Дуня уйғур қурултийи һәйити үлкү учақлири мәркизигә рәһмәт ейтти

Ихтиярий мухбиримиз әркин тарим
2014.12.24
Share on WhatsApp
Share on WhatsApp
oljay-kilawuz-duq.JPG Шәрқий түркистан мәдәнийәт вә һәмкарлиқ җәмийити әнқәрә шөбиси башлиқи хәйруллаһ әпәндигил үлкү учақлири маарип вә мәдәнийәт фонди җәмийити рәиси олҗай килавуз әпәндигә доппа соға қилди. 2014-Йили декабир, түркийә.
RFA/Erkin Tarim

Шәрқий түркистан мәдәнийәт вә һәмкарлиқ җәмийити әнқәрә шөбиси башлиқи хәйруллаһ әпәндигил башчилиқидики бир өмәк әнқәрәдә үлкү учақлири маарип вә мәдәнийәт фонди җәмийити рәиси олҗай килавуз әпәнди билән ишханисида учришиш елип барди.

Дуня уйғур қурултийи рәиси рабийә қадир ханимниң йолйоруқи билән, пүтүн дуня уйғурлириға вакалитән тәшәккүрлирини билдүрүш үчүн кәлгәнликини тилға алған хәйруллаһ әпәндигил: “тайландта тутуп турулуватқан 300 нәпәр уйғурниң түркийәгә елип келиниши үчүн үлкү учақлири маарип вә мәдәнийәт фонди җәмийити башлиқи олҗай килавуз әпәндиниң 2014-йили 5-декабирда мәхсус ахбарат елан қилиш йиғини чақириш арқилиқ башлиған имза топлаш сәпәрвәрлики вә иҗтимаий таратқуларда башланған қәләм сундуруш сәпәрвәрликиниң түркийәниң һәммила йеридә барғанчә кеңийип, техиму күчәйгән шәкилдә давамлишиватқанлиқини көрмәктимиз. Буни түркийә хәлқиниң уйғурларни техиму яхши тонуши җәһәттин интайин үнүмлүк вә мәнилик һәрикәт болди, дәп қараймиз. Бизниң үмидимиз, әгәр хитайға қайтуруветилгән тәқдирдә еғир хәвпләргә дучар болуш еһтимали болған тайландтики 300 нәпәр уйғур түрклириниң балдуррақ қутқузуп қелиниши үчүн барлиқ васитиләрни һәрикәткә селиштин ибарәттур” деди.

Хәйруллаһ әпәндигил тәшәккүр сөзидә йәнә, “уйғур мәсилиси ялғуз тайландтики 300 нәпәр уйғур түрклирини қутқузуп қилиш биләнла һәл болмайду. Үлкү учақлириға охшаш түркийәниң барлиқ аммиви тәшкилатлар түркийә хәлқини һәрикәткә селиши лазим, түркийә һөкүмитиму хитай билән болған дипломатик мунасивәтлирини ишқа селиш арқилиқ хитайниң бесим сияситини юмшитишқа күч чиқириши керәк” деди.

Үлкү учақлири маарип вә мәдәнийәт фонди җәмийити рәиси олҗай килавузму сөз қилип, “тайландтики уйғур қериндашлиримиз қутқузулуп түркийәгә елип келингәнгә қәдәр хилмухил паалийәтлиримизни үзүлдүрмәй давамлаштуримиз. Һазир уйғур районида қериндашлиримиз хитай һөкүмити тәрипидин 2-синип пуқра муамилиси көрмәктә. Биз бу наһәқчиликниң түгишини вә уйғур қериндашлиримизниңму охшаш һәқ-һоқуққа игә болуп, әркин, инсандәк һаят кәчүрүшини халаймиз. Һәмдә бу арзуйимиз әмәлгә ашқанға қәдәр муҗадилимизни давамлаштуримиз” деди.

Дуня уйғур қурултийи һәйити үлкү учақлири мәркизидики тәшәккүр зияритиниң ахирида улҗай килавуз әпәндигә уйғур кийимлири һәдийә қилди вә дуня уйғур қурултийи тәрипидин һазирланған кишилик һоқуқ дәпсәндичилики доклатини тәқдим қилди.

Тайланд қатарлиқ җайлардики уйғур түрклириниң қутқузуп қилиниши үчүн башлитилған имза топлаш сәпәрвәрлики түркийәниң барлиқ вилайәт шәһәр вә наһийәлиридә тохтимай давамлашмақта. Топлинидиған омумий имза саниниң милйондин ешип кетиши мөлчәрләнмәктә. Бу һәқтә уйғур зиялийси азадҗан буғраму өз қарашлирини баян қилди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.