Канада шәрқий түркистан җәмийити қурулди

Мухбиримиз гүлчеһрә
2018-10-17
Елхәт
Пикир
Share
Принт
Канада шәрқий түркистан җәмийитиниң рәиси актип сиясий паалийәтчи туйғун абдувәли әпәнди.
Канада шәрқий түркистан җәмийитиниң рәиси актип сиясий паалийәтчи туйғун абдувәли әпәнди.
RFA/Ekrem

Канада дунядики чоң дөләтләрдин бири шундақла уйғурлар давамлиқ көпийиватқан бир дөләт. Нөвәттики уйғур елиниң җиддий вәзийити, чәтәлләрдики уйғур дәвасини йәниму күчлүк аңлитишқа болған тәқәзза, канададики уйғур җамаити вә канададики уйғур тәшкилатлирини бирликкә кәлтүрүп, ортақ қоллайдиған бир тәшкилатини қуруп чиқип, бир нишан, бир мәқсәт астиға уюшушиға түрткә болмақта. Әнә шу нишан билән 2018-йили 14-өктәбир күни канаданиң торонто шәһиридә 200 дин артуқ уйғурниң қатнишиши билән «канада шәрқий түркистан җәмийити» ниң қурулуш мурасими өткүзүлгән.

Мурасимда йәнә мәзкур тәшкилатниң сайлам нәтиҗиси елан қилинған болуп, торонто, ванковер, монтериял, алберта, калгари қатарлиқ 5 шәһәрдики уйғур җамаитиниң демократик усулда елип барған сайлими нәтиҗисидә 184 аваз билән 15 йил бурун канадаға йәрләшкән уйғур шаири, актип сиясий паалийәтчи туйғун абдувәли мәзкур тәшкилат рәисликигә сайланған. У мурасимда ай юлтузлуқ көк байрақни сөйүп туруп, вәзипә тапшурувалған.

Канадаға әң бурун йәрләшкән уйғурлардин уйғур зиялийси шавкәт әпәнди канада шәрқий түркистан җәмийитиниң қурулушиниң вә туйғун абдувәлиниң рәис болуп сайлинишиниң канада җамаитиниң ортақ арзуси билән вуҗудқа чиққанлиқини билдүрди. У бу йеңи җәмийәтниң қурулушиниң канададики уйғур җамаитила әмәс, бәлки пүтүн уйғур хәлқигә бир хәйрлик иш болушидин үмиди зор икәнликини тәкитлиди. Шавкәт әпәнди йәнә «йеңи қурулған бу тәшкилат канада һөкүмити билән болған алақини күчәйтишни әң муһим хизмәт сүпитидә тутуши керәк» дегән қарашлирини оттуриға қойди.

Зияритимизни қобул қилған канада шәрқий түркистан җәмийитиниң рәиси туйғун абдувәли әпәнди сайламға өзини намзат көрситишкә түрткә болған ташқи күчниң нөвәттә күнсайин яманлишиватқан уйғурлар вәзийити болған болса, ички күчниң изчил давамлаштуруватқан қәләм күришидин башқа, 15 йилдин буян өзиниң муһаҗирәттики һаятида мәйли канададики уйғур тәшкилатлирида вә яки дуня уйғур қурултийида 8 йил катип болуп хизмәтләрни атқуруш җәрянида топлиған тәшкилатчилиқ һәм тәҗрибилири икәнликини билдүрди.

Туйғун абдувәли әпәнди гәрчә канада шәрқий түркистан җәмийити әмдила қурулған яш тәшкилат болсиму, әмма тәшкилатниң 1933-йили қурулған шәрқий түркистан җумһурийитиниң изини бесишни мәқсәт қилған, сабит дамолламниң идеологийәсини йетәкчи идийә асаси қилған бир уйғур тәшкилати болуш сүпити билән уйғурлар дәвасини елип баридиғанлиқини дәп билдүрди.

Тәшкилат рәиси туйғун абдувәли әпәнди вәзипә тапшурувалған күнниң әтисидин башлап өзиниң 10 түрлүк хизмәт пилани бойичә хизмәтлирини башлиған болуп, тәшкилат өзиниң паалийәтлири вә уйғурлар һәққидә алдимизда ишқа кириштүрүлидиған «таңнури» тор телевизийәси билән тәшвиқат хизмәтлириниму күчәйтмәкчи икән.

Пикирләр (0)
Share
Толуқ бәт