Közetküchiler xitay köchmenlirining Uyghur diyarigha yerleshtürülüshige inkas qayturdi

Shinxu'a agéntliqining xewiridin ashkarilinishiche, bu yil Uyghur aptonom rayonigha jiddiy éhtiyajliq bolghan “Ixtisasliq xadimlar” 28 ming 137 neper bolup, xitay ölkiliridiki dangliq uniwérsitétlardin Uyghur aptonom rayonidiki hökümet organlirigha 1-türkümde 1755 neper kishi qobul qilinidiken.

Mezkur xewer élan qilin'ghan mezgilde tengritagh tori xewer bérip, bu yil aliy mekteplerni tügetkendin kéyin xitay ölkilirige ewetilip terbiyelinidighan omumiy oqughuchi sanining 4000 neper ikenlikini, 2011-yili bu xizmet yolgha qoyulghandin buyan hazirghiche Uyghur diyaridin jem'iy 45 ming neper aliy mektep oqughuchisining mushu xildiki siyasiy-idiye “Terbiye” sidin ötküzülgenlikini ashkarilidi.

Ishsizliq mesilisi Uyghur éli weziyitini közetküchilerning uzundin buyanqi diqqet nuqtisi bolup, oxshash mezgilide élan qilin'ghan bu xewerler Uyghur weziyitini yéqindin közitip kéliwatqan chet'ellerdiki Uyghur ziyaliyliri we pa'aliyetchilirining jiddiy diqqitini qozghidi.

Amérika alem qatnishi idarisining tetqiqatchisi erkin sidiq ependining qarishiche, Uyghur diyarida ishsizliq éghirlashqan, uniwérsitétni tügetken oqughuchilar “Qayta terbiye” ge ewetiliwatqan, yéza yashliri “Xelq ishchisi” dégen namlarda türküm-türkümlep xitay ölke-sheherlirige yötkiliwatqan shara'itta, rayondiki ish pursetlirining “Ixtisasliq xadimlar” dégen namdiki xitay köchmenlirige bérilishi Uyghurlargha qaritilghan milliy kemsitish siyasitining ashkara ipadilinishi iken.

Doktor erkin sidiq ependi yene Uyghur yashlirining her xil namlarda xitay ölke-sheherlirige tarqaqlashturulushining ziyini heqqide toxtilip, nöwette Uyghurlarning siyasiy jehettin hoquqsizlandurush, iqtisadiy jehettin tereqqiyatning sirtida qaldurulush, medeniyet jehette milliy kimlikidin ayrilish xewpide turuwatqanliqini agahlandurdi.

Dunya Uyghur qurultiyining bayanatchisi dilshat rishit ependining qarishiche, xitay xewerliride tilgha élin'ghan atalmish 28 ming neper xitay “Ixtisas igisi” ni qobul qilish élani xitay hökümitining 1949-yildin buyan dawamlashturup kéliwatqan Uyghur rayonidiki xata siyasitining yene tekrarlinishi bolup, bu xil tengsiz siyaset rayondiki ziddiyetni téximu ötkürleshtürüwétidiken.

Dilshat rishit ependi axirida yene rayondiki bu xil tengsiz siyasetning axirqi hésabta Uyghurlarning naraziliqi we qarshiliq heriketlirige ot piltisi bolup qalidighanliqini agahlandurdi.