52 Уйғур тәшкилати ши җинпиңниң сәуди әрәбистан зияритидә мусулман дөләтләрни уйғур ирқий қирғинчилиқини әйибләшкә чақирған

52 Уйғур тәшкилати бирләшмә чақириқ елан қилип, мусулман дөләтлирини ши җинпиңниң сәуди әрәбистан зияритидә уйғур ирқий қирғинчилиқини әйибләшкә чақирған.

8-Декабир күни муһаҗирәттә паалийәт елип бериватқан д у қ башчилиқидики 52 уйғур тәшкилати бирләшмә чақириқ елан қилип, мусулман дөләтлири рәһбәрлирини вә хәлқаралиқ тәшкилатларни ши җинпиңниң сәуди әрәбистан зиярити мәзгилидә хитай һакимийитиниң уйғурларға йүргүзиватқан вәһшиликлирини қаттиқ әйибләшкә һәмдә давам қиливатқан уйғур ирқий қирғинчилиқиға хатимә беришкә чақирған, шундақла сәуди әрәбистанда тутуп турулуватқан 4 нәпәр уйғурни хитайға қайтурушниң хәлқара әһдинамиләргә хилаплиқ қилғанлиқ болидиғанлиқини әскәрткән.

Д у қ рәиси долқун әйса чақириқта мунуларни тилға алған: “сәуди әрәбистанида ши җинпиң билән көрүшкәнләр, өзлириниң уйғур мусулманлириға қарита йүргүзүливатқан ирқий қирғинчилиққа җавабкар һакимийәтниң рәһбири билән көрүшүватқанлиқини билишлири керәк. Болупму мусулман дөләтлириниң рәһбәрлири уйғур ирқий қирғинчилиқиға қарита сүкүтлирини җиддий рәвиштә бузуши лазим. Ислам қиммәт қарашлирини қоғдаш уларниң диний мәҗбурийити.”

Бирләшмә чақириқта, хитай һакимийитиниң шәрқий түркистандики ислам дини вә мәдәнийитигә қарши бастуруш һәрикәтлири, диний чәклимиләр, мәсчит-мәдрисләрниң вәйран қилиниши, диний тәлим-тәрбийәләрниң мәний қилиниши вә башқа диний зулумлар бирму-бир санап өтүлгән. Мәзкур чақириқни елан қилиштики мәқсәт һәққидә тохталған д у қ рәиси долқун әйса әпәнди алди билән ши җинпиңниң сәуди әрәбистан зияритиниң уйғурлар мәсилиси билән зич алақидар икәнликини тилға алди. У сөзидә исламға җәң елан қилған, динниң дүшмини болған хитай һакимийитиниң рәһбири ши җинпиң билән өзлирини исламниң һамийси чағлаватқан мусулман дөләтлири рәһбәрлириниң бир үстәлдә олтурушиниң җинайәт болидиғанлиқини тәкитлиди.

Чақириқтин мәлум болушичә, ши җинпиң 3 күнлүк сәуди әрәбистан зиярити мәзгилидә бирқанчә чоң йиғинларға қатнишидикән вә 30 дин артуқ мусулман дөләтлириниң рәһбәрлири билән учришидикән. Чақириқта бу мусулман дөләтлириниң б д т да алдинқи айларда өткүзүлгән уйғурлар мәсилисини кишилик һоқуқ кеңишидә музакирә қилишқа аваз бериш йиғинида хитай тәрәптә турғанлиқи, бу дөләтләрниң рәһбәрлири әгәр уйғур ирқий қирғинчилиқиға давамлиқ көз юмса вә униңға хатимә бериш йолида теришчанлиқ көрсәтмисә, мусулман үммәтлириниң ортақ исламий қиммәт қаришиға хиянәт қилғанлиқ болидиғанлиқи әскәртилгән.

Д у қ берлин ишханисиниң мудири ғәюр қурбан әпәнди бу мунасивәт билән зияритимизни қобул қилғанда, сәуди әрәбистан башлиқ бир қисим мусулман дөләтлириниң уйғур ирқий қирғинчилиқиға тутуватқан муамилисиниң инсанларни қаттиқ үмидсизләндүридиғанлиқини тилға алди.