Bayin'gholin ottura sotning bash sotchisi ghalip tömürning tutqunda ikenliki ashkarilandi

Muxbirimiz shöhret hoshur
2018-12-25
Élxet
Pikir
Share
Print
Ikki neper xitay saqchisining "Terbiyelesh merkizi" ning aldida turghan körünüshi. 2017-Yili 2-noyabir, korla.
Ikki neper xitay saqchisining "Terbiyelesh merkizi" ning aldida turghan körünüshi. 2017-Yili 2-noyabir, korla.
AP Photo/Ng Han Guan

Yéqinda korla weziyitidin xewerdar kishilerdin biri korlida dawam qiliwatqan atalmish "Ikki yüzlimichi" lerge zerbe bérish dolqunining yéqinqi aylarda siyasiy-qanun sahesidiki Uyghur kadir we emeldarlargha merkezleshkenlikini melum qilghan idi. Muxbirimizning bu heqtiki éniqlashliri dawamida bayin'gholin oblastliq ottura sot mehkimisining bash sotchisi ghalip tömürning 6 aydin béri tutqunda ikenliki ashkarilandi.

Bu heqte radiyomizgha kelgen inkasta korlida bir türküm saqchi, sotchi we teptish xadimlirining tutqun qilin'ghanliqi, buninggha ularning bezilirining nöwettiki qattiq bir terep qilish herikitige aktip maslashmighanliqi seweb bolghan bolsa, yene bezilirige buningdin 10-15 yil awwalqi siyasiy délolarni bir terep qilishta yenggil höküm chiqirip qoyghanliqining seweb bolghanliqi ilgiri sürülgen. Ötken hepte téléfonimizni qobul qilghan korlida siyasiy-qanun saheside xizmet qiliwatqan bir xadim bayin'gholin ottura sot mehkimisidin birqanche kishining tutqunda ikenliki, bulardin birining ghalip isimlik bash sotchi ikenlikini ashkarilidi.

Biz bash sotchi ghalipning familisi we tutulush sewebi heqqide melumat élish üchün korla sheherlik we bayin'gholin oblastliq sot mehkimilirige téléfon qilduq. Alaqidar xadimlarning beziliri özlirining ghalip bilen bir bölümde emeslikini ilgiri sürüp, so'alimizgha jawab bérishtin özini qachursa؛ yene beziliri ghalipning néme sewebtin tutulghanliqidin xewiri yoqluqini éytti.

Radiyomizgha kelgen inkasta yéqinqi ikki yilda korlida tutqunlar sanining köplüki sewebidin bir türküm kishilerge sot échilmastinla höküm chiqirilghanliqi؛ teyyar bésilghan hökümnamilerge mehkumning ismi yézilipla sotchilargha bérilgenliki we sotchilarning téz imza qoyushi telep qilin'ghanliqi bayan qilin'ghan. Inkasta yene bezi sotchilar bundaq qilishning döletning obrazigha ziyanliq ikenlikini tilgha alghanliqi üchün gumanliq kishige aylan'ghan bolsa, yene beziler aldidiki sot hökümlirini oqup chiqip imza qoyghanliqi, yeni imzaning kéchikkenliki we mushu sewebtin bularningmu "Ikki yüzlimichilik" gumani bilen tutulghanliqi ilgiri sürülgen.

Biz korlida tutulghan atalmish "Ikki yüzlimichi" ler arisida ghalip isimlik birining bar yoqluqini sorighinimizda, xadimlardin biri buning bir dölet mexpiyetliki ikenlikini ilgiri sürüp, jawab bérishni ret qildi. Yene bir xadimdin ghalipning qaysi délogha imza qoyushni ret qilghanliqi we yaki qaysi délogha imza qoyushni kéchiktürgenlikini sorighinimizda, u bu heqte ottura sot siyasiy bashqarmisiningla jawab béreleydighanliqini éytti. Bu heqte uningdin izchil melumat telep qilghinimizda, u özining bu heqte melumat bérish mejburiyitining yoqluqini éytti.

Bayin'gholin ottura sot mehkimisi siyasiy bashqarmisining bir xadimidin ottura sottin tutqun qilin'ghan bash sotchining ismining néme ikenlikini sorighinimizda u bu tutqunning ismining ghalip ikenlikini ashkarilidi. Biz uningdin ghalipning toluq ismini sorighinimizda u "Ghalip tömür" dep jawab berdi. Emma u ghalipning néme üchün we qeyerde tutup turuluwatqanliqini sorighinimizda u özining yéngidin ishqa chüshkenlikini seweb qilip körsitip, bu heqte tepsiliy melumati yoqluqini éytti.

Tutqundiki bash sotchi ghalip tömürning korlidiki melum bir orunda xizmet qilidighan bir dosti alaqidar kishilerdin anglighanlirigha asasen ghalip 10 yil burun üstidin höküm chiqarghan we 3 yilliq késilgen bir mehkumning jaza mudditini tügetkendin kéyin tekrar yene bir qétim atalmish "Jinayet" ötküzgenliki, bu ehwalning ghalip tömürning tutulushigha bahane qilin'ghanliqini bildürdi. Emma u yene ghalip tömürning tutulushigha buningdin bashqimu bahanilerning bolushi mumkinlikini eskertti.

Toluq bet