“Uyghuristan azadliq teshkilati” hemkarlishishni kücheytish üchün gollandiyede ziyarette boldi

6‏-Dékabir shenbe gérmaniyedin kelgen “Uyghuristan azadliq teshkilati” ning mes'ulliridin osmanjan tursun ependi, abduréhimjan abdureshid ependi we alimjan ependi qatarliq 6 kishilik hey'et, weten-xelqining siyasiy istiqbali heqqide öz-ara chüshinish we hemkarlishishni ilgiri sürüsh üchün gollandiyede ziyarette boldi.

Gollandiye Uyghur birliki teshkilatidin sadiqjan seley ependi méhmanlarni qarshi élish sözi qilip, teshkilatlar ara ittipaqliqni ilgiri sürüshning muhimliqini tekitlidi.

Bextiyar nasir ependi 2009‏-yildin buyan gollandiye Uyghur birliki teshkilatining gollandiyede élip bérilghan ghelibilik pa'aliyetliridin qisqiche izahat bérip méhmanlarni sözge teklip qildi.

“Uyghuristan azadliq teshkilati” ning re'isi osmanjan tursun ependi salam we rehmettin kéyin söz qilip, bu qétimqi ziyaritining meqsiti heqqide toxtalghandin kéyin, teshkilatlar ara ittipaqliq we hemkarliqni kücheytishning bügünki teqezzalirini bayan qildi.

Uning qarishiche, bügün dunya xelqi arisida Uyghurlar we ularning wetinining tonulushi melum bir basquchni tamamlighan bolup, nöwette bésishqa tégishlik qedemning Uyghurlargha hésdashliq qilishini qolgha keltürüsh we uni mu'eyyen bir qimmetke aylandurushta bekrek gewdilenmekte iken.

Köpchilik öz-ara ghizalinish we hem-söhbette bolush bilen birge xatire resimge chüshüp, kelgüsi dostluqning téximu küchiyishini ümid qilidighanliqini bildürgendin kéyin, bir-birige amanliq tilep tarqilishti.

Ziyaritimizni qobul qilghan osmanjan tursun ependi bu qétimliq ziyaritining yawropa miqyasida dawam qilidighanliqini, türlük sewebler bilen gollandiyening tunji béket bolghanliqini bildürdi we gollandiyediki qérindashlirigha salam yollidi.

Sadiqjan seley ependi bu ziyaretning ijabiy qimmitige ehmiyet bilen qaraydighanliqini bildürdi.

Gérmaniyediki “Uyghuristan azadliq teshkilati” din kelgen mes'ullar etisi yeni 7‏-dékabir yawropa sherqiy türkistan ma'arip jem'iyitide ziyarette bolup, mezkur jem'iyetning ayliq söhbet pa'aliyitige ishtirak qildi we u yerdimu yérim kéchigiche wetendashliri bilen erkin söhbette boldi.

Méhmanlar 8‏-dékabir gollandiyidiki bir qisim shexslerning öylirige ziyarette bolghandin bashqa, türkiy qérindashliriningmu tekliplik ziyaretliride bolup qaytishti.

Shuning bilen 6‏-7‏- we 8-dékabir gollandiyediki Uyghurlar üchün ehmiyetlik we menilik ötken künler boldi.