Sha'ir exmetjan osmanning yaponiye sepiri ehmiyetlik pa'aliyetler bilen ötti

Exmetjan osman yapon qurultiyi re'isi shigétomi akira ependi bilen bille.

Melum bolushiche, ataqliq Uyghur sha'iri we sherqiy türkistan sürgün hökümitining jumhur re'isi exmetjan osman ependi alahide teklip bilen yaponiyege bérip, muhim uchrishishlar we söhbetlerde bolghan.

Bu munasiwet bilen ziyaritimizni qobul qilghan sha'ir exmetjan osman ependi yaponiyediki 5-qétimliq ziyaritini yighinchaqlap sözlep berdi.

U, 12‏-öktebir charshenbe küni sherqiy türkistan sürgün hökümitining prézidénti salahiyiti bilen “Ise büyük ilah sariyi” da ziyarette bolghan. 13‏-Öktebir peyshenbe küni seherde, yaponiye parlamént binasida yaponiye parlaméntliri bilen körüshken we yaponiyediki meshhur üch chong gézitning biri bolghan “Sankey géziti” ning ziyaritini qobul qilghan. Shu küni chüshtin kiyin, yaponiyediki hakimiyet yürgüzüwatqan “Erkin démokratlar partiyisi” ning merkizi binasida, “Yaponiye Uyghur dostluq guruppisi” ning re'isi parlamént ezasi furiya kéji bilen sherqiy türkistan sürgündiki hökümiti toghriliq söhbetleshken. 16‏-Öktebir jüme küni sherqiy türkistan sürgün hökümitining pilanlishida, “Xitaydiki yadro tehditi” namliq yéghinda muhim qarar we bayanatlar élan qilghan.

Melum bolushiche, sherqiy türkistan sürgündiki hökümitining prézidénti exmetjan osman, bash ministir isma'il chénggiz we hemrahlirining bu qétimliq ziyariti pewqul'adde hörmet we ikram bilen ötken. Bu heqte ziyaritimizni qobul qilghan isma'il chénggiz ependi, exmetjan osman ependining yaponiyediki tesirining zorayghanliqigha we sherqiy türkistan dewasining qollashqa érishiwatqanliqigha shahit bolghanliqini bildürdi.

Ehwaldin tepsiliy xewerdar, yaponiyediki aktip pa'aliyetchi we sherqiy türkistan dewachisi muqeddes xanim, exmetjan osman ependining 5-qétimliq ziyaritini muhim ikki nuqtigha yighinchaqlash bilen birge, her bir pa'aliyetning tepsilati toghriliq sözlep berdi.

Muqeddes xanimning éytishiche, exmetjan osman ependi bashliq sherqiy türkistan sürgün hökümitining wekilliri alahide hörmet bilen kütüwélin'ghan. Yaponiye parlaméntida yuqiri derijilik shexsler bilen körüshken, “Sankey géziti” we “Osaka radiyosi” ning ziyaritini qobul qilghan, teklipke bina'en yighin'gha qatnashqan we “Xitaydiki atom tehtidi” namliq yighin uyushturghan.

Alaqidar xewerlerge köre, 16-öktebir ötküzülgen “Xitaydiki atom tehtidi” toghrisida melumat bérish yéghinigha, en'gliyedin eniwer toxti ependi, amérikidin étan gétman ependi we qirghizistandin mijit hüseyinof ependiler kélip, pa'aliyet ishtirakchilirigha muhim doklatlarni teqdim qilghan.