Yawropa sherqiy türkistan ma'arip jem'iyiti xizmetlirini xulasilidi, yéngi rehberlirini saylidi

Yawropa sherqiy türkistan ma'arip jem'iyiti xizmetlirini xulasilesh we yéngi rehberlirini saylash yighinidin körünüsh. 2014-Yili féwral, gollandiye.

2014‏-Yili 9‏-féwral gollandiyediki bir türküm Uyghurlar yawropa sherqiy türkistan ma'arip jem'iyitide jem bolup, bu jem'iyetning ötken bir yilda élip barghan pa'aliyetliri, iqtisadiy kirim-chiqim ehwali, hazirqi we kelgüsidiki nishan-yölinishliri munasiwiti bile échilghan yighin'gha nazaretchilik süpiti bilen qatnashti.

Pa'aliyet “Qur'an kerim” tilawiti bilen bashlandi.

Mezkur jem'iyettiki ana til kursi oqughuchilirining teqdim qilishida “Ösmürler marshi” namliq shé'irni déklamatsiye qilindi. Andin, ötken bir yilda élip bérilghan pa'aliyetler qisqa filim sheklide körsitildi.

Jem'iyetning telim-terbiye mes'uli abduraxman qarihajim söz qilip, Uyghur balilirining bashqa chet'elliklerning balilirigha qarighanda zéhnining ötkürlüki, terbiye qobul qilishchanliqining yuqiriliqi, tirishchanliqimningmu alahide perqliq ikenlikidin söyünüp, ötken bir yilda ösmürlerning ögen'genliridin razi bolghanliqini bildürdi we ata-anilarni balilirining telim-terbiye ishlirigha téximu köprek ehmiyet bérishke ündidi.

Andin mezkur jem'iyetning yéngi mes'uli eysa qarihajim iqtisadiy sahediki sanliq melumatlarni otturigha qoydi.

Uning bildürüshiche mezkur jem'iyet ötken bir yil ichide i'ane qilghuchilarni seperwer qilishning netijiside, ayliq medetliri bilen bu jem'iyetni qollawatqanlarning sani 150 din ashqan. Ötken bir yildila mezkur yerni merkez qilghan omumi pa'aliyetlerning chiqim sommisi 30 nechche ming yawru etrapida bolghan. Shuninggha yarisha élip bérilghan xizmetlerning körünerlik ünüm bergenlikini hés qilghan Uyghurlar, bu qétimqi mezkur yerni sétiwélish pa'aliyitidiki aktipliqimu yaxshi bolghan.

Pa'aliyet ariliqidiki namaz we ghizalinishtin kéyin, uzun yillardin biri mezkur jem'iyetning re'islik wezipisini ötep kelgen obulqasim ependi söz qilip, Uyghurlaning muhajirettiki milliy kimlikini saqlap qilish üchün bir yerge jem bolushning neqeder muhimliqini sherhlesh bilen birge, gollandiyede olturaqlishish mesiliside merkez qilishqa jughrapiyilik jehette bu döletning otturisigha jaylashqan ötrixt ölkisining eng muwapiq ikenlikini 8-10 yillar ilgiri chüshinip yétip, shu meqset üchün qanchilighan éghir bedellerge duch kelgen bolsimu boshashmay, axiri bügünkide xushallinarliq netijilerni körgenlikidin xursen boluwatqanliqini bildürdi.

Pa'aliyet axirida mezkur jem'iyetning ichki saylam arqiliq yéngidin wezipilerge teyinlen'gen namzatliri élan qilindi.

Jem'iyetning bash mes'ulluqigha eysa qarihajim, mu'awin mes'ulluqigha obulqasim ependim, katipliqqa ötkür ependim, ma'arip ishlirigha abduraxman qarihajim we yene iqtisadiy kirim-chiqim ishlirigha mexmutjan ependi qatarliqlarning teyin qilin'ghanliqi élan qilindi.

Köpchilik yéngidin wezipige teyinlen'genlerni tebriklesh bilen birge, bundin kéyinki xizmetlirige téximu köp utuqlarni tilep qaytishti.

Ziyaritimizni qobul qilghanlarmu birdek ijabiy baha berdi.

Yawropa sherqiy türkistan ma'arip jem'iyiti 2006‏-yilliri deslepki a'iliwi yighilishliridin bara-bara zoriyip, bügünki muntizim orni we sistémiliq xizmet funksiyisi ige gholluq teshkilat halitige aylan'ghuche, emeliy xizmetliri bilen wetendashlirining ishenchini qazinip kéliwatqan bolup, qurulghandin biri milliy we diniy kimlikni muhapizet qilishqa alaqidar xizmetlerni qanat yaydurup kelmekte.