Shöhret zakirning myunxéndiki bir tughqan qérindashliri d u q re'isi dolqun eysagha hujum qildi

Ixtiyariy muxbirimiz ekrem
2020-01-13
Élxet
Pikir
Share
Print
D u q re'isi dolqun eysa ependi yawropa parlaméntida.
D u q re'isi dolqun eysa ependi yawropa parlaméntida.
RFA/Ekrem

12-Yanwar shöhret zakirning gérmaniyediki qérindashliri d u q re'isi dolqun eysagha biwasite hujum qilghan.

Axirqi aylardin buyan xitay hökümiti "Yer shari waqti géziti" qatarliq teshwiqat qoralliri arqiliq özlirining jaza lagérliri siyasitini aqlash, muhajirettiki Uyghurlarning guwahliq we qarshiliq heriketlirini qarilashni kücheytmekte idi. Bolupmu jaza lagérlirigha qarshi jiddiy heriket élip bériwatqan d u q we uning re'isi dolqun eysa ependini hujum nishanigha aylandurup, bu heqte arqa-arqidin maqaliler élan qilip kelgen idi. 12-Yanwar küni Uyghur aptonom rayonluq hökümetning qorchaq re'isi shöhret zakirning myunxéndiki biwasite tughqanliri jama'et sorunida d u q re'isige biwasite hujum qilghan.

Igilishimizche, 12-yanwar küni d u q re'isi dolqun eysa bashliq myunxéndiki Uyghur jama'iti nurmemet isimlik bir kishining ghuljada qaza qilghan apisining rohigha qur'an tilawet qilish üchün uning öyige jem bolghan. Bu sorun'gha chaqirilmighan méhmanlardin Uyghur aptonom rayonining qorchaq re'isi shöhret zakirning myunxénda yashawatqan singlisi méhriban zakir we uning yoldishi ghalipmu daxil bolghan.

Sorundin taraydighan waqitta shöhret zakirning singlisi méhriban zakir dolqun eysaning aldini tosup: "Sen shöhret zakirni tilgha alghuchi bolma, uning uruq-tughqanlirini tilgha alghuchi bolma, shöhret zakirni 'xa'in' dégüchi bolma, sen wetendiki uruq-tughqanliringni oylap qoy!" dégen. Dolqun eysa uninggha reddiye qayturushi haman méhriban zakirning yoldishi ghalip zakir étilip kélip, dolqun eysani urmaqchi bolghan. Jama'et derhal arigha chüshüp ajritiwalghan.

D u q re'isi dolqun eysa ependi bu weqe toghrisida toxtalghanda xitayning her türlük hujumlirigha idiyeside teyyarliq barliqi, lékin shöhret zakirning ewladlirining ammiwi bir sorunda özige hujum qilishqa pétinalishini oylapmu baqmighanliqini bayan qildi.

Biz bu toghrisida méhriban zakir we uning yoldishi ghalipning közqarashlirini élish üchün ulargha köp qétim téléfon qilip alaqilishishke tirishqan bolsaqmu, lékin mumkin bolmidi.

Bu weqe Uyghur jama'itini hem heyran qaldurghan hem ghezeplendürgen. Neq meydan shahitliridin "Ilham toxti guruppisi" ning re'isi enwerjan ependi bu heqte toxtalghanda "Bu hujum yalghuz dolqun eysaghila emes, belki Uyghur milliy herikitige, sherqiy türkistan xelqige qilin'ghan hujum" dégenlerni tilgha aldi.

Yawropa sherqiy türkistan birliki teshkilatining re'isi esqerjan ependi bu xususta pikir bayan qilghanda shöhret zakirning biwasite tughqanlirining bu sorun'gha meqsetlik kelgenlikini, ularning uyulush uyaqta tursun, öz millitige zulum séliwatqan shöhret zakirdek birini aqlashqa jür'et qilishidin heyranliq hés qilghanliqini ipadilidi.

Gérmaniyediki Uyghur jama'itining ilgiri sürüshiche, myunxénda uzun yillardin buyan shöhret zakirning zulpiye zakir, méhriban zakir qatarliq singilliri yashawatqan bolup, texminen 2010-yilliri zulpiye zakir ürümchige bérip sehnilerde "Shinjang yaxshi jay" dégen naxshini orundap qaytip kelgendin kéyin myunxéndiki Uyghur jama'iti uni arisidin siqip chiqarghan we ular bilen bolghan alaqisini pütünley üzgen. Uyghur jama'itidin ayrilip yétim qalghanliqning sewebini dolqun eysadin körgen bu jemet kishiliri ichide ghum saqlap kelgen. Némila bolmisun, xitayning milyonlighan Uyghurlarni jaza lagérlirigha qamap qiynashta biwasite rol éliwatqan, Uyghur millitige séliniwatqan barliq zulumlargha eng chong shérik hem qoral boluwatqan qorchaq re'is shöhret zakir muhajirettiki Uyghurlarning neziride 'weten xa'ini, milliy munapiq' hésablinidighan bolup, uni héchkim héchqandaq qilipmu aqliyalmaydiken. Bu qarashni tekitligen diniy zat abdujélil ependi bu hujumning pütün Uyghur millitige qilin'ghan bir hujum bolghanliqini, buni mundaqla ötküzüwétishke bolmaydighanliqini tekitlidi.

D u q re'isi dolqun eysa ependi méhriban zakirning sherqiy türkistan xelqining düshminige aylan'ghan shöhret zakirni aqlap otturigha chiqishidin ejeblen'gen bolsimu, emma xitayning her türlük tehditlirige bash egmeydighanliqini, Uyghur xelqining düshmenliridin chégra ayrishni bilishi lazimliqini eskertti. Sherqiy türkistan ölimalar birlikining mu'awin re'isi turghunjan alawudun ependimu bu heqte öz qarashlirini bildürüp ötti.

Toluq bet