Baydiki kömürkan'gha hujum qilish weqesining yene bir qisim tepsilati ashkarilandi
2015.09.24
Melum bolushiche, 18-séntebir küni seherde bay nahiyisidiki soghan kömür kénigha hujum qilghan pida'iylar aldi bilen kanda wezipe ötewatqan amanliq xadimliri we kan xojayinlirigha zerbe bergen, arqidin ular ehwalni térek bazarliq saqchixanigha melum qilip saqchilarning weqe meydanigha kélishini yol tosup kütken, mezkur saqchixanining bir guruppa xadimi bir saqchi aptomobili bilen neq meydan'gha yéqinlap kéliwatqan chéghida, pida'iylar kömür bésilghan bir yük aptomobili bilen saqchi aptomobilini soqqan we saqchilarning aptomobil soqulushtin yarilan'ghan we alaqzade bolghan pursitidin paydilinip, saqchilargha pichaq we kaltek bilen ejellik zerbe bergen.
Pida'iylar shu meydanda 5 saqchini öltürgendin kéyin teweliktiki tagh baghrigha chékin'gen. Nöwette xitay qoralliq qisimliri tagh baghrini qorshash we charlash opératsiyesi élip barmaqta.
Yuqiriqi bir qisim uchur we radi'omiz xitayche bölümining baydiki xitay ahaliliridin igiligen melumatlargha qaralghanda, pida'iylarning kömür kandiki kapsul we partlatquch saqlan'ghan ambarni qorshawgha alghanliqi melum, emma pida'iylarning mezkur ambarni néme üchün qorshawgha alghanliqi, uningdiki partlatquchlarni qollirigha alghan yaki almighanliqi, shundaqla weqe dawamida bu partlatquchlarni qollan'ghan-qollanmighanliqi hazirche ayding emes.