Sherqiy türkistan ölimalar birliki türkiyediki Uyghur teshkilat rehberlirini hemkarlishishqa chaqiriq qildi

Istanbuldin ixtiyariy muxbirimiz arslan teyyarlidi
2023.12.29
sherqiy-turkistan-olimalar-birliki-Alimjan-bughda-02 Sherqiy türkistan ölimalar birliki re'isi dini alim doktor alimjan bughda sözlewatidu.2023-Yili 26-dékabir, istanbul
RFA/Arslan

Merkizi istanbuldiki sherqiy türkistan ölimalar birlikining uyushturushi bilen 26-dékabir küni istanbulda Uyghur teshkilatlarning rehberliri bir yerge jem boldi we teshkilatlar ara pikir almashturush we xitaydin qutulushtin ibaret ghaye-meqsetke yétish üchün hemkarlishish tekitlendi.

Bu yighin'gha türkiyede sherqiy türkistan dewasi yolida siyaset, tetqiqat, axbarat, metbu'at, telim-terbiye saheliri boyiche xizmet qiliwatqan 45 Uyghur teshkilatining rehberliri we wekilliri qatnashti.

Yighin'gha riyasetchilik qilghan sherqiy türkistan ölimalar birlikining mu'awin re'isi abdusalam alim yighinning meqsiti we ehmiyiti toghrisida toxtilip, teshkilatlar ara hemkarliqni kücheytish, mesililerni hel qilishta bir yerge jem bolup chüshinish hasil qilish, düshmendin (xitaydin) qutulushtin ibaret ghaye-meqset üchün ortaq heriket qilish kéreklikini tekitlidi.

Sherqiy türkistan ölimalar birliki uyushturghan sherqiy türkistan teshkilat rehberlirining yighinidin körünüsh.2023-Yili 26-dékabir, istanbul
Sherqiy türkistan ölimalar birliki uyushturghan sherqiy türkistan teshkilat rehberlirining yighinidin körünüsh.2023-Yili 26-dékabir, istanbul
RFA/Arslan

Sherqiy türkistan ölimalar birliki re'isi doktor alimjan bughda bu yighinda qilghan sözide, sherqiy türkistan xelqining azadliqtin ibaret ulughwar ghayisini ishqa ashurush üchün Uyghur teshkilatlirining, jama'et erbablirining hemkarliq ichide ortaq heriket qilishi kéreklikini tekitlep mundaq dédi: “Heqliq dawayimizni royapqa chiqirish, xelqimizni xitayning zulmidin qutuldurup wetenning musteqilliqini qolgha keltürüsh üchün bir nepes bolup heriket qilishimiz, bolupmu xelqimizni bu dawagha yéteklewatqan teshkilatlirimizning, jama'et erbablirimizning bir yerge kélishi dawayimizning netijige érishishi üchün intayin muhim” .

Doktor alimjan bughda Uyghurlar duch kéliwatqan zulumni yoq qilish üchün her sahe kishilerning ortaq heriket qilishning tolimu muhimliqini tekitlep mundaq dédi: “Xitay axirqi yillarda xelqimiz üstide irqiy qirghinchiliq élip bardi Uyghur bolushning özila ularning irqi qirghinchiliq qilishi üchün yéterlik seweb boldi. Bu qirghinchiliqtin dindarimu, milletchisimu, wetenperwirimu hetta uzun yillar xitaygha sadaqetmenlik bilen xizmet qilghanlarmu, héch ishqa arilashmay oqitini qilip pul tapqan baylarmu aman qalmidi. Hemmimiz teqdirdash, hemmimizning qismiti bir. Xitayning irqiy qirghinchiliqigha qarshi xelqimiz, muhajirettiki teshkilatlirimiz birlikte heriket qiliwidi, dewayimiz bir pelle yuqiri örlidi, dewayimiz xelq'aralashti. Bizlerge hésdashliq qilidighan chet'elliklerning sani köpeydi. Bizlerge musteqilliq yoli körünüshke bashlidi. Bu dewa yolida hesse qoshqan hemmeylendin allah razi bolsun” .

Doktor alimjan bughda yene mundaq dédi: “Düshminimiz bek quw, intayin pursetperes. Bizlerning bixudluqimiz, öz ichimizdiki addiy de talashmu düshmen üchün bayram. Düshmen bizlerni yoq qilish, dewayimizni ajizlitish üchün yéngi weziyet peyda qilish, öz'ara düshmenlik uruqi chéchish, rehberlerni we dewa sépidikilerni étibarsizlashturush üchün her xil hiyle-neyrenglirini ishlitidu, barliq imkaniyetlirini ishqa salidu. Bizlerning intayin hoshyar bolushimiz bek muhim. Xitay weten ichidiki weziyetni asta-asta özgertip, dunyani aldashqa we bizlerni yalghanchigha chiqirishqa urunushi mumkin. Hetta bezi ademlirini ishqa sélip, bardi-keldilerni köpeytip, gheyritimizni ajizlitip, dewayimizni passip halgha chüshürüp qoyushi mumkin. Mushundaq zamanlarda dewa sépidikiler öz'ara zich hemkarliq ornitishi, bir-birige medet bérishi lazim” .

Doktor alimjan sözide yene Uyghur teshkilatlar arisidiki munasiwetni yaxshilash, dawa sépidiki rehberlerning dostluqi we semimiyitini kücheytish, xelqimiz ichidiki nopuzluq kishilerning dewagha bolghan hésdashliqini qolgha keltürüsh üchün sherqiy türkistan ölimalar birliki teripidin mexsus bir komitét tesis qilin'ghanliqini, buninggha sherqiy türkistan ölimalar birlikining mu'awin re'isi sirajidin eziziy hajimning mes'ul bolghanliqini bildürdi.

Yighin axirida sirajiddin ezizi ependi söz qilip mundaq dédi: “Sherqiy türkistan ölimalar birliki türkiye ichi we sirtidiki teshkilatlar bilen bolghan munasiwetni yaxshi élip bérishqa tirishidu, chet'eldiki teshkilatlar bir-birini toluqlighan asasta munasiwetni yaxshilashqa intayin éhtiyajliq, bolupmu bügünki künde munasiwetlerning yiriklishishi, ixtilaplarning chongqurlishishi, muhajirettiki xelqimizgimu selbiy tesir körsitiwatqanliqi üchün, ularning bu dewadin sowup kétiwatqanliqini hés qiliwatimiz” .

Sherqiy türkistan ölimalar birlikining mu'awin re'isi sirajidin eziziy sözlewatidu. 2023-Yili 26-dékabir, istanbul
Sherqiy türkistan ölimalar birlikining mu'awin re'isi sirajidin eziziy sözlewatidu. 2023-Yili 26-dékabir, istanbul
RFA/Arslan

Sirajidin ezizi ependi yene mundaq dédi: “Sherqiy türkistan ölimalar birliki xelqimizning diniy we milliy menpe'etlirini chiqish qilghan asasta arini islah qilidighan, munasiwetlerni yaxshilaydighan xizmetlerni bejanidil ijra qilidu. Ölimalar birliki teshkilatlar ara munasiwet ishliri guruppisi bolush süpitimiz bilen xelqimizning birlik, barawerlikni yaxshilash, kücheytish yolida dawamliq tirishchanliq körsitimiz” .

Yighin axirida bir qisim teshkilat rehberliri pikir bayan qilip, teshkilatlar ara chüshinish hasil qilish, buning üchün pat-pat uchriship turush kéreklikini otturigha qoydi we bu teklipni köpinche rehberler qollaydighanliqini ipadileshti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.