Bayin'gholin oblastliq teptish mehkimisining mu'awin bashliqi hékim qadirningmu tutqunda ikenliki ashkarilandi

Muxbirimiz shöhret hoshur
2018.12.12
lager-urumchi-turpan-reuters.jpg Ürümchi bilen turpanning ariliqigha sélin'ghan “Terbiyelesh lagéri” ning sirtqi körünüshi. 2018-Yili 4-séntebir.
REUTERS

Melum bolushiche, atalmish “Kespiy terbiye” nami astida dawam qiliwatqan Uyghurlargha qarita keng-kölemlik tutqun dolqunida yéqinqi 6 aydin béri tutqun nishani siyasiy-qanun sahesidiki rehbiriy kadirlargha yüzlen'gen. Weziyettin xewerdar kishilerning pash qilishiche, yéqinqi birnechche ay ichide korlida siyasiy-qanun sahesidiki Uyghur rehbiri kadirlardin bayin'gholin oblastliq teptish mehkimisining mu'awin bashliqi hékim qadir qatarliq az dégende 4 kishi tutqun qilin'ghan.

Uyghur rayonida yéqinqi ikki yilda yuquri pellige chiqqan keng-kölemlik tutqun we zerbe zerbe dolqunida Uyghur jem'iyitining yétekchi qatlimidin eng deslepte diniy zatlar, arqidin soda-karxanichilar, uningdin kéyin tonulghan ziyalilar tutqun qilin'ghan bolsa, yéqinqi aylardin béri nishan siyasiy-qanun sahesidiki Uyghur rehbiri kadirlargha qarap yüzlen'gen. Weziyettin xewerdar kishilerning bayan qilishiche, xitay da'iriliri özliri bilen yillardin béri, hetta dewrlerdin bir sep, bir meydanda turup ishlep kelgen bu emeldarlarni ikki yildin buyanqi siyasiy dolqunda aktip bolmasliq we yaki siyasiy meydanini éniq we keskin tonda ipadilmeslik sewebidinla tutqun qilghan. Korlida siyasiy-qanun saheside xizmet qiliwatqan bir xadim korlida siyasiy-qanun saheside tutqun qilin'ghanlarning sanining “Xéli bar” ikenlikini ashkarilidi. U korlida közge körünerlik emel tutqanlardinla sot we teptish mehkimisidin az dégende 4 kishi barliqini pash qildi. Uning bayan qilishiche, bayin'gholin oblasliq teptish mehkimisining bashliqi hékim qadir buningdin ikki ay awwal tutqun qilin'ghan iken.

Ötken yili ziyartimizni qobul qilghan we korlidiki lagérlar heqqide muhim melumatlarni bergen bir sabiq “Milletler ittipaqliqi ülgisi” korlida siyasiy-qanun sahesidiki Uyghur rehbiriy kadirlargha qarita tutqunning bu yilning béshidila bashlan'ghanliqini tilgha alghan idi. Uning déyishiche, sheherlik qatnash idarisining emeldarliridin biri yil béshida bir qétim tutulup qoyup bérilgen. Weziyettin xewerdar kishilerning bayan qilishiche, siyasiy qanun sahesidiki bezi emeldarlarning tutqun qilinishigha uning 10 hetta 15 yil ilgiriki bezi délolilarda hökümni yenggil chiqirip qoyghanliqi, atalmish “Üch xil küch” lerge yumshaqqolluq qilghanliqi sewep bolghan iken. Yene bezlirining tutqun qilinishigha bolsa a'ile we ijtima'iy munasiwtimu sewep bolghan iken. Mezkur siyasiy-qanun xadimining pash qilishiche, bayin'gholin oblasliq teptish mehkimisining mu'awin bashliqi hékim qadirning tutqun qilinishigha uning ürümchidiki aptonum rayonluq ormanchiliq nazaritirining tutqundiki sabiq naziri memet abdulla bilen bolghan tughqandarchiliq munasiwtimu bir sewep bolghan iken. Déyilishiche, tutqun hékim qadir tutqun memet abdullaning ayalining inisi bolghanliqi we uning bilen ilgiriki waqitlarda qilghan téléfon alaqisi seweplik tutulghan iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.