Д у қ вәкиллири явропа шәрқий түркистан маарип җәмийитини зиярәт қилди

Ихтиярий мухбиримиз пидаий
2013.12.17
duq-yawropa-sherqiy-turkistan-maarip-jemiyiti-ziyaret-1.jpg Д у қ вәкиллири явропа шәрқий түркистан маарип җәмийитини зиярәт қилди. 2013-Йили 15-декабир, голландийә.
RFA/Pidaiy

15-Декабир күни голландийә уйғур бирлики тәшкилатиниң рәһбири һәйәтлири сайлам паалийитигә назарәт қилиш вә йетәкчилик қелиш мәқсити билән голландийәгә кәлгән дуня уйғур қурултийиниң японийәдә турушлуқ муавин рәиси илһам маһмут әпәнди, германийәдә турушлуқ муавин рәиси үмид агаһи әпәнди вә диний ишлар рәиси турғунҗан авудун һаҗим қатарлиқ вәкилләр мәзкур сайлам паалийити ахирлашқандин кейин, голландийә уйғур бирлики вәкиллириниң һәмраһлиқида явропа шәрқий түркистан маарип җәмийитини зиярәт қилди.

Меһманларни җәмийәт мәсули обулқасим башлиқ уйғур җамаити қизғин күтүвалди. Обулқасим әпәнди меһманларға җәмийәтниң қурулуш тарихидин бүгүнигичә бесип өткән мусапилирини қисқичә чүшәндүрүп өтти. Илһам маһмут әпәнди, үмид агаһи әпәнди вә турғунҗан алавудун һаҗимлар инкас сөз қилип, явропа шәрқий түркистан маарип җәмийитиниң утуқлирини тәбриклиди вә тәлим-тәрбийә ишлириниң мувәппәқийәтлик давам қилишиға болған тиләкдашлиқини билдүрди, болупму бу җәмийәтниң азадә вә пакиз бир муһит бәрпа қилғанлиқини қайта-қайта мәдһийиләп, сетивелиш үчүн қелиниватқан һеммәтлириниң йүксәкликигә юқири баһа бәрди вә көңүл сөзлирини изһар қилип, муһаҗирәттики уйғурларға нәмунә болғудәк бир нәтиҗини көрүватқанлиқи билән һаяҗанлирини ипадиләшти.

Голландийә уйғур берликиниң йеңи рәиси абдусалам нияз әпәндиму, икки җәмийәтниң бир-бири билән буниңдин кейин техиму зеч һәмкарлишидиғанлиқини вә һәр иккиси бир бириниң кәмлирини толуқлап голландийәдики уйғур дәваси үчүн тегишлик һәссә қошушта ярдәмлишидиғанлиқини билдүрүп, голландийәдики уйғурларниң инақ-иҗил өтүватқанлиқини илгири сүрди.

Вәкилләр голландийәдики шәхс вә аммиви тәшкилатлар арисидики иттипақлиқни мәдһийиләп, голландийәдики уйғурларниң йеқин кәлгүсидә техиму көп утуқларни қолға кәлтүрәләйдиғанлиқиға болған ишәнчисиниң ашқанлиқини билдүрди.

Сөһбәткә иштирак қилғанлар вәкилләрдин, улар туруватқан йәрләрдики дәва ишлириға мунасивәтлик мәсилиләрдин соаллар сорашти. Мәсулларму һәм тегишлик җавабларни берип көпчиликни рази қилди.

Зиярәт ахирисидики пурсәттә өз тәсиратлирини вә тәвсийәлирини баян қилған меһманлар барлиқ радио аңлиғучиларға саламлирини йоллиди вә уларни явропа шәрқий түркистан маарип җәмийитиниң бу хәйрлик ишлирида ярдәмдә болушқа үндиди.

Қизғин сөһбәт, бирлик вә баравәрликни намаян қилған достлуқ вә йүксәк мәсулийәтчанлиқ туйғуси билән һәмдастихан болған вәтәндашлар бирлишип, сөһбәт ахирлашқанда хатирә рәсимгә чүшти вә аддийғина ғизалинип, дуаси тиләклири билән қайтишти.

Бир қисим җамаәт дуня уйғур қурултийи вәкиллириниң халисанә зияритидин хурсән болған һалда, йәнә бир қетимлиқ дидарлишишқа болған үмидлирини изһар қилип, уларни узитип қойди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.