Abduraxman: "B b s muxbirigha Uyghurlar heqqide söz qilghanliqim üchün wezipemdin élip tashlandim"

Ixtiyariy muxbirimiz haji qutluq qadiri
2016-01-27
Élxet
Pikir
Share
Print
Muxbir bilen élip bérilghan söhbitide bezi mesililerde Uyghurlar heqqide toxtalghanliqi üchün gilgit xitay muhajirlar jem'iyitining katipliqidin qaldurulghan abduraxman buxari ependi.
Muxbir bilen élip bérilghan söhbitide bezi mesililerde Uyghurlar heqqide toxtalghanliqi üchün gilgit xitay muhajirlar jem'iyitining katipliqidin qaldurulghan abduraxman buxari ependi.
RFA/Qutluq

2015-Yili 12-awghust b b s ning tor bétide élan qilin'ghan "Pakistandiki Uyghurlar öz medeniyitini qandaq saqlawatidu?" namliq maqalide nam sheripi alahide tilgha élin'ghan gilgit shehiride yashawatqan Uyghurlardin abduraxman buxari muxbir bilen élip bérilghan söhbette bezi mesililerde Uyghurlar heqqide toxtalghanliqi üchün gilgit xitay muhajirlar jem'iyitining katipliqidin qaldurulghan.

Igilishimizche, pakistanning gilgit shehiridiki xitay muhajirlar jem'iyitining katipi abduraxman buxari ötken yili awghust éyida gilgit shehirige sayahetke kelgen en'gliye b b s agéntliqining ordu tilidiki muxbiri shuma'ila jaffiréyning pakistandiki Uyghurlar heqqide sorighan bezi so'allirigha jawab bergende pakistan da'irilirining pakistanda hijrette yashawatqan Uyghurlarning xitay hökümitige qarshi namayish qilishigha hergiz yol qoymaydighanliqini eskertkenliki üchün gilgit xitay muhajirlar jem'iyiti rehberliki uni: "Xitay hökümitige qarshi söz qildi" dep eyiblep katipliq wezipisidin éliwetken. Ziyaritimiz qobul qilghan hazir gilgit shehiride olturushluq abduraxman buxari bu heqte toxtaldi.

Biz gilgit shehiridiki xitay muhajirlar jem'iyitining re'isi aghixan sultanning ishxanisigha téléfon qilip, bu heqte uchur igilimekchi bolduq. Biraq,téléfonimizni qobul qilghan mezkur jem'iyet mes'ulliridin biri alibaba aghighan sultanning islam'abadtiki xitay elchixanisigha chaghanliq ziyapetke ketkenlikini, katip abduraxman buxarini wezipisidin qaldurulush buyruqining islam'abadtiki xitay elchixanisidin kelgenlikini ilgiri sürdi.

Biz alibabaning bu heqtiki uchurigha asasen islam'abadtiki xitay elchixanisigha bir qanche qétim téléfon qilip bu heqte melumatqa ige bolmaqchi bolghan bolsaqmu, biraq elchixana téléfonimizni peqetla qobul qilmidi.

Gilgit xitay muhajirlar jem'iyitining mes'ulliridin biri bolghan alibaba mezkur jem'iyetke pakistan islam'abadtiki xitay elchixanisining pul bérish meqsiti we her yili bérilidighan pulning sani heqqidimu qisqiche toxtaldi.

26-Yanwar pakistandiki nopuzluq gézitlerdin biri bolghan ordu tilidiki "Jahan pakistan" gézitide we shundaqla in'gliz tilidiki xewerlerdimu gilgit shehiridiki Uyghurlargha munasiwetlik xitay muhajirlar jem'iyitining banka hésabatining melum sewebler tüpeylidin waqtinche qanun da'irilirining telipi boyiche tonglitilghanliqi élan qilin'ghan.

Biz mezkur jem'iyet hésabatining tonglitilghanliqi heqqide gilgit xitay muhajirlar jem'iyitining mes'uli alibaba bilen söhbet élip barduq.

Ziyaritimizni qobul qilghan gilgit xitay muhajirlar jem'iyitining sabiq katipi abduraxman buxari bu jem'iyetning iqtisadigha bolghan bezi bir naraziliqlirini ipadilep yéqinda özining qanun organlirigha erz sun'ghanliqini ilgiri sürdi.

Xitay axbarat wasitilirining 15-yanwardiki xewiride bayan qilinishiche, xitay hökümiti bu qétim ürümchide ötküzülgen aptonom rayonluq siyasiy kéngesh 11-nöwetlik 4-omumiy yighinigha tunji qétim chet'ellerde yashawatqan bir qisim Uyghurlarni "Shinjangliq muhajirlar" salahiyitide teklip qilghan bolup, bularning ichide "Pakistan-xitay muhajirliri soda birleshmisi"ning mes'uli abdulqeyum mejidning namimu tilgha élin'ghan.

Yuqiriqi awaz ulinishidin tepsilatini anglang.

Toluq bet