D u q “Sherqiy türkistan hemkarliq munbiri” qurush üchün heriket qilmaqta

Ixtiyariy muxbirimiz ekrem
2019.02.21
Nizami-alem-teshkilati.jpg D u q rehberliri merkizi stutgart shehiride bolghan “Nizami alem” teshkilatining re'isi we ezaliri bilen xatire söhbette boldi. 2019-Yili 19-féwral, gérmaniye.
RFA/Ekrem

“Sherqiy türkistan hemkarliq munbiri” türk we bashqa islamiy teshkilatlarning jaza lagérlirigha qarshi bash shitabi bolidiken.

Dunya Uyghur qurultiyining rehberliri 19-féwraldin étibaren merkizi gérmaniyede bolghan bir qisim türk teshkilatlirining bash shitabini ziyaret qilip, “Sherqiy türkistan hemkarliq munbiri” qurushning teyyarliq xizmetlirini bashlighan.
D u q re'isi dolqun eysa ependi bashchiliqidiki bir guruppa wekiller 19-féwral küni köln shehiridiki “Yawropa türk démokratlar birliki” qatarliq teshkilatlarni ziyaret qilghandin kéyin, 20-féwral küni yene “Nizami alem” qatarliq teshkilatlarning merkizini ziyaret qilip, xitayning Uyghur diyarida tesis qilghan jaza lagérlirigha qarshi pütün dunya miqyasida ortaq heriket élip bérishni meqset qilghan “Sherqiy türkistan hemkarliq munbiri” qurush ishida ular bilen pikir birliki shekillendürgen.

Gérmaniyening stutgart shehiridin ziyaritimizni qobul qilghan dolqun eysa ependi yawropada köpligen tarmaq teshkilatliri bolghan, özlirini “Alp'erenler” dep ataydighan “Nizami alem” teshkilatining eslide muhsin yazuchi'oghli qurghan türkiyediki “Büyük birlik partiyesi” ning bir tarmiqi ikenlikini, merhum muhsin yazuchi'oghlining öz zamanida Uyghur dewasini aktip qollighan bir parlamént ezasi bolghanliqini eslep ötti.

Qurultay re'isi bilen birge bu söhbetlerge daxil bolghan d u q diniy ishlar komitétining mudiri, “Sherqiy türkistan ölimalar birliki” ning mu'awin re'isi turghunjan alawudun ependi bu qétimqi ziyaret heqqide toxtalghanda Uyghurlarni qollash, Uyghurlargha yardem bérishni nishan qilghan “Sherqiy türkistan hemkarliq munbiri” qurushning asasiy meqset ikenlikini tilgha aldi.

Qurultay fondining mudiri abdujélil emet ependi sözide yawropadiki barliq islamiy teshkilatlarni qozghap, xitayning irqiy qirghinchiliqlirigha ortaq taqabil turush, jaza lagérlirini taqitish üchün d u q ning jiddiy heriket bashlighanliqini, buning üchün “Sherqiy türkistan hemkarliq munbiri” ning asasini turghuzuwatqanliqini eskertti.

Dolqun eysa ependi bu qétimqi ziyaretning ehmiyetlik bolghanliqini tilgha aldi. Turghunjan alawudun ependi bolsa “Nizami alem” teshkilati rehberlirining sherqiy türkistan dewasini dawamliq izchil qollaydighanliqini, aldimizdiki aylarda d u q bilen hemkarliship kölimi zor pa'aliyetlerni birlikte élip baridighanliqini bildürgenlikini tekitlidi.

Bundin birqanche heptiler ilgiri d u q re'isi en'gliyediki “Biritaniye islam medeniyet merkizi” qatarliq ereb teshkilatlirining bash shitabini ziyaret qilip, “Sherqiy türkistan hemkarliq munbiri” qurush mesilisini muzakire qilghan idi. Igilishimizche, xitayning jaza lagérlirigha we shundaqla xitayning Uyghurlar üstidin yürgüzüwatqan zulum siyasetlirige qarshi qurulghusi bu munberge sherqiy-jenubiy asiyadiki musulman teshkilatliri, yawropa, amérika hem awstraliyediki türk, ereb we bashqa islamiy teshkilatlar eza bolidiken. Bu munberge eza bolghan teshkilatlar pütün dunya miqyasida birla waqitta xitaygha qarshi zor kölemlik pa'aliyetler élip baridiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.