Analizchilar shöhret zakirning "Binakarliq saheside terbiyelep ishqa orunlashturush" doklatigha inkas qayturdi

Muxbirimiz méhriban
2020-06-10
Élxet
Pikir
Share
Print
Uyghur aptonom rayonining re'isi shöhret zakir atalmish "Kespiy terbiyelesh merkezliri" namidiki lagérlar heqqide muxbirlarning so'aligha jawab bermekte. 2019-Yili 9-dékabir, béyjing.
Uyghur aptonom rayonining re'isi shöhret zakir atalmish "Kespiy terbiyelesh merkezliri" namidiki lagérlar heqqide muxbirlarning so'aligha jawab bermekte. 2019-Yili 9-dékabir, béyjing.
AP

"Shinjang géziti" ning 10-iyundiki sanida 8-iyun küni échilghan "Binakarliq-qurulush sahesidiki terbiyelep ishqa orunlashturush" téléwiziye-téléfon yighinida Uyghur aptonom rayonining re'isi, Uyghur aptonom rayonluq partkomning mu'awin sékrétari söhret zakirning pütün aptonom rayonning binakarliq-qurulush saheside téxnikiliq ish türliride üch yilda 200 ming kishini terbiyelep ishqa orunlashturush herikitini algha siljitish toghrisida seperwerlik doklati bergenliki xewer qilin'ghan.

Xewerde shöhret zakirning "Pütün aptonom rayonning binakarliq-qurulush saheside téxnikiliq ish türi boyiche üch yilda 200 ming kishini terbiyelep ishqa orunlashturushni emeliyleshtürüsh" ni tekitligenliki, "Yézilardiki éshincha emgek küchliri" ni terbiyileshni tézlitip, ularni "Déhqandin sana'et ishchisigha aylandurush" ni otturigha qoyghanliqi tilgha élin'ghan.

Shöhret zakir mundaq dégen: "Nöwette pütün aptonom rayon boyiche binakarliq-qurulush saheside ishlewatqanlar ishqa orunlashqan nopusning 10 pirsentini igileydu. Binakarliq-qurulush saheside téxnikiliq ish türi boyiche terbiyelep ishqa orunlashturush herikitini yolgha qoyush yézilardiki artuq emgek küchlirining en'eniwi déhqandin sana'et ishchisigha aylinishini ilgiri sürüp, yéza nopusining sheher-bazarlargha yötkilishini téz algha siljitidu. Bu ishqa orunlashturushni kéngeytishni muqimlashturush, yéngiche sheher-bazarlashturush qurulushigha türtke bolushqa paydiliq bolup, kesip arqiliq kishilerni xatirjem qilish, kesip arqiliq kishilerni muqim qilish, kesip arqiliq namratliqtin qutuldurushni ishqa ashurup, shinjangning ijtima'iy muqimliq we ebediy eminlik bash nishanini ishqa ashurushqa puxta asas salidu."

Shöhret zakirning bu sözi chet'ellerdiki weziyet analizchilirining jiddiy diqqitini qozghidi.

Dunya Uyghur qurultiyi xitay ishliri komitétining mudiri ilshat hesen ependi söhret zakir tilgha alghan "Terbiyelinip ishqa orunlashturulmaqchi bolghan 200 ming éshincha emgek küchining Uyghurlarni körsitidighanliqi" ni, ularning lagérlargha qamilip eslidiki yerliridin ayrilghan, yerliri xitay köchmenlirige bölüp bérilgen we özliri yersiz, ishsiz qalghan yézilardiki Uyghur déhqanliri ikenlikini ilgiri sürdi.

Gollandiyediki siyasiy pa'aliyetchi we analizchi asiye Uyghur xanim bu heqte toxtilip, xitay hökümitining asasliq yoqitish nishanining Uyghurlar ikenlikini bildürdi.

Asiye Uyghur xanim xitay da'iriliri tilgha alghan atalmish "Éshincha emgek küchliri" ning esli menbesining 2017-yildin buyan Uyghur diyarida élip bérilghan "Qayta terbiyilesh" namida lagérlargha solan'ghan 1 milyondin 3 milyon'ghiche Uyghur qatarliq yerlik xelqler ikenlikini, ularni mejburiy emgekke séliniwatqan "Zamaniwi qullargha aylandurulghan Uyghurlar" dep qarashqa bolidighanliqini tekitlep ötti.

"Shinjang géziti" ning xewiride shöhret zakir mundaq dégen: "Bu yil aptonom rayonimiz qatnash, suchiliq, énérgiye qatarliq muhim, zor qurulushlar we ul eslihe qurulushlirini zor küch bilen algha siljitqanliqtin binakarliq-qurulush sahesining téxnikiliq ishchilargha bolghan éhtiyaji zoraydi. Bolupmu da'imlashqan yuqumning aldini élish-tizginlesh yéngi weziyitide herqaysi jaylar, herqaysi alaqidar tarmaqlar siyasiy yükseklikni heqiqiy östürüp, yenimu ilgiriligen halda yuqiri süpetlik ishqa orunlashturushni ilgiri sürüshke paydiliq terbiyelep ishqa orunlashturush méxanizmini takamullashturup, yézilardiki artuq emgek küchlirini yötkep ishqa orunlashturushni zor küch bilen ilgiri sürüp, yuqumning aldini élish-tizginlesh we iqtisad, jem'iyet tereqqiyatining qosh ghelibisini qolgha keltürüsh üchün yéngi töhpe qoshushi kérek."

Ilshat hesen ependi xitay da'irilirining bir tereptin Uyghurlarni "Qayta terbiyilep ishqa orunlashturush" namida tarqaqlashturup, rayonda xitay hökümiti arzu qilghandek muqimliq weziyitini barliqqa keltürüshke urunuwatqanliqini, yene bir tereptin Uyghurlarni assimilyatsiye qilish we xitaylashturush nishanigha yetmekchi boluwatqanliqini bildürdi.

Asiye xanim söhret zakir tekitlewatqan "3 Yilda 200 ming éshincha emgek küchini terbiyilep ishqa orunlashturush" pilanining xitay hökümitining dawalghush éghir boluwatqan iqtisadini eslige keltürüshni nishan qiliwatqanliqini, shuning bilen bir waqitta yene xelq'araning diqqitini lagérlargha qamalghan Uyghurlardin yiraqlashturushni közlewatqanliqini tekitlidi.

Toluq bet