Dunya Uyghur qurultiyi hey'iti ülkü uchaqliri merkizige rehmet éytti

Ixtiyariy muxbirimiz erkin tarim
2014.12.24
oljay-kilawuz-duq.JPG Sherqiy türkistan medeniyet we hemkarliq jem'iyiti enqere shöbisi bashliqi xeyrullah ependigil ülkü uchaqliri ma'arip we medeniyet fondi jem'iyiti re'isi oljay kilawuz ependige doppa sogha qildi. 2014-Yili dékabir, türkiye.
RFA/Erkin Tarim

Sherqiy türkistan medeniyet we hemkarliq jem'iyiti enqere shöbisi bashliqi xeyrullah ependigil bashchiliqidiki bir ömek enqerede ülkü uchaqliri ma'arip we medeniyet fondi jem'iyiti re'isi oljay kilawuz ependi bilen ishxanisida uchrishish élip bardi.

Dunya Uyghur qurultiyi re'isi rabiye qadir xanimning yolyoruqi bilen, pütün dunya Uyghurlirigha wakaliten teshekkürlirini bildürüsh üchün kelgenlikini tilgha alghan xeyrullah ependigil: “Taylandta tutup turuluwatqan 300 neper Uyghurning türkiyege élip kélinishi üchün ülkü uchaqliri ma'arip we medeniyet fondi jem'iyiti bashliqi oljay kilawuz ependining 2014-yili 5-dékabirda mexsus axbarat élan qilish yighini chaqirish arqiliq bashlighan imza toplash seperwerliki we ijtima'iy taratqularda bashlan'ghan qelem sundurush seperwerlikining türkiyening hemmila yéride barghanche kéngiyip, téximu kücheygen shekilde dawamlishiwatqanliqini körmektimiz. Buni türkiye xelqining Uyghurlarni téximu yaxshi tonushi jehettin intayin ünümlük we menilik heriket boldi, dep qaraymiz. Bizning ümidimiz, eger xitaygha qayturuwétilgen teqdirde éghir xewplerge duchar bolush éhtimali bolghan taylandtiki 300 neper Uyghur türklirining baldurraq qutquzup qélinishi üchün barliq wasitilerni heriketke sélishtin ibarettur” dédi.

Xeyrullah ependigil teshekkür sözide yene, “Uyghur mesilisi yalghuz taylandtiki 300 neper Uyghur türklirini qutquzup qilish bilenla hel bolmaydu. Ülkü uchaqlirigha oxshash türkiyening barliq ammiwi teshkilatlar türkiye xelqini heriketke sélishi lazim, türkiye hökümitimu xitay bilen bolghan diplomatik munasiwetlirini ishqa sélish arqiliq xitayning bésim siyasitini yumshitishqa küch chiqirishi kérek” dédi.

Ülkü uchaqliri ma'arip we medeniyet fondi jem'iyiti re'isi oljay kilawuzmu söz qilip, “Taylandtiki Uyghur qérindashlirimiz qutquzulup türkiyege élip kélin'gen'ge qeder xilmuxil pa'aliyetlirimizni üzüldürmey dawamlashturimiz. Hazir Uyghur rayonida qérindashlirimiz xitay hökümiti teripidin 2-sinip puqra mu'amilisi körmekte. Biz bu naheqchilikning tügishini we Uyghur qérindashlirimizningmu oxshash heq-hoquqqa ige bolup, erkin, insandek hayat kechürüshini xalaymiz. Hemde bu arzuyimiz emelge ashqan'gha qeder mujadilimizni dawamlashturimiz” dédi.

Dunya Uyghur qurultiyi hey'iti ülkü uchaqliri merkizidiki teshekkür ziyaritining axirida uljay kilawuz ependige Uyghur kiyimliri hediye qildi we dunya Uyghur qurultiyi teripidin hazirlan'ghan kishilik hoquq depsendichiliki doklatini teqdim qildi.

Tayland qatarliq jaylardiki Uyghur türklirining qutquzup qilinishi üchün bashlitilghan imza toplash seperwerliki türkiyening barliq wilayet sheher we nahiyeliride toxtimay dawamlashmaqta. Toplinidighan omumiy imza sanining milyondin éship kétishi mölcherlenmekte. Bu heqte Uyghur ziyaliysi azadjan bughramu öz qarashlirini bayan qildi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.