19-Қурултай мәзгилидики җиддийчилик сақчиларниму алақзадә қиливәткән

Мухбиримиз шөһрәт һошур
2017-10-23
Share
qeshqer-saqchi-herbiy-kocha-charlash.jpg Хитай қораллиқ күчлириниң коча чарлап йүргән көрүнүши. 2014-Йили 23-июл, қәшқәр.
ImagineChina

Аңлиғучилиримиздин бир бүгүн радийомизға учур йоллап, 19‏-қурултай ечилған күндин буян уйғур аптоном райони вәзийитини җиддий бир әнсизчилик қаплиғанлиқи, сақчиларниң алақзадилик ичидә вәзипә өтәватқанлиқи, бәзи аһалиләрниң туруватқан мәһәллисидин, һәтта бәзилириниң туруватқан қорусидин сиртқа чиқмаслиққа буйрулғанлиқини мәлум қилди. Мухбиримизниң бу учурни дәлилләш үчүн елип барған телефон зиярәтлири давамида 20 дин артуқ сақчихана хадимидин һечбири соралған соалларға җаваб берәлмиди. Уларниң үркүп яки чечилип қайтурған җаваплири, вәзипә өтәватқан сақчиларниңму алақзадә кәйпиятта икәнликини ашкарилиди.

Радиомизға кәлгән инкаста дейилишичә, «йепиқ тәрбийиләш мәркәзлири» аһалиләргә елип кәлгән паракәндичиликниң үстигә 19‏-қурултайниң бихәтәрлик тәдбирлири қетилип уйғур райониниң иҗтимаий вәзийитидә адәттин ташқири бир җиддийчиликни шәкилләндүргән. Шәһәрләрдә бәзи аһалиләр комитети аһалиләрниң хизмәт вә тиҗарәттин башқа иҗтимаий паалийәтлиригә йол қоймиған. Хизмәт орнидин удул өйигә қайтиш, хизмәттин сиртқи вақитлирида сиртқа чиқмаслиқини буйруған. 

Иҗтимаий таратқулардики бәзи учурларда дейилишичә, бәзи муқим иш орни болмиған аһалиләр күнбойи өйдин сиртқа чиқмаслиқ вә өйигә зиярәтчи қобул қилмаслиқ һәққидә агаһландурулған. Бәзи аһалиләр қурултай ахирлашқучә йирақ-йеқин телефон алақисиниму тохтитишқа агаһландурулған. 

Уйғур аптоном райониниң җәнубидики йезиларда бу йилдин башлап, аһалиләр қошнисини 5 минуттин артуқ зиярәт қилиш үчүнму сақчини хәвәрләндүрүш түзүми йолға қоюлған иди. Радийомизға кәлгән бүгүнки инкаста дейилишичә, йезиларда аһалиләр пәсил характери болмиған ишләпчиқиришини тохтитип турушқа буйрулған. Телефонимизни қобул қилған көпинчә сақчи хадимлири соаллиримизға җаваб беришкә петиналмиди. Бәзи сақчилар 19‏-қурултай һәққидики соалимиздин үркиди, бәзилири болса гаңгириди. Бәзи сақчилар, өзлириниң 19‏-қурултай яки вәзийәт һәққидә еғиз ечиш һоқуқи йоқлуқини йошурмиди. Йәнә бәзи сақчилар сәвәпсиз һалда чечилиш вә қайнаш арқилиқ өзлиридики алақзадә кәйпиятни ашкарилиди. 

Мәлум болушичә, даириләр бу қетимқи қурултай мәзгилидә «үчни чиқармаслиқ» йәни «чоң иш чиқармаслиқ, оттураһал ишму чиқармаслиқ, һәтта кичик ишму чиқармаслиқ» тин ибарәт йеңи бир шоарни оттуриға қойған. Ениқлашлиримиз давамида бәзи йеза әмәлдарлириниң кечиләрдә сақчиханиларни зиярәт қилип, «үчни чиқармаслиқ» һәққидә хизмәт мәлумати еливатқанлиқи вә сақчиларға қурултай роһидин доклат бериватқанлиқи ашкариланди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.