниси бир нәччә айдин кейин, дадиси ниҗат абдуреһим 1 йерим йил лагерда ятқандин кейин қоюп берилгән. Әмма улар лагердин чиқип қизи сәйярәдин учур елишқа тохтимай һәркәт қилип баққан болсиму, та һазирғичә һечқандақ учур алалмиған. Улар ғулҗадики сақчи органлириниң көрсәтмиси бойичә үрүмчидики 4 сақчи оргиниға берип әһвал сүрүштә қилған болсиму, буларниң бәзилири уларни дәрвазидин киргүзмигән, бәзилири қопал вә ениқсиз җавап билән йолға салған; йәнә бәзилири сәйярәниң исминиң тутқунлар тизимликидин тепимлғанлиқини очуқ ейтқан.

Телефонимизни қобул қилған үрүмчи тәңритағ районлуқ сақчи хадимлири сәйярә ниҗат һәққидә җавап беришни изчил рәт қилди.

Мәлум болушичә, хитай даирилири сәйярә ниҗатниң ата-анисиға учур бәрмигәндин сирт униңға бу әһвални еғиздин чиқармаслиқ, йәни җәмийәткә, техиму тоғриси хәлқара җамаәткә ашкарилимаслиқ үчүн изчил бесим ишләткән вә тәһдит салған.

Сәйярәниң һәдиси надирә ата-анисиниң бихәтәрликини көздә тутуп, бүгүнгичә сәйярәниң ғайиплиқи һәққидә гуваһлиқ бәрмәй кәлгән болсиму, бу сүкүтниң сәйярә үчүнму, униң ата-аниси үчүнму һечқандақ пайдиси болмиған. Сәйярәдин учур аламиған униң ата-анисиниң саламәтлики күндин-күнгә аҗизлишишқа башлиған. Шуңа у ахири сүкүтини бузушқа вә бу аилә паҗиәисини дуняға ашкарилашқа мәҗбур болған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт