On dölettin kelgen Uyghur ammiwi teshkilatlirining mes'ulliri Uyghur musapirlardin hal soridi

Dunyaning her qaysi jayliridin kelgen Uyghur ammiwi teshkilatlirining mes'ulliri we bezi Uyghurlar alahide qeyserige bérip, qeyseridiki Uyghur musapirlardin hal soridi. 14-Iyul firansiyening paytexti parizhda chaqirilghan 5-nöwetlik dunya Uyghur qurultiyi axirlashqandin kéyin, bezi döletlerdin kelgen Uyghur wekiller istanbulda chaqirilghan 8-nöwetlik dunya sherqiy türkistan qérindashlar uchrishishigha qatnishish üchün istanbulgha kelgen idi. Bu wekiller arqa-arqidin türkiyening qeyseri shehirige bérip Uyghur musapirlardin hal soridi. 7-Ayning 15-küni bashlighan bu hal sorash pa'aliyiti bügünmu dawamlashmaqta. Biz bu heqte köz qarishini igilesh üchün sherqiy türkistan medeniyet we hemkarliq jem'iyiti re'isi séyit tümtürk ependi, dunya Uyghur qurultiyining yaponiye wekili turmemet hashim ependi we Uyghur musapirlardin dilshat islam ependiler bilen téléfon söhbiti élip barduq.

Séyit tümtürk ependi 15-iyul künidin bügün'giche yaponiye, awstraliye, norwégiye we ottura asiya türkiy jumhuriyetliri qatarliq 10 etrapida dölettin kelgen Uyghurlarning qeyseridiki Uyghur musapirlardin hal sorighanliqini ilgiri sürdi. U süzide Uyghur musapirlarning mesilisining peqetla türkiyediki sherqiy türkistan ammiwi teshkilatlirining mesilisi emeslikini, pütün dunyadiki Uyghur teshkilatlirining mesilisi ikenlikini, bu heqte, kelgen teshkilat mes'ulliri bilen muzakire élip barghanliqini tekitlidi.

Dunya Uyghur qurultiyining yaponiyede turushluq wekili turmemet hashim ependi, özining Uyghur musapirlardin hal sorash we ularning heqiqiy ehwalini igilesh üchün qeyserige barghanliqini bayan qildi.

Awstraliyedin kelgen gülmire xanim musapir Uyghurlar bilen hazir körüshüwatqanliqini, xuddi yéqin uruq-tughqanlirini körgendek bolghanliqini bayan qildi.

Qeyseride turuwatqan Uyghur musapirlardin dilshat ependi qeyseridiki Uyghurlarning eng chong qéyinchiliqining wetendashliq mesilisi ikenlikini bayan qildi.

Ishenchlik yerlerdin igiligen melumatlargha asaslan'ghanda, 2014-2015-yillirida tayland we malayshiya arqiliq kelgen 7 ming etrapida Uyghur musapirni türkiyege qobul qilghan. Bularning ichidin 2 ming etrapida Uyghur türkiyening qeyseri wilayitide döletning qoru jayida turmaqta. Bular türkiye hökümitining baldurraq wetendashliq bérishini telep qilmaqta.