Шиветсийәдики уйғур паалйәтчи нәбиҗан әла акиси вә һәдисиниң лагерға қамалғанлиқини аңлатти

Мухбиримиз меһрибан
2019-04-03
Share
nabijan-ela-hedisi.jpg Нәбиҗан әла әпәнди(солда)ниң тәрбийәләш лагериға елип кетилгән қарамайдики һәдиси зөһрә гүл әла.
Nebijan Ela teminligen

Шиветсийәдики уйғур паалийәтчи нәбиҗан әла вәтәндики қериндашлиридин үрүмчидики өпкә кесәлликлири дохтурханисиниң дохтури акиси абдухелил әла вә қарамайдики бир хитай ширкитиниң материял бөлүмидә ишләйдиған һәдиси зөһрәгүл әланиң 2018-йилида илгири-кейин болуп лагерға елип кетилгәнлики һәққидә учур алғанлиқини билдүрди.

Униң билдүрүшичә, хитай даирилириниң қаттиқ қамали сәвәблик уйғур дияридин учур елиш қийинлашқан шараитта у һәр хил усулларда сүрүштүрүш арқилиқ туғқанлириниң тутқун қилинғанлиқи һәққидики бу учурларға еришкән.

Нәбиҗан әла әпәнди акиси вә һәдисиниң тутқун қилинғанлиқи һәққидики хәвәр ишәнчлик мәнбәләрдин кәлгән болсиму, учур йәткүзгәнләр хитайниң тәсири күчлүк дөләтләрдә болғини үчүн һазирчә бу тонушлириниң кимликини ашкарилиялмайдиғанлиқини билдүрди. У өзи игилигән әһвалларни өзи яшаватқан шиветсийәдики мунасивәтлик һөкүмәт органлириға, дуня уйғур қурултийиға вә хәлқарадики кишилик һоқуқ тәшкилатлириға йәткүзгәнликини илгири сүрди.

Нәбиҗан әпәндидин униң акиси вә һәдисиниң тутқун қилинишиниң сәвәбини сориғинимизда у алди бу паҗиәниң хитай һөкүмитиниң пүткүл уйғурлар үстидин елип бериватқан бастуруш сияситиниң бир парчиси икәнликини әскәртип, туғқанлириниң тутқун қилинишиға йәнә өзиниң бир мәзгил әркин асия радийоси уйғур бөлүми үчүн ихтиярий мухбир болуп ишлигәнлики вә шиветсийәдики паалийәтлириму сәвәб болғанлиқини билдүрди

Үрүмчидики уйғур аптоном районлуқ өпкә дохтурханисиниң дохтури абдухелил әла бу йил 52 яшта икән. Илгири мәзкур дохтурхана йенида йемәк-ичмәк талла базири ачқан, кейинчә сиясий сәвәбләр билән бирқанчә қетим түрмиләргә қамалған, 2013-йили қачақ йоллар арқилиқ түркийәгә келип йәрләшкән әнвәр чәбдәс әпәдиму радийомиз зияритини қобул қилип, дохтур абдухелил әла һәққидә өзи билидиған әһвалларни аңлатти.

У дохтур абдухелил әпәндиниң мәзкур дохтурханиға кесәл давалитиш үчүн кәлгән уйғур бимарлириға көрсәткән алаһидә ғәмхорлуқи билән уйғурларниң һөрмитигә еришкән бир дохтур икәнликини тәкитләп өтти. Әнвәр чәбдәс әпәнди йәнә дохтур абдухелил әпәндиниң хитай һөкүмити тәрипидин гуманлиқ кишиләр дәп "чекит" урулған уйғур бимарларға тутқун инсаний муамилисиниңму униң тутқун қилинишиға сәвәб болған амиллар болуши мумкинликини билдүрди.

Нәбиҗан әпәнди йәнә муһаҗирәттики уйғур қериндашларниң хитай даирилири тәрипидин тутқун қилинған туғқанлириниң әһвалини сүрүштүрүш һәмдә бу һәқтә хәлқарада гуваһлиқ беришниң муһимлиқини тәкитлиди. У йәнә уйғур диярида қурулған натсистлар моделидики җаза лагерлириниң әһвалини дуняға аңлитиш, бу лагерларниң әң тез вақитта тақилиши үчүн хитай һөкүмитигә қарши хәлқара бесимни күчәйтиш шундақла муһаҗирәттики уйғурларниң батурлуқ билән оттуриға чиқип хәлқарада гуваһлиқ беришиниң иҗабий рол ойнайдиғанлиқини алаһидә әскәртип өтти.

Юқириқи аваз улинишидин мухбиримиз меһрибан тәйярлиған сөһбәт программисиниң тәпсилатини аңлайсиләр.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт