Toxula saqchixanisi bilen xotendiki yerlik ahaliler bir qisim musulmanche isimlarning cheklen'genlikini delillidi

Muxbirimiz qutlan
2015.09.23
cheklengen-isim-tizimlik.jpeg Xoten qaraqash nahiyesining toxula yéza toxula kent partiye yachéykisi chiqarghan “Cheklen'gen isimlar tizimliki”.
Social Media

Yéqinda xoten wilayitining yéza-kentliride yerlik da'iriler bilen saqchixanilar birliship xelqning öz perzentlirige “Mujahit, muslime, seypidin” qatarliq musulmanche isimlarni qoyushini chekligen.

Bu heqtiki bir yazma uqturush eng deslep ündidar arqiliq jama'etchilikke ashkara bolghan.

“Cheklen'gen isimlar tizimliki” dep nam bérilgen bu uqturushta oghullargha “Sadam, hüseyin, arafat, mujahit, seypidin, seypulla, nesrulla, shemshidin” qatarliq nechche onlighan isimlarni, qizlargha “Muslime, muxlise, ayshe, fatime. Xediche” qatarliq isimlarni qoyushqa bolmaydighanliqi eskertilgen.

Tizimlik qaraqash nahiyesining toxula yézisigha qarashliq toxula kent partiye yachéykisi bilen ahaliler komitéti teripidin chiqirilghan.

Biz mezkur tizimlikni chiqarghan toxula yéziliq hökümet we saqchixanigha téléfon qilip buni delilleshke tirishtuq.

Qaraqash nahiyesige qarashliq toxula yéziliq saqchixana bu heqtiki ichki uqturushning tepsilatini ashkarilashni ret qilghan bolsimu, emma yéziliq siyasiy qanun ishxanisining axunumlargha mexsus yighin échip bu heqte éniq uqturush qilghanliqini bildürdi.

Ziyaritimiz jeryanida bir saqchi xadimi munularni ashkara qildi: “Biz saqchixanida bu tizimlikni saqlap qoymaptuq, emma yéziliq siyasiy qanun ishxanisi kent ahalilirige bu heqte éniq uqturush qilghan. Axunumlarghimu ayrim yighin échip uqturghan. Xoten tewesidiki kishilerning hemmisi hazir qandaq isimlarni qoysa bolmaydighanliqini éniq bilidu.”

Biz bu heqte yene lop nahiyesining layqa yéziliq saqchixanisi bilen yekenning kachong yéziliq saqchixanisigha téléfon qilduq. Ular téléfonimizni qobul qilghan bolsimu, lékin bu heqtiki so'allirimizgha jawab bérishni ret qildi.

Axirida niye nahiyesining melum kentidiki bir Uyghur ayal ziyaritimizni qobul qilip, bu uqturushning rastliqini delillidi. U kent saqchisining buyruqi bilen “Muslime” isimlik qizining ismini yötkeshke mejbur bolghanliqini bildürdi.

Tepsilatini awaz ulinishtin anglighaysiz.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.