Shendong birinchi türmige solan'ghan Uyghurlardin 4 kishining ismi ashkarilandi

Muxbirimiz shöhret hoshur
2019-03-15
Élxet
Pikir
Share
Print
Uyghur rayonidin mehbuslarning yötkep kélin'genliki melum bolghan shandong ölkisidiki türmilerdin biri.
Uyghur rayonidin mehbuslarning yötkep kélin'genliki melum bolghan shandong ölkisidiki türmilerdin biri.
Social Media

Uyghur rayonidin xitay ölkilirige yötkelgen mehbuslar heqqidiki éniqlashlirimiz dawamida shendong birinchi türmiside yétiwatqan mehbuslardin 4 nepirining isimliri ashkarilandi. Muxbirimizgha qolidiki mehbuslar tizimlikidin ilyar, qasimjan, éli we memtimindin ibaret 4 kishining ismini oqup bergen türme xadimi Uyghur mehbuslarning ismining uzunluqi we sanining köplükini seweb qilip körsitip, muxbirimizning mehbuslar heqqidiki bashqa so'allirigha jawab bérishni ret qildi.

Hörmetlik radi'o anglighuchilar, ötken heptilerdiki éniqlashlirimiz dawamida shendongdiki birqanchilighan türmide Uyghur rayonidin yötkelgen mehbuslarning barliqi türme xadimliri teripidin delillen'gen idi. Biz bu hepte shendong birinchi türmisige Uyghur rayonidin yötkelgen mehbuslarning kimlikliri we sani heqqide melumat élishqa tirishtuq. Téléfonimizni qobul qilghan türme xadimi bu türmide Uyghurlarning barliqini inkar qilmidi. U bizdin sürüshte qilmaqchi bolghan kishilerning ismini soridi. Biz arzugül isimlik bir mehbusni sorighinimizda u bu türmining erler türmisi ikenlikini bildürüp, bundaq bir mehbus heqqide melumat bérelmeydighanliqini éytti. Biz andin uningdin abduweli isimlik bir mehbusni soriduq. Qolidiki tizimlikke estayidil qarap chiqqan bu xadim bundaq bir isimning tizimlikte yoqluqini bayan qildi. Biz arqidin alimjan isimlik yene bir kishini soriduq. U tizimlikte bundaq bir isimningmu yoqluqini bildürdi. Biz alimjan isimlik bir kishini sorighinimizda u tizimlikte isimlarning köplükini seweb qilip körsitip, so'allirimizgha bu shekilde bir-birlep jawab bérip bolalmaydighanliqini éytti. Biz so'alimizni dawamlashturup, tahir isimlik yene bir kishini soriduq. U bu chaghda tizimliktiki isimlarning uzunluqidin shikayet qilip, so'allirimizgha jawab bérishtin charchighanliqini bildürdi. Biz axirida uningdin özi bilidighan yaki qolidiki tizimlikte mewjut bolghan isimlardin bir qanchini dep bérishini soriduq. U bu so'alimizgha mundaq jawab berdi: 

Türme xadimi: qasimjan, éli, memet, ilyar. . . . . .

Biz uningdin bu kishilerning qaysi türme rayonida ikenlikini soriduq. U tizimlikke qarawatqanliqini bayan qilghan pursette biz uningdin bu tizimlikte jem'iy qanche kishining barliqini soriduq. Bu chaghda u so'allirimizgha jawab bérishtin waz kechti. Biz uningdin u özi tilgha alghan ilyar isimlik mehbusning familisini soriduq:

Muxbir: ilyarning familisi néme? ilyar shawketmu? 

Bu türme xadimi bu heqte tégishlik jawab bérip bolghanliqini bildürüp, bu heqte buningdin artuq jawab bérelmeydighanliqini éytti. Biz axirida uningdin qolidiki tizimliktiki mehbuslar sanining 100, 1000 yaki 10 ming ikenlikini sorighinimizda u bu so'allargha jawab bérelmeydighanliqini bildürüp, téléfonimizni qoyuwetti.
Xitay da'iriliri Uyghur rayonida yighiwélish lagérlirining mewjutluqini deslepte inkar qilip, axirida "Kespiy terbiyilesh orni" déyish arqiliq lagérlarning mewjutluqini wasitilik étirap qilghan bolsimu, emma bu lagérlardin xitay ölkilirige yötkigen Uyghur mehbuslar heqqide hazirghiche héchqandaq bir resmiy melumat bermidi. Gerche ürümchidiki da'iriler aldinqi yili 10‏-ayda ürümchidin xitay ölkilirige mangidighan yoluchilar poyizigha bilet sétishning bir ayche toxtaydighanliqini "Ürümchi kechlik géziti" de élan qilish arqiliq bu mezgilde poyiz yolida xupiyane bir zor yötkilishning yüz béridighanliqidin isharet bérip qoyghan bolsimu, lékin lagér yaki türmilerdin qanchilik kishining xitay ölkilirige yötkilidighanliqi heqqide héchqandaq uchur bermigen idi. Peqet italiyediki "Zimistan" xewer tori xitay ölkiliridiki yer asti muxbirliri arqiliq igiligen uchurlirigha asasen 500 mingche Uyghurning xitay ölkilirige yötkelgenlikini ilgiri sürgen bolsimu, emma yéterlik tepsilatlirini körsitip bérelmigen idi. Biz ötken yili yazda qeshqerdin igiligen uchurlirimizda bir saqchi xadimi özining qeshqerdin 2000 che kishining xitay ölkilirige yötkep kétilgenlikidin xewiri barliqini éytqan we bu yötkeshte qaysi saqchi xadimlirining wezipe ötigenlikinimu ashkarilighan idi.

Toluq bet