Atush aghuda 4 neper wezipisiz diniy zat ikki yighin mezgilide soliwélin'ghan

Anglighuchilirimizdin birining élxet arqiliq uchur yetküzüshiche, béyjingda échilghan ikki yighinning bixeterliki munasiwiti bilen, atushta élip bérilghan tutqun qilish herikitide sabiq mehbuslar bilen birlikte bir türküm wezipisiz diniy zatlarmu tutqun qilin'ghan. Muxbirimizning atushtiki kent sékrétarliridin ehwal igilishi dawamida, atushning aghu yéza yuqiri mehelle kentidinla 4 neper wezipisiz diniy zatning tutqun qilin'ghanliqi, bularning ichide eysa qarining téxi yéqindila wezipisidin qaldurulghan, emma birlikseptin téxi ma'ash éliwatqan biri ikenliki ashkarilandi.

Melum bolushiche, xitay da'iriliri özlirining Uyghur rayonidiki zerbe bérish nishanigha yene bir yéngi katégoriyeni qatqan. Bu, belgilik diniy melumati bolghan, emma meschitlerde wezipe almighan yaki bérilmigen diniy zatlardur. Ötkende kuchardin igiligen uchurlirimizda, yézigha chüshken kadirlarning 6 xil kishilerni nuqtiliq közitiwatqanliqi, bularning biri wezipisiz diniy zatlar ikenliki ashkarilan'ghan.

Radiyomizgha atushning nöwettiki siyasiy weziyiti heqqide mektup yollighan anglighuchimizning birining bayan qilishiche, atushta dawam qilghan ikki yighin mezgildiki tutqun qilish herikitide wezipisiz diniy zatlarmu soliwélin'ghan. Mezkur mektupta, soliwélin'ghan wezipisiz diniy zatlarning sani we nöwettiki ehwali heqqide melumat bérilmigen؛ peqet ularning diniy melumati bolushtin bashqa, xitay dölitini endishige salghudek birer ish ‏- herikiti yoqluqi eskertilgen. Biz atushning aghu yézisigha téléfon qilghinimizda, bir kent sékrétari, aghuning bir kentidinla 4 neper wezipisiz diniy zatning tutqun qilin'ghanliqini delillidi.

Radiyomizgha kelgen mektupta bayan qilinishiche, da'iriler yéqinqi yillargha qeder chet'elde oqup kelgen we yaki chet'elde bir mezgil turup kelgen diniy melumatliq kishilerni xitayning dölet bixeterlikige xewp dep qarap kelgen, emma bu qétimqi wezipisiz diniy zatlarni tutqun qilishta xitay özliri terbiyiligen, yeni xitay özi achqan diniy mektep we kurslarda oqup yétilgen diniy zatlarmu oxshashla tutqun bolghan. Yuqiriqi kent sékrétarining bayan qilishiche, tutqunlardin biri yéqinda wezipisidin qaldurulghan bolsimu, téxi birlik septin ma'ash éliwatqan iken.

Mektupta déyilishiche, nöwette wezipisiz diniy zatlar, Uyghur jama'etchilikining yölishi, yeni Uyghur sodiger we karxanichilarning köngül bölüshi bilen tirikchilik qilmaqta؛ emma xitay da'irilirining dinni dölet bixeterlikige tehdit dep qarishi sewebidin, ularning diniy pa'aliyitila emes, musteqil tirikchilik yolimu dexlige uchrighan. Kent sékrétarining ashkarilishiche, ikki yighin axirlashqandin kéyin, soliwélin'ghan wezipisiz diniy zatlarning bir qismini ularni ishlitiwatqan Uyghur karxanichilar, kapaletname yézip bérish arqiliq qamaqxanidin qutuldurup chiqqan.

Atushta we Uyghur rayonining bashqa jaylirida ikki yighin mezgilide wezipisiz diniy zatlardin jem'iy qanche kishining tutulghanliqi we ulardin qanchilikining qoyup bérilgenliki hazirche melum emes. Emma aqtuning aghu yéza yuqiri mehelle kentidin soliwélin'ghan 4 wezipisiz diniy zattin, bir nepirining ikki yighin axirlashqandin kéyinmu hélihem qamaqta yétiwatqanliqi melum.

Yuqiridiki awaz ulinishidin muxbirimizning bu heqte teyyarlighan programmisini anglighaysiler.