Ju yüngkangning jinayi pakitliri ashkarilinishqa bashlidi

Muxbirimiz méhriban
2013.12.06
ju-yungkang-305.jpg Xitay merkizi komitét siyasiy byurosining da'imiy ezasi ju yungkang xitay ikki chong yighinining échilish murasimida. 2012-Yili 5-mart, béyjing.
AFP


Ju yungkangning qolgha élin'ghanliq xewiri tarqalghandin kéyin, uning qolgha élinishidiki jinayi pakitlarmu ashkarilinishqa bashlidi. Bularning ichide ju yüngkang sichüen ölkisining partkom sékritari bolup turghan mezgilide, ilgiriki ayalini aptomobil soqulush weqesi peyda qilip, qestlep öltürgenlikige da'ir pakitlar we ju yüngkangning biwaste pilanlishi bilen peyda qilin'ghan shi jingpingni ikki qétim qestlesh weqesi qatarliqlar, ju yüngkangning parixorluq qilmishliridinmu éghir bolghan jinayi pakitliri süpitide chet'ellerdiki xitay tor béketliri we xelq'ara metbu'atlarda élan qilinishqa bashlidi.

Chet'ellerdiki xitay xewer menbeliri 5 - ,6 - dékabir künliri ju yüngkang a'ilisidiki yene bashqa ezalarningmu qolgha élin'ghanliqini we ju yüngkangning jinayi qilmishlirigha a'it téximu jiq pakitlarning ashkarilan'ghanliqini xewer qildi.

Boshün torining 6 - dékabirdiki xewiride déyilishiche, 5 - dékabir küni béyjingdin ewetilgen bixeterlik saqchiliri siyasiy qanun komitétining sabiq bashliqi ju yüngkangning ikki inisi we singlisini ularning jyangsu ölkiside ishlewatqan shirkitidin élip ketken. Xewerde yézilishiche, bu ju yüngkang we uning kéyinki ayali 1 - dékabir küni béyjing jungnenxeydiki öyidin élip kétilgendin kéyin, mushu hepte ichide ju jemeti a'ilisidiki bashqa ezalarningmu tutqun qilinishi bolup, bixeterlik xadimliri yene ju jemetining shirkitidin nechche milyon qimmitidiki neq pul we pul chékinimu élip ketken.

Ju yüngkangning qolgha élinishidiki jinayi pakitlar heqqide élan qilin'ghan xewerlerde déyilishiche, nöwette xitay merkizi intizam tekshürüsh komitéti ju yüngkangning jinayi qilmishlirigha a'it pakitlarni ashkara élan qilmighan bolsimu, emma ehwaldin xewerdar bolghan xitayning yuqiri derijilik emeldarliri chet'ellerdiki xitay tor béketliride ju yüngkanggha artilghan jinayi pakitlarni ashkariliwetken.

Boshün torining 5 - dékabirdiki xewiride déyilishiche, ju yüngkangning ilgiriki ayalini qestlep öltürüshke qatnashqan uning ikki shopuri bu yil 8 - ayning axiri ishlewatqan yéri ghalbiyet néfitlikidin tutup kélin'gen bolup, bundin 10 yillar ilgiri, ju yüngkang sichüen ölkisining partkom sékritari bolup turghan mezgilide qol astidiki emeldar go yungshyanggha buyruq qilip, aptomobil suqulush weqesi peyda qilish arqiliq ilgiriki ayalini qestlep öltürgen. Eyni waqitta aptomobil qazasini peyda qilghan ikki neper shopur qoralliq saqchilar bolup, bu ikkeylen weqedin kéyin,qolgha élinip 15 yildin 20 yilghiche bolghan qamaq jazasigha höküm qilin'ghan bolsimu, emma 3 - 4 yildin kéyinla qoyup bérilip, her ikkisi ghalbiyet néfitlikige xizmetke orunlashturulghan. Ikkeylenning biri aptomobil kalonining bashliqi, yene biri kéyin sendung néfitlikige yötkilip mu'awin dériktor qilin'ghan. Boshün torining xewiride yene mundaq bayanlar bérilgen “Ju yüngkangning sichüendiki 2 - oghli ju xen anisini qestlep öltürüldi dep qarighachqa, dadisi ju yüngkang bilen bolghan barliq munasiwetni üzgen we chéngduda bir kichik kitab dukini échip tirikchilik qilghan. Newrisi tughulghandin kéyin ju yüngkang 2 - oghli ju xenning öyige kélip oghul newrisini körüshni telep qilghan bolsimu, emma ju xen dadisigha özining uni menggü körüshni xalimaydighanliqini éytqan.”

Teywen merkizi agéntliqining 6 - dékabirdiki xewiride déyilishiche, “Xitay merkizi hökümitining nöwette ju yüngkanggha artidighan jinayiti, siyasi özgirish qozghap bo shileyni textke chiqirish arqiliq, özi perde arqisida turup biwaste bashqurush؛ nöwettiki xitay re'isi shi jingpingni qestlep öltürüshni pilanlash؛ hésabsiz derijidiki parixorluq qilmishliri we ilgiriki ayalini qestlep öltürüsh qatarliq köp xil jinayetler bolushi mumkin iken.

Bügünki xelq'ara metbu'atlar we chet'ellerdiki xitay xewerliride yene shi jingpingning 5 - dékabir küni amérika mu'awin prézidénti jow baydin bilen élip barghan söhbitining 5 sa'ettin artuq dawam qilghanliqi alahide tilgha élinip, ikkeylenning muxbirlardin xali élip barghan söhbitide,jow baydinning, bo shileyning qol astidiki emeldar wang lijünning 2012 - yili amérika konsulxanisigha kiriwalghan chaghda bo shiley we ju yüngkangning jinayi pakitliri toghriliq qandaq matériyallarni tapshurghanliqi heqqidiki perezlermu otturigha qoyuldi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.