Xitay da'iriliri istépa bergen Uyghur kadirlarni tekshürüshke bashlighan

Muxbirimiz gülchéhre
2017-02-22
Élxet
Pikir
Share
Print
Saqchi qurbanjan hebibullaning taratqularda tarqilip yürgen xizmet istépasi.
Saqchi qurbanjan hebibullaning taratqularda tarqilip yürgen xizmet istépasi.
Social Media

Uyghur aptonom rayonining partkom sékrétari bolghan chén chüen'go nöwette Uyghur éli miqyasida partiye intizamini we kadirlarning istilini yaxshilashni qattiq tekitlep, uni muqimliqning kapaliti dep körsetmekte. 11-Féwral küni Uyghur aptonom rayon da'irilirining 2016-yilliq teptish xizmiti xulase yighinidimu, u partiye, hökümet kadirlirigha, özining xizmet mes'uliyitini ada qilmighan hökümet kadirlirining qattiq bir terep qilinidighanliqini qayta tekitlep "Ayrim jaylarda bezi kadirlarning bash nishan'gha bolghan tonushi yéterlik emes, idiyide bixud, istili turaqsiz, küreshtin bizar" dégen idi.

Inkaslardin jay ‏-jaylarda kötürülgen istil tüzitish heriketliride Uyghur kadirlar, memurlar asasliq tekshürüsh nishanigha aylan'ghanliqi, hetta xizmettin istépa bérishni telep qilishningmu, kadirlarning istilida idiyiside mesile barliqining, idiyiwi köz qarishi bash nishan bilen birdek bolmighanliqining ispati süpitide tekshürülüwatqanliqi, qattiq nazaret astigha éliniwatqanliqi ilgiri sürülmekte.

Yéqinda sayahet üchün chet'elge chiqqan, özini ürümchidiki melum hökümet orginining memuri dep tonushturghan birining, nam sheripini ashkarilimasliq sherti bilen radiyomizgha melumat yetküzüshiche, yéngi yil kirgendin bashlap pütkül Uyghur rayon teweside orunlar, tarmaqlar arqa ‏-arqidin seperwerlik yighini échip, partiyilik kadirlarni bash nishanni zich chöridep, "Öginish, yaxshilash, ilgiri sürüsh"mexsus pa'aliyitini élip bérishqa bashlighan. Muqimliqni qoghdash xizmet istilini heqiqiy yaxshilash dégen bahanide Uyghur kadirlar üstidin, matériyal turghuzup, kadir, ishchi, xizmetchilerning xizmet istilini tekshürüshke bashlighan bolup, asasen ularning, xizmet intizamida chéchilangghuluq barmu ? xizmet usuli we pozitsiyeside boshangliq barmu? muqimliq xizmitide xizmet qizghinliqi susmu we xizmettiki mes'uliyetchanliqi shundaqla omumiyet éngi ajizmu dégendek nuqtilarda öz ‏-ara bahalash, ayrim bahalash, özini tekshürüp mesilisini pash qilghanlargha kengchilik qilish, telepchan, rastchil bolmasliqtek istillarni qattiq tüzitishni meqset qilghan heriket dolquni qozghighan.

Bu memurning bildürüshiche, "Idiyiwi köz qarishi bash nishan bilen birdek bolmighanlar idiyisini qet'iy tüzitish, istilini özgertishi kérek" dégen namda élip bériliwatqan bu teqib qilish heriketliride yene, xizmet we siyasiy bésimlar seweblik nurghun memuriy organlardiki Uyghur kadirlar hetta, qanun, teptish sahesidiki bezi Uyghurlarmu baldur dem élishqa chiqishni telep qilghan, beziliri biraqla istépa bérishke bashlighan. Emma,Uyghur kadirlarda qozghalghan bu xil xizmettin boshinish xahishi derhal da'irilerning diqqitini qozghighan we da'iriler tedbir qollinishqa bashlighan bolup, bu ayning béshida aptonom rayonluq partkom katibat bashqarmisidin idare, organlargha istépa bérishni telep qilghan kadirlarning iltimasini istil tekshürüsh xizmitidin kéyin ehwalgha qarap testiqlash heqqide ichki uqturush chöshken, bu ichki höjjetke asasen organlarda, yéqinda istépa bérish iltimasi sun'ghan Uyghur kadirlarning ikki yilghiche tekshürülidighanliqi uqturulghan we iltimasi ret qilin'ghan. Bolupmu, partiyilik kadirlarning eng awwal pasporti yighiwélin'ghan, qattiq telep boyiche idiye we herikitining aptonom rayonluq partkomning tedbir, orunlashturmiliri boyiche nazaret qilinidighanliqi uqturulghan.

Chén chu'en'goning rayonda dawamlashturuwatqan muqimliqni qoghdash qattiq qol siyasiti we bu siyasetni ijra qilish jeryanida bir türküm hökümet emeldarlirini jazalashqa bashlighanliqi melum.

2016-Yili Uyghur diyaridiki teptish organliri 835 neper hökümet kadirning intizamgha xilapliq qilish délosini tekshürüp bir terep qilghanliqini yéqinda élan qilghan idi shundaqla xewerlerdin teptish organlirining 2017-yildiki wezipisining, "Uyghur aptonom rayonidiki ijtima'iy muqimliq we ebediy eminlik bash nishanini chöridep, zorawanliq, térrorluq jinayetlirini qanun boyiche qattiq jazalap, nazaret qilish we tekshürüshni kücheytish" dep belgilen'genliki melum.

Yéqinda, qeshqer wilayiti 20 din oshuq emeldarni qosh til ma'aripi xizmitige bolghan köz qarishi partiye bilen birdek emes, wezipisini ijra qilmidi" dégen seweb bolghan emilidin boshatqan. Qeshqer wilayitide 37 neper yerlik kadirning "Qosh tilliq yesli" qurulushida "Mejburiyitini ada qilmighan" dégen qalpaq bilen jawabkarliqqa tartilghanliqi ilgiri sürülgen idi.

Da'iriler 10-féwral küni élan qilghan hökümet xewiridimu xitay intizam tekshürüsh tarmaqliri bir Uyghur ma'arip emeldari bilen 6 neper Uyghur j x kadiri üstidin tekshürüsh élip bérishqa bashlighanliqini élan qildi. Uyghur aptonom rayonluq ma'arip nazaritining sabiq mu'awin partkom sékrétari we naziri sattar dawut qatarliqlarni öz ichige alghan 7 neper Uyghur kadirni "Xizmette mes'uliyitini ada qilmasliq, wezipe ijra qilishta mes'uliyitini ada qilmasliq, biperwaliq qilish, diniy radikalliq we milliy bölgünchilik heriketlirige zerbe bérishte iradisi mustehkem bolmasliq, ikki yüzlimilik qilish" qatarliq jinayetlerni artip jazalighanliqi melum.

Da'irilerning yéqindin buyan muqimliqni tekitlep, qattiq basturushni kücheytkenliki we öz siyasitini ijra qiliwatqan hökümet kadirlirining, bolupmu Uyghur qatarliq yerlik milletlerdin bolghan hökümet kadirlirining sadaqitini sinawatqanliqi amérikidiki bir sabiq mehelle komitét kadirining bayanliri arqiliq ispatlandi.

Xitay da'irilirining pasport yighish herikiti bashlaydighanliqi xewirini anglapla chet'elge chiqiwalghanliqini we qaytip ketmeslik qarari alghanliqini bayan qilghan bu yash kadir, esli ürümchidiki melum mehelle komitétining kadiri bolup, chet'elge chiqish aldida idarisidin yoshurup, doxturda dawalinish bahaniside ruxset sorap qachqanliqini bayan qildi. Lékin, uning qéchishi nöwette hökümet ornida xizmet qiliwatqan ata ‏-anisining istil tekshürüshidiki bir éghir mesilige aylan'ghan bolup, da'iriler dadisining muddettin baldur dem élishqa chiqish resmiyitinimu testiqlimighan, qizini qayturup kélishke qistighan we ikki yil istil tekshürüsh möhliti bergen we bu jeryanda ma'ashiningmu toluq bérilmey tutup qélinidighanliqini uqturghan. Bu yash, özining xitay hökümitining türlük siyasiy bésimliridin qéchip qutulghan bolsimu, emma hazir özi seweblik ata -anisi uchrawatqan adaletsizliklerdin éghir rohiy bésimgha duchar boluwatqanliqini bildürdi.

Da'irilerning nöwette Uyghur kadirlargha qarita zerbe bérish dolquni qozghishigha diqqet qilip kéliwatqan chet'ellerdiki Uyghur közetküchilerdin, amérika Uyghur birlikining re'isi ilshat hesen ependi da'irilerning rayondiki hökümet kadirlirigha, bolupmu Uyghur qatarliq yerlik milletlerdin bolghan kadirlargha qarita bu xil zerbe bérish we jazalash herikiti yürgüzüshidiki meqsiti heqqide toxtilip, chén chüen'goning bu xil tazilash herikiti arqiliq, rayonda yürgüzüwatqan qattiq qolluq basturush siyasitini ijra qilishta Uyghurlargha hésdashliqi bar, milliy héssiyati bar kadirlarni shallawatqanliqini we muqimliq xizmitidiki meghlubiyitining jawabkarliqini bu bir türküm hökümet emeldarlirigha artip, ularni jazalash arqiliq, bashqilargha özige sadiq bolushni agahlanduruwatqanliqini, istépa bergen kadirlarni bolsa, ikki yilghiche tekshürüsh arqiliq nazaret astigha élip, xitay hökümet we partiye ichidiki kadirlarda naraziliqini héch bolmighanda istépa bérish arqiliq ipadileshtek bir dolqunning kéngiyip kétishining, yüz bérish éhtimali bolghan téximu zor qarshiliq heriketlirining aldini élishqa urunuwatqanliqini mulahize qildi.

"Shinjang géziti" ning Uyghur aptonom rayonluq partkomning 1-ayning 7-küni chüshtin burun muqimliqni qoghdash téléwiziye-téléfon yighini achqanliqi heqqidiki xewiride, chén chüen'goning her derijilik partkom, xelq qurultiyi, xelq hökümiti, siyasiy kéngesh we bingtu'enning, muqimliqni qoghdashni hemmini bésip chüshidighan muhim wezipe qilishini tekitlep, "Yaxshi kadir ölchimide ching turup, aptonom rayondiki kadirlar qoshuni arisida ''semimiy adem bolush, semimiy söz qilish, semimiy ish qilish'' yönilishi turghuzup, sadiqliq bilen mes'uliyitini ada qilish, keypiyati toghra bolghan yönilishni we hakimiyet yürgüzüsh muhitini shekillendürüsh kérek." dégen bayanliri neqil élin'ghan idi.

Pikirler (1)
Share

Isimsiz oqurmen

Sewda sewda isimlik bir tordashning fésiboktiki inkasi,
Her bir Uyghurning oqup chiqishini tewsiye qilimen.

Sawda Sawda
Wetendin hijret qilip chiqwalsaq nurghun mujahid bizni saqlawitiptu,, biz chiqsaqla ular biz bilen bille qoral kötrüp kirmekchi iken.
Qurban hiyit namizini qeshqer hiyitgahta oqumaqchi iken. Digen xewer tarqilip minglarche onminglarche ,, hetta uningdin köp qirindashlar chiketken hijretke,, saqlisaq xewer yoq ,, yene adem chiqsun digen gep ,, pul pul pul digen gep ,, he diduq ,, "Bizge tilfun qilsun, nime gep? qachan kiridiken?" disek, "Qoshunda tüzüm bar'iken, tilfun qilsa bolmaydiken" digen gep ,, towa! pul dise tilfun urdu, sodigha pul kemlep qalghan dep ,, ejiba biz millet aldanduqmu? nime digli turghan zamanda shundaq tutqun qilghili turdiki bu xitay ,, ya alla özeng kupaye qil diduq ,, xitayning ichkiri ölkisining bir yirde tutulup qalghan Uyghurmu 10yilliqtin kem emes kisilishke bashlidi.
Hem nurghun qirindashlar kisilip ketti ,, yene shu waqittimu u hijret toxtimidi pul yighlip turdi.

Nime üchün wetende turup urush qilmaymiz dep sorsam,
Xelipemning bayriqining astigha yighlip kirmisek jahil murted bolup qalimiz digen petiwa keldi --- he deptuq.
Shu petwani bizni aldap sürgenlerge allah kupaye.
Milyon etrapida qirindashlar tajawuzchi bandit xitayning türmiside heqsiz ishlemchilik qilwatidu xitay üchün ,, biz fesbok oynap tixi shu Uyghurni tillap biletchilik qilwatimiz ,,,
Uyghur bek aqköngül hem bek döt bolsaq kirek.

Sawda Sawda
Weten sirtidiki xewerlerning mushu bire yilningyaqi bilgen xewerning 10%ni bilgen bolsam wetendin chiqmay ,, ishni wetende qilattim ,, xelipemni saqlap oltamaytim.
Sawda Sawda
Xitay ölse dewzexke mangatti ,, men ölgen bolsam jennetke mangattim ,, epsus shundaq bir kün wetende nisip bola dep arzu qilwatimen ,, tügige minip tüge izdep ,, tügidin chüshüp tüge izdep yürüptimen sersane halda
Sawda Sawda
Hazir weten'ge du'a qilishtin bashqigha yarmidim,,
Sawda Sawda
Hazir özemning qirindashlirim üchün du'a qilishtin bashqigha yarmidim
Sawda Sawda
Tajawuzchi xitayning hili mikrige allah kupaye
Sawda Sawda
Uyghurni sitip xejilgenlerge allah kupaye
Sawda Sawda
Wetenni sitip xejiligenlerge allah kupaye
Sawda Sawda
Wetinimiz sherqiy türkistanning ichi tol we yitimlargha toshti ,, hetta tajawuzchi bandit xitay türmige kirip qalghanlarning a'ilisidikilerge yardem qilip anche munche pul bergenlerni paylap yürüp tutiwatidu
Hazir wetende musulman'gha hichkim yardem qilalmaydu hetta mehellisidiki tol iri türmidiki ayalgha yardem qilishmu xitayning qanunigha xilap ,,,sözlep kelsem bu taqqu tuqqu geplirim jiq ,, emma hemmesi ras gep
Mining yürküm shundaq bek aghridu bu künlerde
Nawada mini bir Uyghur qirindishim dep körsingizla manga bir du'a qilip qoyungizlar
Allah hemmimizni birliship weten'ge qaytip tajawuzchi bandit bulangchi xitayni qoghlap chiqarghili nisip qilsun ,, weten sirtida tillisaqmu bu iplas xitaygha gep we til ötmeydiken

Feb 23, 2017 04:06 AM

Toluq bet