Тор сақчилириниң агаһландурушини тапшурувалған янфон ишләткүчиләр дәккә-дүккидә қалған

Мухбиримиз қутлан
2015-11-24
Share
yanfon-uchur.jpg Уйғур елидики бир қисим янфон игилири тор сақчилиридин җиддий агаһландуруш учури тапшурувалған. 2015-Йили ноябир.
AFP

Өткән һәптә парижда йүз бәргән террорлуқ һуҗумидин кейин хитай тор сақчилириниң уйғур районидики әқлий иқтидарлиқ янфон вә интернет ишләткүчиләргә болған контроллуқиниң һәссиләп күчәйгәнлики мәлум.

Хәвәр тепишимизчә, 11-айниң дәсләпки һәптисидин башлап уйғур райониниң мәркизий шәһири үрүмчи һәмдә башқа вилайәт,наһийәләрдики бир қисим янфон игилири тор сақчилиридин җиддий агаһландуруш учури тапшурувалған.

Мәзкур текист учурида мундақ дейилгән: “сақчи шуни алаһидә уқтуридуки, янфон мулазимитиңиз қанун бойичә тохтитип қоюлди. Сақчихана билән дәрһал алақилишиң!”

“нюйорк вақит гезити” му алдинқи күни бу һәқтә мәхсус хәвәр берип, үрүмчидики нам-шәрипини ашкарилашни халимайдиған янфон ишләткүчиләрниң баянлири арқилиқ бу әһвалниң растлиқини дәлиллигән иди.

Биз бу һәқтә райондики уйғур янфон ишләткүчилириниң инкасини билиш үчүн нәқ мәйданға телефон қилдуқ. Үрүмчидин хотәнгә мал йөткәп сатидиған бир уйғур тиҗарәтчи өзиниң алдинқи күни сақчидин җиддий агаһландуруш учури тапшурувалғанлиқини, дәккә-дүккә ичидә телеграф баш ширкитигә барғинида миңлиған кишиләрниң өчирәттә туруп кимлик учурлирини қайта тизимлитиватқанлиқини билдүрди.

У зияритимиз җәрянида өзиниң илгири икки янфони барлиқини, бирини хотәндә өз кимлики билән беҗиргәнликини, йәнә бирини үрүмчидики мал билән тәминләйдиған хитай содигәрниң өз нами билән беҗирип бәргәнликини тилға алди.

Һалбуки, униң үрүмчидә ишлитидиған янфони йеқинда туюқсиз тохтап қалған.Сақчиниң тәлипи бойичә у телеграф баш ширкитигә барғинида иккинчи янфонини өз кимлики билән тизимлитишқа буйрулған.

У йәнә һөкүмәт органлирида хизмәт қилидиған уйғур хадимларниңму йеқиндин буян дәккә-дүккидә қалғанлиқини, өзиниң тамға бастуруш үчүн йеқинда бир идаригә барғинида у йәрдики уйғур хадимларниң янфонидики учурларни ююп-өчүрүш билән аварә болуватқанлиқини баян қилди.

Биз бу һәқтә йәниму илгириләп учур елиш үчүн уйғур райониниң башқа җайлириғиму телефон қилдуқ.

Ақсуниң мәлум наһийәсидин зияритимизни қобул қилған бир уйғур аял телефон сәвәблик көп кишиләрниң тутуп кетилгәнликини, йәрлик даириләрниң телефон ишләткүчиләргә йеңидин бир туташ симкарт тарқитип бәрмәкчи болуватқанлиқини илгири сүрди.

Ават наһийәсиниң мәлум йезисиға хизмәт гурупписи болуп чүшкән бир муқимлиқ кадириму икки һәптә илгири зияритимизни қобул қилип телефон сәвәблик оқуш йешидики 3 балиниң кесилип кәткәнликини ашкара қилған иди.

У зияритимиз җәрянида, сақчилар билән муқимлиқ кадирлириниң қәрәлсиз һалда яшларниң янфонлирини тәкшүрүп туридиғанлиқини тилға алди.

Муһаҗирәттә яшаватқан уйғурларму бу һәқтә радиомиз зияритини қобул қилип йеқиндин буян юртидики уруқ-туғқан вә дост-бурадәрлири билән телефон алақиси елип беришниң интайин қийин болуватқанлиқини билдүрди.

Тәпсилатини аваз улиништин аңлиғайсиз.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт