د ئۇ ق ئالىي رەھبەرلىرى شىۋېتسىيەدە چاقىرىلغان يىغىندا يېرىم يىللىق پائالىيەت پىلانىنى بېكىتتى

دۇنيا ئۇيغۇر قۇرۇلتىيى رەھبەرلىك ھەيئىتى يىغىن چاقىرىپ بۇ يىل 7-ئايدىن كېلەر يىلى 3-ئايغىچە بولغان خىزمەت پىلانى ھەققىدە مۇزاكىرە ئېلىپ بېرىپ پائالىيەت پىلانىنى بېكىتتى.

6-ئاينىڭ 14-كۈنىدىن 17-كۈنىگىچە شىۋېتسىيە ئۇيغۇر كومىتېتى قۇرۇلغانلىقىنىڭ 10 يىللىقىنى خاتىرىلەش مۇناسىۋىتى بىلەن ئۇيۇشتۇرۇلغان پائالىيەتكە قاتناشقان دۇنيا ئۇيغۇر قۇرۇلتىيى رەھبەرلىرى بۇ پائالىيەت جەريانىدا بىر يەرگە جەم بولۇپ، د ئۇ ق نىڭ خىزمەت پىلانىنى كۆزدىن كۆچۈردى. ستوكھولمدا د ئۇ ق رەئىسى رابىيە قادىر خانىمنىڭ رىياسەتچىلىكىدە چاقىرىلغان بۇ يىغىنغا د ئۇ ق نىڭ يۇقىرى دەرىجىلىك رەھبەرلىرىدىن سېيىت تۈمتۈرك، دولقۇن ئەيسا، قەھرىمان غوجامبەردى، دىلشات رىشىت، ئەسقەر جان، تۇرغۇنجان ئالاۋۇددىن، ئەسقەر جان ۋە نۇرمەمەت روزاخۇن قاتارلىقلار قاتناشتى. يىغىنىنىڭ ئېچىلىش نۇتقىنى د ئۇ ق رەئىسى رابىيە قادىر خانىم قىلدى. ئارقىدىن د ئۇ ق ئىجرائىيە كومىتېتى مۇدىرى دولقۇن ئەيسا ئەپەندى يىغىننىڭ كۈن تەرتىپىنى ئوتتۇرىغا قويغاندىن كېيىن يىغىننىڭ كۈنتەرتىپنى چۆرىدىگەن ھالدا مۇزاكىرە ئېلىپ بېرىلغان.

يىغىندا نۇقتىلىق ھالدا 5-ئىيۇل ئۈرۈمچى ۋەقەسىنىڭ 4-يىللىقى مۇناسىۋىتى بىلەن دۇنيانىڭ ھەرقايسى جايلىرىدا ئېلىپ بېرىلىدىغان پائالىيەتلەرنىڭ تەييارلىق خىزمىتىنىڭ ئەمەلىيلىشىش ئەھۋالى ۋە ئېلىپ بېرىلىدىغان كونكرېت پائالىيەتلەر ھەققىدە مۇزاكىرە ئېلىپ بېرىلىپ بېكىتىلگەن. بۇ ھەقتە تېخىمۇ تەپسىلىي مەلۇمات ئېلىش ئۈچۈن د ئۇ ق ئىجرائىيە كومىتېتى مۇدىرى دولقۇن ئەيسا ئەپەندى بىلەن تېلېفون سۆھبىتى ئېلىپ باردۇق. ئۇ يىغىندا ماقۇللانغان 7-ئايدىن 2014-يىلى 3-ئايغىچە ئامېرىكا، ياۋروپا دۆلەتلىرى، كانادا ۋە باشقا دۆلەتلەردە ئېلىپ بېرىلىدىغان پائالىيەتلەر ھەققىدىكى پىلان ھەققىدىمۇ مەلۇمات بەردى.