Закирҗан қузийеф қазақистан парламентиниң сенат әзалиқиға тәйинләнгән

Қазақистан җумһурийитиниң президенти тоқайефниң биваситә көрситиши билән уйғур хәлқиниң вәкили закирҗан қузийеф қазақистан парламентиниң сенат әзалиқиға тәйинләнгән.

Йеқинда қазақистан президенти қасим-җомарт тоқайефниң пәрманиға бенаән, қазақистан парламенти сенатиниң йеңи әзалири тәйинләнгән вә сайлап чиқилған. Дөләт рәһбириниң қазақистан хәлқи бирләшмисидин бәлгилигән сенат әзалири ичидә уйғур хәлқиниң вәкили закирҗан қузийефму бар.

Қазақистанниң асасий қануни бойичә парламент мәмликәтниң қанун чиқириш ролини атқуридиған юқири дәриҗилик вәкилләр органи болуп, у икки палатадин, йәни сенат вә алий кеңәштин тәшкил тапқан. Сенатта 50 әза болуп, улардин 10 нәпири, шу җүмлидин қазақистан хәлқи бирләшмисидин 5 вәкил президент тәрипидин биваситә тәйинлиниду, қалғанлири йошурун аваз бериш арқилиқ әзалиққа сайлиниду. Қазақистан хәлқи бирләшмиси мәмликәттә яшаватқан 100дин ошуқ милләтләргә вәкиллик қилидиған чоң тәшкилаттур.

Қазақистан парламентиниң сенат әзалиқиға уйғур вәкилиниң бәлгилиниши, қазақистандики уйғур җамаити арисида, болупму мәтбуат вә иҗтимаий таратқуларда зор инкас қозғимақта.

Атақлиқ язғучи вә драматорг, қазақистан язғучилар иттипақиниң әзаси әхмәтҗан һашири әпәнди, закирҗан қузийефниң парламент сенатиниң әзаси болуп бәлгилинишиниң қазақистан уйғурлири үчүн чоң йеңилиқ болғанлиқини алаһидә тәкитлиди.

У мундақ деди: “мән закирҗанниң һәқиқий мәнидә данишмәнлик пикриниң бар икәнликигә көзүм йәтти. У хәлқимизниң ичидә чоң иззәт-һөрмәткә игә уйғур йигити. Уни сайлиған вақитта хәлқимиз һәммиси ойғинип, наһайити хурсән болди. Хәлқимизниң миллийәтлик қәдирийитини йоқури көтириштә бу бир чоң бәрикәт, бизгә кәлгән бир амәт болди. У бизниң сәнәткарлиримизни, язғучилиримизни наһайти қәдирләйдиған ички бир киши. Униң қазақистан парламентидики сенатта хәлқимизниң бәхит-саадити үчүн күч чиқиридиғанлиқиға ишәнчим камил.”

Әхмәтҗан һашири йәнә закирҗан қузийефниң бош ятқан йәрләрни хәлққә бериш, болупму деһқанларни һәр җәһәттин қоллап-қувәтләшкә охшаш тәшәббуслири билән көзгә көрүнгәнликини оттуриға қойди. У закирҗан қузийефни өз миллити үчүн көйүнидиған һәм шу йөнилиштә көплигән хәйир-сахавәтлик ишларни қилған шәхс сүпитидә тонуйдиғанлиқини тәкитлиди.

Җумһурийәтлик уйғур етно-мәдәнийәт мәркизи алий кеңишиниң рәиси, “уйғур авази” гезитиниң баш муһәррири ершат әсмәтоф әпәнди мундақ деди: “йеқинда болуп өткән сенат сайлимида бәш милләт вәкилиниң қатарида закирҗан қузийеф әза болуп сайланди. Мана буму қазақистан уйғурлириниң сиясий паалийәтчанлиқиниң бир көрүнүши болса керәк. Биз закирҗан қузийефқа сенаттики орни мубарәк болсун дәймиз! униң келәчәктә мустәқил қазақистанға, қазақистан хәлқи бирләшмисигә, қазақистандики 130 милләткә, йәни уйғур хәлқигә хизмәт қилидиғанлиқиға үмид қилимиз. Закирҗанға утуқ тиләймиз.”

Ершат әсмәтоф, қазақистан уйғурлириниң мәмликәтниң асасий қанунлиридин пайдилинип, өзлириниң миллий тәрәққиятиға вә қазақистанниң гүллинишигә зор төһпә қошуп келиватқанлиқини билдүрди.

У йәнә қазақистан парламентиниң юқириқи вә төвәнки палаталириға сайланған уйғурларниң қазақистанниң омумий тәрәққиятиға хизмәт қилиштин ташқири йәнә өз миллитиниң гүллинишигиму көңүл бөлүп келиватқанлиқини көрсәтти.

Игилишимизчә, закирҗан қузийеф 1969-йили алмута шәһиридә дуняға кәлгән. Оттура мәктәпни пүттүргәндин кейин, алмута қурулуш техникомини тамамлиған. У әмгәк паалийитини яғаччи болуп башлап, чоң ширкәтниң президенти дәриҗисигичә йәткән. Закирҗан қузийеф көплигән дөләтләрниң мукапатлириға еришкән, мәмликәт даирисидә кәң тонулған бир тиҗарәтчи. Һазир у қазақистандики “универсал” ишләпчиқириш ширкәтлирин бирләшмисини башқуруватқан болуп, қол астида үч миңдин артуқ хизмәтчи ишлимәктикән.