Шиветсийә парламентиға уйғур дияридики җаза лагерлириға қарши қарар мақуллаш лайиһәси сунулған

Ихтиярий мухбиримиз әкрәм
2019-11-01
Елхәт
Пикир
Share
Принт
Шиветсийәдә һакимийәт бешида туруватқан әң чоң партийәләрдин бири болған «сотсиял демократлар партийәси» ниң парламенттики әзаси сәркан көсә әпәнди.
Шиветсийәдә һакимийәт бешида туруватқан әң чоң партийәләрдин бири болған «сотсиял демократлар партийәси» ниң парламенттики әзаси сәркан көсә әпәнди.
Social Media

 

Шиветсийә парламентиниң тор бәтлиридики учурлардин мәлум болишичә, шиветсийәдә һакимийәт бешида туриватқан әң чоң партийиләрдин бири болған «сотсиял демократлар партийиси» ниң парламенттики әзалиридин сәркан көсә вә томас һаммарберг қатарлиқлар шиветсийә парламентиға хитайниң уйғур диярида тәсис қилған җаза лагерлириға қарши қарар мақуллаш тоғрисида рәсмий доклат сунған. Бу доклаттин орун алған қарар лайиһәсиниң нами: «Motion 2019/20:3027 Xinjiang» дәп аталған.


«Шиветсийә уйғур маарип уюшмиси» ниң рәиси ниҗат турғун әпәндиниң билдүришичә, бу лайиһә бу йил 12-айға қәдәр парламентта 4 қетим талаш-тартиш қилинидикән һәмдә шиветсийәдики 7 партийәниң музакирисидин өтидикән. 

Мәзкур қарар лайиһәсини изаһлиған доклатта уйғурларниң нөвәттики еғир вәзийити әтраплиқ баян қилинған болуп, хитай һөкүмитиниң шәрқий түркистандики һәр түрлүк зулумлири, җаза лагерлири вә лагер сиртидики уйғурлар дуч келиватқан һәр хил тәһдитләр, ғәрибтики 23 дөләтниң б д т да хитайниң кишилик һоқуқ дәпсәндичиликлири һәм җаза лагерлириға қарши бирләшмә баянат елан қилғанлиқи, уйғур дияридики аталмиш «тәрбийиләш мәркизи» ниң әмәлийәттә түрмә икәнлики, шиветсийә һөкүмитиниң буниңға қарши тәдбир елиши зөрүрлики қатарлиқлар оттуриға қоюлған. 

Ниҗат турғунниң әскәртишичә, мәзкур лайиһәниң парламент әзалири тәрипидин рәсмий рәвиштә шиветсийә парламентиға сунулуши үчүн «шиветсийә уйғур маарип уюшмиси» һәмдә шиветсийәдики уйғурлар узун муддәт зор әҗирләр сәрп қилған. Әгәр бу доклатқа бинаән 12-айниң 17-күни шиветсийә парламентида өткүзилидиған омумий йиғинда бир қарар мақулланса, у һалда бу қарар явропа иттипақиға әза 28 дөләт ичидә рәсмий бир дөләт тәрипидин мақулланған уйғурларға аит тунҗи қарар болуп қалидикән. 

Шиветсийәниң стокһолм шәһиридә яшайдиған дуня уйғур қурултийиниң баянатчиси дилшат решит бу қарар лайиһәсиниң парламентқа сунулғанлиқидин көп хурсән болғанлиқини тилға алди. Униң баян қилишичә, шиветсийә һөкүмити уйғурлар мәсилисигә, болупму хитайниң җаза лагерлири сияситигә йеқиндин буян җиддий көңүл бөлүп келиватқан дөләтләрниң бири һесаблинидикән. Униң ейтишичә, бу лайиһәниң парламентқа сунулуши уйғурлар мәсилисиниң шиветсийәдә техиму кәң тонулушиға түрткә болидикән. 

Шиветсийә парламентиниң тор бәтлиридики учурлардин мәлум болушичә, бу йил ичидә шиветсийә ташқий ишлар министерлиқи вә кишилик һоқуқ комитетлирида 4 қетим уйғурларниң нөвәттики қейин вәзийити тоғрисида муназириләр елип берилған вә гуваһлиқ бериш йиғинлири уюштурулған. 

Шиветсийә дөлити германийә ташқий ишлар министерлиқиниң өткән йили елан қилған «уйғур муһаҗирларни хитайға қайтурмаслиқ» пиринсипини қизғин қоллиған дөләтләрниң бири болуп, шиветсийә һөкүмитиму бу хусуста охшаш мәзмунда бир қарар қобул қилған иди.

Пикирләр (0)
Share
Толуқ бәт