Хитайниң һиндистандики чағанлиқ сәнәт мәрикисигә уйғурларму қатнаштурулди

Ихтиярий мухбиримиз һаҗи қутлуқ қадири
2017-01-26
Share
hindistan-chaghan-senet-1.jpg Уйғур сәнәтчилири йеңи деһлида өткүзүлгән чағанни күтүвелиш паалийитидә. 2017-Йили 20-январ, һиндистан.
RFA/Qutluq

Һиндистандики хитай әлчиханисиниң тор бетидә көрситилишичә: 18-январ пайтәхт йеңи деһлидики "камани" тиятирханисида хитай әлчиханисиниң саһибханилиқида өткүзүлгән "2017-йиллиқ баһар байрими шадлиқи" сәнәт мәрикисидә уйғур аптоном районлуқ нахша-усул өмикиниң сәнәтчилири мәхсус уйғур нахша-усуллирини орунлап кәң тамашибинларниң алқишиға еришкән.

Хәвәрдә һиндистанда турушлуқ хитай әлчиханисиниң әлчиси лю җавхуйниң баһар байрими шадлиқи мәрикисидә қилған сөзиму алаһидә орун берилгән болуп, у сөзидә: "хитайниң баһар байрими хитай тарихидики қәдимий әнәниви бүйүк байрамлардин бири һесаблинидиғанлиқини, бу байрамниң көплигән мәзмунларни өз ичигә муҗәссәмләш билән биргә, хитай мәдәнийитиниң асасий гәвдисини намаян қилидиғанлиқи" ни билдүргән. Шундақла у йәнә "һиндистан хәлқиниң уйғур аптоном райони сәнәтчилириниң сәнәт номурлирини көрүш арқилиқ хитай мәдәнийитиниң көп хиллиқини чүшинивелишини үмид қилидиғанлиқи" ни ейтқан.

Баш әлчи лю җавхуй сөзидә йәнә хитайниң көп милләттин тәркиб тапқан чоң дөләт икәнликини алаһидә әскәртип, уйғур мәдәнийитини хитай мәдәнийитиниң бир қисми дәп чүшәндүргән.

Хәвәрдә дейилишичә, бу қетимқи баһар байрими шадлиқи сәнәт мәрикисигә һиндистан парламентиниң бир қисим әзалириму қатнашқан.

Зияритимизни қобул қилған германийәдики дуня уйғур қурултийиниң муавин рәиси үмид хәмит хитайниң уйғур сәнәтчилирини һиндистанда уйғур нахша-усуллирини көрситишкә орунлаштурушиниң хитайниң уйғур елида елип бериватқан бастуруш сияситини йошурушни мәқсәт қилған тәшвиқат паалийити икәнликини илгири сүрди.

Японийә уйғур бирлики тәшкилатиниң рәиси турмуһәммәт һашим бу һәқтә тохталди.

Бейҗиңдики хитай хәлқара радийо истансисиниң тор бетидики бу һәқтики хәвиридә: "18-январ хитай мәдәнийәт министирлиқиниң орунлаштурушиға асасән уйғур аптоном районлуқ нахша-усул өмики сәнәтчилириниң сәнәт номурлирини көрситиши асасида 2017-йиллиқ баһар байрими шадлиқи мәрикиси һиндистан пайтәхти йеңи деһлидики "камани тиятирханиси" да өткүзүлди. Һиндистандики хитай баш әлчиси лю җавхуй мәрикидә сөз қилди. Паалийәткә һиндистанда турушлуқ хитай дипломатлири вә һиндистанниң юқири дәриҗилик әмәлдарлиридин болуп җәмий 800 гә йеқин киши қатнашти" дейилгән.

Хәвәрдә көрситилишичә, баш әлчи лю җавхуй 2017-йиллиқ баһар байрими шадлиқи мәрикисидә сөз қилип: "һиндистан көп милләтлик вә көп мәдәнийәтлик чоң бир дөләт, һиндистан хәлқи бүгүнки уйғур аптоном район сәнәтчилириниң сәнәт номурлири арқилиқ хитай дөлитиниң бүйүклүкини вә хитайдики көп мәдәнийәтләрни чүшинип йетәләйду" дегән.

Хәвәрдә дейилишичә, уйғур сәнәтчилири 2017-йиллиқ баһар байрими шадлиқи сәнәт мәрикисиниң муқәддимисини нахша-уссуллуқ номур "байрам шадлиқи" ни орунлап кәң тамашибинларни һаяҗанға салған вә һиндистан хәлқ нахшилирини һинди вә орду тиллирида орунлап тамашибинларниң алқишиға еришкән.

Һиндистанда өткүзүлгән 2017-йиллиқ баһар байрими шадлиқи сәнәт мәрикисидә йәнә "долан мәшрипи"му орунланған шундақла уйғур серикчилириму өз маһарәтлирини көрсәткән.

Хәвәрдә ейтилишичә, йеңи деһлида өткүзүлгән бу қетим "баһар байрими шадлиқи мәрикиси"дә йәнә рәсим көргәзмиси көрситилиш билән биргә һиндистанниң һәйдәрабад өлкисидә "хитай кино фестивали" му өткүзүлгән.

Хитайниң йеңи деһлидики әлчиханиси тор бетиниң 21-январдики хәвиридә ейтилишичә, уйғур аптоном районлуқ нахша-усул өмикиниң сәнәтчилири 20-январ йеңи деһлида хитай әлчиханиси тәрипидин уюштурулған һиндистандики хитай пуқралири, хитай муһаҗирлири вә оқуғучилириниң 2017-йиллиқ баһар байримини күтүвелиш паалийитидиму уйғур нахша-усуллирини орунлиған.

Дуня уйғур қурултийиниң муавин рәиси үмид агаһи хитайниң һиндистанда өткүзгән 2017-йиллиқ баһар байрими шадлиқи мәрикисигә вә шу йәрдики хитайларниң чағанлиқ паалийәтлиригә уйғур сәнәтчилириниң қатниши һәққидә өзиниң қарашлирини оттуриға қойди.

Японийә уйғур бирлики тәшкилатиниң рәиси турмуһәммәт һашим өзиниң бу һәқтики тәнқиди қарашлирини баян қилди.

Һиндистан пайтәхти йеңи деһлидики хитай әлчиханисиниң тор бетидә йәнә 22-январ уйғур аптоном район сәнәтчилири һиндистандики хитай әлчиханисиниң орунлаштуруши билән һиндистанға қошна болған бутан дөлитидиму өткүзүлгән хитайниң 2017-йиллиқ баһар байрими шадлиқи сәнәт мәрикисигә қатнишип, өз сәнәт номурлирини көрсәткән болуп, паалийәткә бутан падишаһи вә хан җәмәти аилиси һәм баш министирму иштирак қилған.

Һазир һиндистанниң йеңи деһли шәһиридә елип бериливатқан 2017-йиллиқ баһар байрими шадлиқи сәнәт мәрикисигә қатнишиватқан уйғур аптоном районлуқ сәнәт өмикиниң рәһбәрлиридин бири телефон зияритимизни қобул қилип, өзиниң нам шәрипини вә аваз хатирисини ашкарилимаслиқни җекилигән асаста өзлириниң 28-январ үрүмчигә қайтидиғанлиқини вә бу қетимқи һиндистан сәпириниң уйғур сәнәтчилири үчүн тунҗи қетимлиқ зиярәт икәнликини билдүрди.

Юқириқи аваз улинишидин тәпсилатини аңлаң.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт