Yawropa sherqiy türkistan ma'arip jem'iyiti d u q wekilliri bilen söhbetleshti

Adwokat we aktip pa'aliyetchi nuri türkel ependi söhbet ehlige yéngidin yolgha qoyulghan xitay qanunining maddilirining xeterlik aqiwiti toghriliq söz qilmaqta. 2017-Yili 1-aprél, gollandiye.

2017-Yili 1-aprél gollandiyening zeyst shehirige jaylashqan yawropa sherqiy türkistan ma'arip jem'iyitide xitayning yéqinda ijra qilin'ghanliqi élan qilin'ghan yéngi qanuni toghriliq melumatlar muhakime qilindi. Pa'aliyetke etraptiki bir qisim Uyghurlar bilen dunya Uyghur qurultiyi mes'ulliridin ömer qanat, dolqun eysa ependiler, amérikidiki adwokat we aktip pa'aliyetchi nuri türkel qatarliqlarmu ishtirak qildi. Ular aldinqi hepte bélgiyening biryussél shehiride élip bérilghan yashlarni terbiyelesh kursidin qaytish sepiride gollandiyediki mezkur jem'iyetni ziyaret qilish üchün kelgen idi.

Pursetni gheniymet bilgen yawropa sherqiy türkistan ma'arip jem'iyitining mes'ulliri méhmanlarni qarshi aldi we ularning sheripige ziyapet berdi. Méhmanlarmu yawropa sherqiy türkistan ma'arip jem'iyitining xizmetlirige ijabiy bahalar berdi.

Shu yer waqti kech sa'et 6 din 10 gha qeder dawam qilghan bu uchrishishta, ömer qanat, dolqun eysa we nuri türkellerning semimiy tewsiyeliridin memnun bolghan söhbet ehli méhmanlargha we mezkur jem'iyettiki wetendashlirigha rehmitini bildürdi.

Gollandiyediki telepchan Uyghurlarning özliri qiziqidighan, Uyghurlargha alaqidar köp sahelerde élip bérilghan mulahize we muzakirilirimu ependilerni razi qildi. Söhbetning mezmun we türining köp sahege chétilishigha baqmay, hemmidin bekrek diqqet qozghighini, xitayning yéngidin ijra qilishqa bashlighanliqi élan qilin'ghan esebiylikke qarshi belgilimiliri boldi. Yéngi maqullan'ghan nizamda, burunqi mewjut cheklimiler kéngeytilip yéngidin yene 15 xil cheklime qoshulghanliqi qattiq tenqidlendi. Pa'aliyet ehli söhbettin kiyin, öz-ara alaqiliship turush üchün kéliship, xatire resimge chüshti we etisi tekrar körüshüsh ümidi bilen tarqilishti.

Bu munasiwet bilen ziyaritimizni qobul qilghan yawropa sherqiy türkistan ma'arip jem'iyitining mes'uli obulqasim ependi, mezkur méhmanlarning ziyaritidin xursen bolghanliqini bildürdi we ikki terep söhbitining ehmiyiti toghrisida toxtaldi.

Dunya Uyghur qurultiyining mes'ulliridin ömer qanat ependi bilen adwokat nuri türkel ependilermu bu qétimliq ziyaritidin hasil bolghan hés - tuyghulirini otturigha qoydi.