Ақтуниң пилал йезисидики "аммини агаһландуруш йиғини" да диний затлар сазайи қилинған

Мухбиримиз қутлан
2017-08-24
Share
ikki-yuzlimichi-sazayi.jpg Ақту наһийә пилал йеза тазилиқ кәнтидин "икки йүзлимичи диний зат" дегән қалпақ билән тартип чиқирилип, амма алдида сазайи қилиниватқан әбәйдулла ясин һаҗим. 2017-Йил 3-июл, ақту пилал йезиси.
xjakt.gov.cn

Ақту наһийәлик һөкүмәт ториниң хәвиригә қариғанда, бу йил 7-айниң 3-күни ақту наһийәсиниң пилал йеза тазилиқ кәнтидә бир мәйдан сүрән-чоқанға толған "аммини агаһландуруш йиғини" ечилған.

Игилинишичә, шу күни тазилиқ кәнтидики 900 дин артуқ амма йиғинға қатнаштурулған. Нәқ мәйданда тартип чиқирилған бир нәпәр аталмиш "икки йүзлимичи диний зат" алаһидә сақчиларниң ялап туруши билән кәнт аһалилири алдида сазайи қилинған.

Шу күнидики "аммини агаһландуруш йиғини" да ақту наһийәлик партком бирликсәп бөлүминиң башлиқи данияр мәмәт билән ақту наһийәлик интизам тәкшүрүш комитетиниң секритари ваң җүнпиң сөз қилип, "икки йүзлимичи" ләргә қахшатқуч зәрбә беридиғанлиқини вә уларни түп йилтизидин қурутидиғанлиқини билдүргән.

Хәвәрдә дейилишичә, 7-айниң 2-күни кечидә ақту наһийәлик партком пилал йезисиниң тазилиқ кәнтидин бир йип учи тапшурувалған. Йәни ақту наһийәси чиқарған "‹икки йүзлимичи' ләргә даир йип учи билән тәминлигүчиләрни мукапатлаш бәлгилимиси" бойичә, тазилиқ йезисидики бирәйлән диний зат әбәйдулла ясин үстидин паш қилиш материяли йоллиған.

Ақту наһийәлик партком шу күни кечиси тазилиқ кәнтигә сақчи әвәтип, әбәйдулла ясинни тутқун қилған. Шу күни тазилиқ кәнтидә ечилған "аммини агаһландуруш йиғини" да, диний зат әбәйдулла ясинниң 2012-йилидин буян "пилан сиртида пәрзәнтлик болуш, өзиниң диний вә иҗтимаий тәсиригә тайинип қанунсиз һалда кәнт ишлириға арилишиш" тәк бир қатар қилмишлири паш қилинған.

Диний зат әбәйдулла ясинни амма алдида сазайи қилиш йиғинида униң "диний тонға орунувалған қанунсиз унсур" икәнлики һәмдә "кишиләрниң алдида мөтивәргә, кәйнидә иблисқа айлинидиған икки йүзлимичи" икәнлики һәққидики материял оқуп өтүлгән.

Биз бу һәқтә йәниму илгирилигән һалда мәлумат елиш үчүн ақту наһийәсиниң пилал йезилиқ сақчиханисиға телефон қилдуқ.

Мәзкур сақчиханидики бир нәпәр уйғур аял сақчи тазилиқ йезисидики мәзкур диний затниң шу күнидики амма алдида сазайи қилиш йиғинидин кейин ақту наһийәсидики "йепиқ тәрбийәләш мәркизи" гә елип кетилгәнликини билдүрди.

Мәзкур сақчи зияритимиз җәрянида йәнә, бу делони пилал йезилиқ сақчихана әмәс, бәлки ақту наһийәлик сақчи идариси биваситә беҗиргәнликини, әбәйдулла ясинниң ақту наһийәсидики қайси "йепиқ тәрбийәләш мәркизи" гә елип кетилгәнликидин хәвириниң йоқлуқини, һазир күнигә нәччә онлиған кишиләрниң тәрбийәләш мәркәзлиригә йолға селиниватқанлиқини илгири сүрди.

Бу һәқтә пикир баян қилған америкидики уйғур көзәткүчиләрдин доктор қаһар барат әпәнди, хитай һөкүмитиниң нөвәттә уйғур диярида елип бериватқан йоқири бесимлиқ сияситиниң аталмиш "муқимлиқ" ни әмәс, бәлки техиму зор қаршилиқни кәлтүрүп чиқиридиғанлиқини тәкитлиди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт