Абдурахман: "б б с мухбириға уйғурлар һәққидә сөз қилғанлиқим үчүн вәзипәмдин елип ташландим"

Ихтиярий мухбиримиз һаҗи қутлуқ қадири
2016-01-27
Share
Abduraxman-buxari-pakistan-muhajirlar-jemiyiti-305.jpg Мухбир билән елип берилған сөһбитидә бәзи мәсилиләрдә уйғурлар һәққидә тохталғанлиқи үчүн гилгит хитай муһаҗирлар җәмийитиниң катиплиқидин қалдурулған абдурахман бухари әпәнди.
RFA/Qutluq

2015-Йили 12-авғуст б б с ниң тор бетидә елан қилинған "пакистандики уйғурлар өз мәдәнийитини қандақ сақлаватиду?" намлиқ мақалидә нам шәрипи алаһидә тилға елинған гилгит шәһиридә яшаватқан уйғурлардин абдурахман бухари мухбир билән елип берилған сөһбәттә бәзи мәсилиләрдә уйғурлар һәққидә тохталғанлиқи үчүн гилгит хитай муһаҗирлар җәмийитиниң катиплиқидин қалдурулған.

Игилишимизчә, пакистанниң гилгит шәһиридики хитай муһаҗирлар җәмийитиниң катипи абдурахман бухари өткән йили авғуст ейида гилгит шәһиригә саяһәткә кәлгән әнглийә б б с агентлиқиниң орду тилидики мухбири шумаила җаффирейниң пакистандики уйғурлар һәққидә сориған бәзи соаллириға җаваб бәргәндә пакистан даирилириниң пакистанда һиҗрәттә яшаватқан уйғурларниң хитай һөкүмитигә қарши намайиш қилишиға һәргиз йол қоймайдиғанлиқини әскәрткәнлики үчүн гилгит хитай муһаҗирлар җәмийити рәһбәрлики уни: "хитай һөкүмитигә қарши сөз қилди" дәп әйибләп катиплиқ вәзиписидин еливәткән. Зияритимиз қобул қилған һазир гилгит шәһиридә олтурушлуқ абдурахман бухари бу һәқтә тохталди.

Биз гилгит шәһиридики хитай муһаҗирлар җәмийитиниң рәиси ағихан султанниң ишханисиға телефон қилип, бу һәқтә учур игилимәкчи болдуқ. Бирақ,телефонимизни қобул қилған мәзкур җәмийәт мәсуллиридин бири алибаба ағиған султанниң исламабадтики хитай әлчиханисиға чағанлиқ зияпәткә кәткәнликини, катип абдурахман бухарини вәзиписидин қалдурулуш буйруқиниң исламабадтики хитай әлчиханисидин кәлгәнликини илгири сүрди.

Биз алибабаниң бу һәқтики учуриға асасән исламабадтики хитай әлчиханисиға бир қанчә қетим телефон қилип бу һәқтә мәлуматқа игә болмақчи болған болсақму, бирақ әлчихана телефонимизни пәқәтла қобул қилмиди.

Гилгит хитай муһаҗирлар җәмийитиниң мәсуллиридин бири болған алибаба мәзкур җәмийәткә пакистан исламабадтики хитай әлчиханисиниң пул бериш мәқсити вә һәр йили берилидиған пулниң сани һәққидиму қисқичә тохталди.

26-январ пакистандики нопузлуқ гезитләрдин бири болған орду тилидики "җаһан пакистан" гезитидә вә шундақла инглиз тилидики хәвәрләрдиму гилгит шәһиридики уйғурларға мунасивәтлик хитай муһаҗирлар җәмийитиниң банка һесабатиниң мәлум сәвәбләр түпәйлидин вақтинчә қанун даирилириниң тәлипи бойичә тоңлитилғанлиқи елан қилинған.

Биз мәзкур җәмийәт һесабатиниң тоңлитилғанлиқи һәққидә гилгит хитай муһаҗирлар җәмийитиниң мәсули алибаба билән сөһбәт елип бардуқ.

Зияритимизни қобул қилған гилгит хитай муһаҗирлар җәмийитиниң сабиқ катипи абдурахман бухари бу җәмийәтниң иқтисадиға болған бәзи бир наразилиқлирини ипадиләп йеқинда өзиниң қанун органлириға әрз сунғанлиқини илгири сүрди.

Хитай ахбарат васитилириниң 15-январдики хәвиридә баян қилинишичә, хитай һөкүмити бу қетим үрүмчидә өткүзүлгән аптоном районлуқ сиясий кеңәш 11-нөвәтлик 4-омумий йиғиниға тунҗи қетим чәтәлләрдә яшаватқан бир қисим уйғурларни "шинҗаңлиқ муһаҗирлар" салаһийитидә тәклип қилған болуп, буларниң ичидә "пакистан-хитай муһаҗирлири сода бирләшмиси"ниң мәсули абдулқәюм мәҗидниң намиму тилға елинған.

Юқириқи аваз улинишидин тәпсилатини аңлаң.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт