Yene bir putbol cholpini erpat ablekremning lagérda ikenliki melum

Ghuljida ösmür chéghidin tartipla putbol cholpanlirining birige aylan'ghan, talantliq kespiy putbolchi erpat ablekremningmu ötken yili 3-aydin buyan lagérda ikenliki uning türkiyediki yéqin tughqanliri arqiliq delillendi. Erpat, érpan hézimdin kéyin putbolchiliq sahesidin lagérgha élip kétilgenliki melum bolghan ikkinchi kespiy putbolchi hésablinidu.

Erpat ablekrem kespiy putbolchi bolup, uning yéshil meydandiki orni warata, u, bu yil 25 yashqa kirgen bolup, 1994-yili 2-ayning 10-küni tughulghan. Erpat ablekremning yurti ghulja bolup, u ghulja shehiridiki döngmehellide olturushluq idi. Ijtima'iy taratqularda uning 2018-yili 3-aydin bashlap xitayning jaza lagérigha élip kétilgenliki ilgiri sürülmekte.

Erpatning jaza lagérda ikenliki heqqide feyisbok qatarliq ijtima'iy taratqularda uchur tarqatqan muyesser xanim, bizge özining erepatning newre hedisi ikenlikini bildürüp, erpat heqqide özi bilidighan melumatlarni yetküzdi:

Uyghur yash putbol mestanilirining Uyghurche torlargha chaplighan erpatqa munasiwetlik bezi uchurlardin melum bolushiche, erpat 7 yéshidin bashlapla putbol oynashqa bashlighan, bashlan'ghuch mektepke kirgendin kéyin ghulja sheherlik 16-bashlan'ghuch mektepning putbol komandisigha eza bolghan.

U, 10 yéshida, yeni 2004-yili, ghuljidin tallinip shendungda ötküzülgen xitay memliketlik “Ümid longqisi” yash-ösmürler putbol musabiqisige qatnashqan, shuningdin bashlap, mektep komandilirida warata bolup, türlük musabiqilerde öz talantini jari qildurghan, uningdin sirt, ili yultuzi komandisi, ghulja cholpan komandisi, ghulja sheherlik 1-komanda, ghulja qarighay komandisi, shendung luning teyshen putbol mektipi kulubi qatarliq kespiy putbol komandiliri we kulublarda top oynighan.

Erpatning komanda we kulublar bilen qatnashqan musabiqiliri töwendikiche:

• 2004-Yili, shendungda ötküzülgen “Ümid longqisi” memliketlik yash-ösmürler putbol musabiqisi,
• 2010-Yili ötküzülgen 12-qétimliq Uyghur aptonom rayonluq tenterbiye yighini putbol musabiqisi, 2012-yili, shendungda ötküzülgen döletlik yash-ösmürler putbol birleshme musabiqisi (u17 guruppisi),
• 2012-Yilidiki “Turpan pettar'eslihelik yéza-igilik longqisi putbol musabiqisi”, 12-qétimliq “Ittipaq longqisi” putbol musabiqisi, turpan junggo köchme xewerlishish longqisi” shuningdek 2013-yili ürümchide ötküzülgen aptonom rayonluq 2013-yilliq yash-ösmürler putbol birleshme musabiqisi qatarliqlardur.

Erpatning newre hedisi, hazir istanbulda yashawatqan muyesser xanim inisining peqet yaxshi bir putbolchi bolush ghayisi barliqini, uning héchqandaq bir jinayiti bolmisimu, xitay hökümiti barliq Uyghur dangdar we talantliq kishilirini qara qoyuq solawatqan bir shara'itta unimu türkiyediki tughqanliri bilen alaqiliship turghanliqini bahane qilip jaza lagérigha élip ketken bolushi mumkinlikini otturigha qoydi.

Analizchilarning qarishiche, Uyghur millitidin her sahede yétiship chiqqan bigunah insanlarning köplep tutulghanliqi arqimu arqa ashkarilinip, bu uchurlar xitayning rayondiki teqiblesh sistémisining nuqtiliq we nishanliq halda barghanséri Uyghurlar jem'iyitidiki yétekchi küch hésablan'ghan, Uyghurlarning mewjutluqini dunyagha namayan qilip turuwatqan Uyghur serxillirigha merkezlishiwatqanliqini körsetmektiken.

Yéqindin buyan ijtima'iy taratqularda tarqalghan uchurlarda tutqun qilin'ghan yaki lagérlargha élip kétilgen Uyghur ziyaliyliri sanining yüzdin éship ketkenliki melum bolush bilen birge, tutqun'gha uchrighan serxiller qatarida hetta tenheriket cholpanliriningmu barliqi ashkarilan'ghan idi. Yeni közge körün'gen putbol cholpini, “Suning putbol kulubi” ning nuqtiliq ezasi érfan hézimning bultur 2 ‏-ayning axiri komandining qishliq dem élish heptiside ata-anisini körüsh üchün yurti dörbiljin'ge barghanda tutqun qilinip lagérgha qamalghanliqi delillen'gen idi.

Yéqinqi yillarda közge téximu körünüwatqan ili yultuzi komandisining talantliq waratasi erpatning jaza lagérida ikenlikidin xewer tapqan, hazir amérikida yashawatqan, emma ilgiri Uyghur élide közge körün'gen kespiy putbol tirénéri bolghan jür'et zahir ependi özining mingbir musheqqette yétiship chiqqan yene bir putbol cholpinining lagérgha sewebsiz élip kétilgenlikidin bi'aram boluwatqanliqini bildürdi. Jür'et zahir ependi: “Bu lagérgha élip kétilgenliki melum bolghan pulbolchilirimizning ikkinchisi, esli siyasetke chétilmaydighan bir musteqil kespiy sahe bolghan tenheriket sahesidimu Uyghurlardin chiqqan talantliq cholpanlarning, xitay hökümitining arqimu-arqa ziyankeshliklirige uchrishi Uyghurlar üchünla emes putbol sahesi üchünmu chong yoqitish” dédi.