Ürümchi dostluq doxturxanisining doxturi seyyare nijat 3 yildin buyan iz-déreksiz ghayip bolghan

Muxbirimiz shöhret hoshur
2020-12-31
Share
Ürümchi dostluq doxturxanisining doxturi seyyare nijat 3 yildin buyan iz-déreksiz ghayip bolghan Ürümchi dostluq doxturxanisining doxturi seyyare nijat xanim. (Waqti we orni éniq emes)
Nadire Nijat teminligen

Ürümchi dostluq doxturxanisining doxturi seyyare nijat 2017-yili 5-ayda tutqun qilin'ghan. Uning ghulja shehiridiki ata-anisi shu yili 9‏-ayning 17‏-küni uning ürümchi sheherlik 3‏-qamaqxanida tutqunda ikenliki heqqide uqturush tapshuriwalghan. Emma shuningdin kéyin, uning ata-anisi ghulja we ürümchidiki alaqidar saqchi organlirining hemmisige bérip baqqan bolsimu, ta hazirghiche seyyarening nediliki we hazirqi ehwali heqqide héchqandaq uchur alalmighan. Bu ehwaldin téxi yéqinda xewer tapqan seyyarening chet eldiki uruq-tughqanliri radiyomizgha bu ehwalni inkas qildi. Muxbirimizning éniqlashliri dawamida seyyare ishligen doxturxana we alaqidar saqchi organlirimu seyyare heqqide melumat bérelmidi.

Ürümchi dostluq doxturxanisining doxturi seyyare nijat xanimni turush buyruqi.

2014‏-Yili shixenze méditsina onwérsitétini püttürgen seyyare nijat ürümchi dostluq doxturxanisigha xizmetke chüshüp 3 yil ötkende, ürümchidiki yüz minglighan Uyghur qatarida uningmu béshigha qara xalta kiydürlgen. Xewerlerdin melum bolushiche, Uyghur rayonida béshigha qara xalta kiydürülgenlerning lagérgha ekitilgendin kéyin bir qismining késiwétilgenliki, bir qismining zawut-fabrikilargha mejburiy ishchiliqqa yollan'ghanliqi heqqide a'ilisige aghzaki yaki yazma uqturush bérilgen bolsimu, yene zor bir qismining aqiwiti heqqide uchur bérilmigen. Inkas qilinishiche, ene shu tutup kétilgendin kéyin iz-dériki bolmaywatqan ghayiplardin biri seyyarening amérikadiki uruq-tughqanliridin rexi hajining radiyomizgha inkas qilishiche, seyyarening ata-anisi uning tutqundin kéyin iz-dériki yoqalghanliqi heqqide chet eldiki uruq-tughqanlirigha uchur bérishkimu jür'et qilalmighan. Téléfonimizni qobul qilghan ürümchi sheherlik dostluq doxturxanisining xadimi bu doxturxanida seyyare nijat isimlik bir doxturning bar yaki yoqliqidin xewersizlikini éytti. U bu ishning özining wezipe da'iriside emeslikini eskertip, seyyare heqqide alaqidar bölümlerdin uchur élip bérishnimu ret qildi.

Seyyarening türkiyede yashawatqan hedisining radiyomizgha inkas qilishiche, seyyarening ata-anisi 2017-yili 9-ayning 17-küni, yeni u tutqun qilinip 4 aydin kéyin, uning ürümchi sheherlik 3‏-qamaqxanida ikenliki heqqide ürümchi tengritagh rayonluq saqchi idarisidin uqturush tapshuriwalghan. Uqturushta seyyarining térorluq we diniy esebiylikke a'it qanunsiz matériyallarni saqlighanliqi üchün jinayi ishlar guman bilen tutulghanliqi qeyt qilin'ghan.

Tengritagh rayonluq 3-qamaqxanigha qilghan téléfonimiz baghlan'ghan bolsimu, gundipay so'allirimizgha jawap bérishni ret qildi.

Ashkarilinishiche, seyyare tutqun qilinip uzun ötmey uning anisi bilen dadisi bashqa bir atalmish "Jinayet" bilen tutqun qilin'ghanliqi üchün uning iz-dérikini qilidighan kishi qalmighan. Seyyarening anisi bir nechche aydin kéyin, dadisi nijat abduréhim 1 yérim yil lagérda yatqandin kéyin qoyup bérilgen. Emma ular lagérdin chiqip qizi seyyaredin uchur élishqa toxtimay herket qilip baqqan bolsimu, ta hazirghiche héchqandaq uchur alalmighan. Ular ghuljadiki saqchi organlirining körsetmisi boyiche ürümchidiki 4 saqchi orginigha bérip ehwal sürüshte qilghan bolsimu, bularning beziliri ularni derwazidin kirgüzmigen, beziliri qopal we éniqsiz jawap bilen yolgha salghan؛ yene beziliri seyyarening ismining tutqunlar tizimlikidin tépimlghanliqini ochuq éytqan.

Téléfonimizni qobul qilghan ürümchi tengritagh rayonluq saqchi xadimliri seyyare nijat heqqide jawap bérishni izchil ret qildi.

Melum bolushiche, xitay da'iriliri seyyare nijatning ata-anisigha uchur bermigendin sirt uninggha bu ehwalni éghizdin chiqarmasliq, yeni jem'iyetke, téximu toghrisi xelq'ara jama'etke ashkarilimasliq üchün izchil bésim ishletken we tehdit salghan.

Seyyarening hedisi nadire ata-anisining bixeterlikini közde tutup, bügün'giche seyyarening ghayipliqi heqqide guwahliq bermey kelgen bolsimu, bu sükütning seyyare üchünmu, uning ata-anisi üchünmu héchqandaq paydisi bolmighan. Seyyaredin uchur alamighan uning ata-anisining salametliki kündin-kün'ge ajizlishishqa bashlighan. Shunga u axiri sükütini buzushqa we bu a'ile paji'e'isini dunyagha ashkarilashqa mejbur bolghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet