Shiwétsiyediki Uyghur pa'alyetchi nebijan ela akisi we hedisining lagérgha qamalghanliqini anglatti

Muxbirimiz méhriban
2019-04-03
Élxet
Pikir
Share
Print
Nebijan ela ependi(solda)ning terbiyelesh lagérigha élip kétilgen qaramaydiki hedisi zöhre gül ela.
Nebijan ela ependi(solda)ning terbiyelesh lagérigha élip kétilgen qaramaydiki hedisi zöhre gül ela.
Nebijan Ela teminligen

Shiwétsiyediki Uyghur pa'aliyetchi nebijan ela wetendiki qérindashliridin ürümchidiki öpke késellikliri doxturxanisining doxturi akisi abduxélil ela we qaramaydiki bir xitay shirkitining matériyal bölümide ishleydighan hedisi zöhregül elaning 2018-yilida ilgiri-kéyin bolup lagérgha élip kétilgenliki heqqide uchur alghanliqini bildürdi.

Uning bildürüshiche, xitay da'irilirining qattiq qamali seweblik Uyghur diyaridin uchur élish qiyinlashqan shara'itta u her xil usullarda sürüshtürüsh arqiliq tughqanlirining tutqun qilin'ghanliqi heqqidiki bu uchurlargha érishken.

Nebijan ela ependi akisi we hedisining tutqun qilin'ghanliqi heqqidiki xewer ishenchlik menbelerdin kelgen bolsimu, uchur yetküzgenler xitayning tesiri küchlük döletlerde bolghini üchün hazirche bu tonushlirining kimlikini ashkariliyalmaydighanliqini bildürdi. U özi igiligen ehwallarni özi yashawatqan shiwétsiyediki munasiwetlik hökümet organlirigha, dunya Uyghur qurultiyigha we xelq'aradiki kishilik hoquq teshkilatlirigha yetküzgenlikini ilgiri sürdi.

Nebijan ependidin uning akisi we hedisining tutqun qilinishining sewebini sorighinimizda u aldi bu paji'ening xitay hökümitining pütkül Uyghurlar üstidin élip bériwatqan basturush siyasitining bir parchisi ikenlikini eskertip, tughqanlirining tutqun qilinishigha yene özining bir mezgil erkin asiya radiyosi Uyghur bölümi üchün ixtiyariy muxbir bolup ishligenliki we shiwétsiyediki pa'aliyetlirimu seweb bolghanliqini bildürdi

Ürümchidiki Uyghur aptonom rayonluq öpke doxturxanisining doxturi abduxélil ela bu yil 52 yashta iken. Ilgiri mezkur doxturxana yénida yémek-ichmek talla baziri achqan, kéyinche siyasiy sewebler bilen birqanche qétim türmilerge qamalghan, 2013-yili qachaq yollar arqiliq türkiyege kélip yerleshken enwer chebdes epedimu radiyomiz ziyaritini qobul qilip, doxtur abduxélil ela heqqide özi bilidighan ehwallarni anglatti.

U doxtur abduxélil ependining mezkur doxturxanigha késel dawalitish üchün kelgen Uyghur bimarlirigha körsetken alahide ghemxorluqi bilen Uyghurlarning hörmitige érishken bir doxtur ikenlikini tekitlep ötti. Enwer chebdes ependi yene doxtur abduxélil ependining xitay hökümiti teripidin gumanliq kishiler dep "Chékit" urulghan Uyghur bimarlargha tutqun insaniy mu'amilisiningmu uning tutqun qilinishigha seweb bolghan amillar bolushi mumkinlikini bildürdi.

Nebijan ependi yene muhajirettiki Uyghur qérindashlarning xitay da'iriliri teripidin tutqun qilin'ghan tughqanlirining ehwalini sürüshtürüsh hemde bu heqte xelq'arada guwahliq bérishning muhimliqini tekitlidi. U yene Uyghur diyarida qurulghan natsistlar modélidiki jaza lagérlirining ehwalini dunyagha anglitish, bu lagérlarning eng téz waqitta taqilishi üchün xitay hökümitige qarshi xelq'ara bésimni kücheytish shundaqla muhajirettiki Uyghurlarning baturluq bilen otturigha chiqip xelq'arada guwahliq bérishining ijabiy rol oynaydighanliqini alahide eskertip ötti.

Yuqiriqi awaz ulinishidin muxbirimiz méhriban teyyarlighan söhbet programmisining tepsilatini anglaysiler.

Toluq bet