Ablimit exmettoxti damolla hajim: “Qan bilen kirgen étiqad jan bilen chiqidu!”

Igilishimizche,  exmettoxti damolla hajimning béyjingda chaqirilghan ikki yighin mezgilide otturigha qoyghan teklip-pikirliri Uyghur élidin kelgen bashqa wekillerning teklipliri bilen roshen sélishturma hasil qilghan.

Közetküchilerning qarishiche, uning xitay merkiziy hökümitige sun'ghan milliy we diniy mesililer toghrisidiki teklipliri xéli zor derijide Uyghur élidiki yerlik xelqning awazini eks ettürgen.

11-Mart küni ablimit  exmettoxti damolla hajim teklip boyiche béyjingdiki merkiziy xelq radi'o istansisi Uyghur bölümining “Junggogha nezer” programmisida özining merkezge sun'ghan teklip-pikirlirini tepsiliy sherhligen.

U sözide, xitay hökümiti tekitlewatqan “Muqimliq we inaq jem'iyet” berpa qilish üchün aldi bilen az sanliq milletler rayonida yerlik xelqlerning menpe'itini kapaletke ige qilidighan milliy siyasetning bolushini ilgiri sürgen.

Ablimit damolla hajim islam dinigha étiqad qilidighan Uyghur xelqining ezeldin ilim öginish we perzentlirini ilimlik qilip terbiyilesh rohigha ige ikenlikini, ularning pen-ma'aripni we tinchliqni söyidighanliqini alahide tekitligen. Shuning bilen bir waqitta yene, döletning qanun we belgilimiliri boyiche Uyghur élidiki yerlik xelq perzentlirining ishqa orunlishishini kapaletke ige qilishni telep qilghan.

U Uyghur élining herqaysi sheherliride jiddiy quruluwatqan ahaliler olturaq rayonliri heqqide toxtilip, köp sanni teshkil qilidighan yerlik xelqning diniy pa'aliyet éhtiyajliri nezerge élinmighanliqini, yéngi meschit sélishqa ruxset qilinmighanliqini, étiqadchi ammining normal diniy ibadetlirini dawamlashturushqa amalsiz qalghanliqini ilgiri sürgen. U sözide yene, xelqning yéngi olturaq rayonlargha öz étiqadi bilen bille köchidighanliqini, étiqadning qan bilen kirip jan bilen chiqidighanliqini, buninggha nisbeten hökümet orunlirining éhtiyatchanliq bilen mu'amile qilishining zörürlükini tekitligen. U Uyghur aptonom rayonidiki ayrodromlarda tamaka chékidighanlar üchün mexsus jay ajritilghan bolsimu, lékin musulman ammisi üchün namaz oquydighan héchqandaq jayning yoqluqini tilgha alghan.

Ablimit damolla hajim sözining axirida, Uyghur élining jenubiy rayonlirida, bolupmu özi yashawatqan xoten rayonida dawalinish üchün doxturxanigha kirgen musulman bimarlarning doxturxanida namaz oqumasliq heqqidiki kélishimnamige qol qoyushqa mejbur boluwatqanliqini tilgha alghan. U yene her derijilik hökümet orunliridin qanun boyiche yerlik xelqning diniy we milliy örp-adetlirige hörmet qilishni shundaqla din'gha étiqad qilidighan ammining héssiyati we ghururigha tegmeslikni telep qilghan.

Yuqiridiki awaz ulinishidin bu heqtiki programmimizning dawamini anglaysiler.