Aqtuning pilal yézisidiki "Ammini agahlandurush yighini" da diniy zatlar sazayi qilin'ghan

Muxbirimiz qutlan
2017-08-24
Élxet
Pikir
Share
Print
Aqtu nahiye pilal yéza taziliq kentidin "Ikki yüzlimichi diniy zat" dégen qalpaq bilen tartip chiqirilip, amma aldida sazayi qiliniwatqan ebeydulla yasin hajim. 2017-Yil 3-iyul, aqtu pilal yézisi.
Aqtu nahiye pilal yéza taziliq kentidin "Ikki yüzlimichi diniy zat" dégen qalpaq bilen tartip chiqirilip, amma aldida sazayi qiliniwatqan ebeydulla yasin hajim. 2017-Yil 3-iyul, aqtu pilal yézisi.
xjakt.gov.cn

Aqtu nahiyelik hökümet torining xewirige qarighanda, bu yil 7-ayning 3-küni aqtu nahiyesining pilal yéza taziliq kentide bir meydan süren-choqan'gha tolghan "Ammini agahlandurush yighini" échilghan.

Igilinishiche, shu küni taziliq kentidiki 900 din artuq amma yighin'gha qatnashturulghan. Neq meydanda tartip chiqirilghan bir neper atalmish "Ikki yüzlimichi diniy zat" alahide saqchilarning yalap turushi bilen kent ahaliliri aldida sazayi qilin'ghan.

Shu künidiki "Ammini agahlandurush yighini" da aqtu nahiyelik partkom birliksep bölümining bashliqi daniyar memet bilen aqtu nahiyelik intizam tekshürüsh komitétining sékritari wang jünping söz qilip, "Ikki yüzlimichi" lerge qaxshatquch zerbe béridighanliqini we ularni tüp yiltizidin qurutidighanliqini bildürgen.

Xewerde déyilishiche, 7-ayning 2-küni kéchide aqtu nahiyelik partkom pilal yézisining taziliq kentidin bir yip uchi tapshuruwalghan. Yeni aqtu nahiyesi chiqarghan "'ikki yüzlimichi' lerge da'ir yip uchi bilen teminligüchilerni mukapatlash belgilimisi" boyiche, taziliq yézisidiki bireylen diniy zat ebeydulla yasin üstidin pash qilish matériyali yollighan.

Aqtu nahiyelik partkom shu küni kéchisi taziliq kentige saqchi ewetip, ebeydulla yasinni tutqun qilghan. Shu küni taziliq kentide échilghan "Ammini agahlandurush yighini" da, diniy zat ebeydulla yasinning 2012-yilidin buyan "Pilan sirtida perzentlik bolush, özining diniy we ijtima'iy tesirige tayinip qanunsiz halda kent ishlirigha arilishish" tek bir qatar qilmishliri pash qilin'ghan.

Diniy zat ebeydulla yasinni amma aldida sazayi qilish yighinida uning "Diniy ton'gha orunuwalghan qanunsiz unsur" ikenliki hemde "Kishilerning aldida mötiwerge, keynide iblisqa aylinidighan ikki yüzlimichi" ikenliki heqqidiki matériyal oqup ötülgen.

Biz bu heqte yenimu ilgiriligen halda melumat élish üchün aqtu nahiyesining pilal yéziliq saqchixanisigha téléfon qilduq.

Mezkur saqchixanidiki bir neper Uyghur ayal saqchi taziliq yézisidiki mezkur diniy zatning shu künidiki amma aldida sazayi qilish yighinidin kéyin aqtu nahiyesidiki "Yépiq terbiyelesh merkizi" ge élip kétilgenlikini bildürdi.

Mezkur saqchi ziyaritimiz jeryanida yene, bu déloni pilal yéziliq saqchixana emes, belki aqtu nahiyelik saqchi idarisi biwasite béjirgenlikini, ebeydulla yasinning aqtu nahiyesidiki qaysi "Yépiq terbiyelesh merkizi" ge élip kétilgenlikidin xewirining yoqluqini, hazir künige nechche onlighan kishilerning terbiyelesh merkezlirige yolgha séliniwatqanliqini ilgiri sürdi.

Bu heqte pikir bayan qilghan amérikidiki Uyghur közetküchilerdin doktor qahar barat ependi, xitay hökümitining nöwette Uyghur diyarida élip bériwatqan yoqiri bésimliq siyasitining atalmish "Muqimliq" ni emes, belki téximu zor qarshiliqni keltürüp chiqiridighanliqini tekitlidi.

Toluq bet