Хитай даирилириниң лагерларни тәкшүрүшкә қарита бир сахта сәһнә һазирлаватқанлиқи ашкариланди

Мухбиримиз шөһрәт һошур
2018-12-07
Елхәт
Пикир
Share
Принт
Тәрбийәләш лагеридикиләргә түрмидики мәһбусларға охшаш кийим кийдүрүлгән болуп, йиғин ечиватқан көрүнүш.
Тәрбийәләш лагеридикиләргә түрмидики мәһбусларға охшаш кийим кийдүрүлгән болуп, йиғин ечиватқан көрүнүш.
Social Media

Алдинқи күни аңлиғучиримиздин бири радийоға инкас йоллап, ақсуниң ават наһийәсидики 3 аталмиш тәрбийә мәркизидин бириниң тамлиридики тикәнлик симниң вә ятақлиридики камераларниң еливетилгәнлики вә бу арқилиқ йеқинда келидиған бир тәкшүрүш өмикигә қарита көрүнүш пәйда қиливатқанлиқини паш қилди. Мухбиримизниң бу һәқтики ениқлашлири давамида, ғулҗида кадирларниң өйму-кирип аһалиләргә вәзийәт һәққидә гәп өгитиватқанлиқи, илгири хитай байриқи есилған бир қисим орунларға дутар қатарлиқ чалғу әсваблириниң моделлириниң есилғанлиқи ; қәшқәрдә сақчиларниң аһалиләрни зиярәт қилип тәкшүригүчиләр кәлгәндә хата гәп қилип қалмаслиқ һәққидә агаһландуриватқанлиқи ашкариланди.

Радийомизға кәлгән бу мәктупта ақсу аватта 1‏-, 2‏-вә 3‏-тәрбийәләш мәркизи намида 3 орунда лагер барлиқи, даириләрниң буларниң иккинчисидики 5700 тутқундин 2700 ни йеқинда биринчи вә үчинчи «тәрбийәләш мәркизи» гә йөткигәнлики баян қилинған. Мәктупта йәнә дейилишичә бу мәркәз мәлум бир тәкшүрүш гурупписиға қарита мәхсус тәйярлиниватқан болуп, даириләр ишчи--хизмәтчи вә аһаилиләрни әгәр бирлири «аватта қанчә лагер бар дәп сорап қалса», «бирла лагер бар» дәп җаваб беришкә буйриған. Мәктупта йәнә әскәртилишичә, 2 ‏-тәрбийәләш мәркизиниң тамлиридики тикәнлик симлар еливетилгән, аталмиш оқуғучлар ятиқиниң ишик вә деризилиригә қапланған төмүр тахтилириму еливетилгән. Биз бу учурниң тоғра-хаталиқини ениқлаш үчүн ақсу аваттики алақидар сақчи орунлириға телефон қилдуқ. Сақчилардин бири юқиридин келидиған тәкшүрүшкә қарита қандақ тәйярлиқта икәнликини сориғинимизда, бу һәқтә телефонда мәлумат берәлмәйдиғанлиқини ейтти. Йәнә бир хадим өзиниң бундақ бир уқтуруштин хәвири йоқлуқини ейтти. 

Нөвәттә оттура асияда тиҗарәт қиливатқан бирәйлән, ғулҗиниң вәзийити һәққидә әң йеқинда аңлиғанлири һәққидә мәлумат бәрди. Униң дейишичә ғулҗиниң бәзи җайлирида кадирлар өйму-өй зиярәт қилип, аһалиләргә вәзийәт һәққидә немиләрни дейиш, немиләрни демәслик һәққидә гәп өгәткән. Кадирлар очуқ һалда аһалиләргә пат йеқинда бир тәкшүрүш гурупписи келидиғанлиқи, бу гуруппа кәлгәндә гәп-сөзигә интайин пәхәс болуши керәклики, әгәр гәптин кетип қалса үч әвладқа қәдәр чекит урулуп назарәт қилинидиғанлиқини уқтурған. Йәнә бу тиҗарәтчиниң чеградин кирип-чиқиватқанлардин аңлиғанлириға асасән баян қилишичә, даириләр кәнт ишханиси вә қорулиридики бир қисим қизил байрақлар орниға дутар вә тәмбүр қатарлиқ чалғу әсваблириниң моделлирини асқан. Аһалиләрни усул вә нахша мәшқ қилғузуп тәкшүргүчиләр кәлгәндә кәйпиятини қизғин вә үстүн тутушни, бичарә яки ғәмкин көрүнмәсликни тапилиған. Йәнә мәлум болушичә даириләр тәкшүргүчиләр кәлгәндә немиләрни дейишни бир қәғәзгә йезип көрситип, аһалиләр уни ядлап болғандин кейин қәғәзни йиғивалған. 

Қәшқәр қағилиқтики бир сақчи хадими, өзлириниң юқиридин келидиған бир тәкшүрүштин хәвири вә буниңға қарита тәйярлиқи барлиқини ейтти; әмма у бу тәйярлиқниң тәпсилатини бир дәриҗә юқири орунлардин тәкшүришимиз керәкликини ейтти. Қәшқәр йеңишәһәрдики йәнә бир сақчи хадими нөвәттә сақчиларниң келидиған бир тәкшүрүшкә қарита җиддий бир тәйярлиқта икәнликини паш қилиш билән бирликтә; бир қисим лагерларда тикәнлик симларниң вә ятақларда камераларниң еливетилгәнликини тилға алди. Бу хадимму тәкшүрүшниң нәдин келидиғанлиқи вә қачан келидиғанлиқи һәққидә өзиниң техи мәлумату йоқлуқини, бу һәқтә юқири дәриҗилик органларниңла мәлумат берәләйдиғанлиқини ейтти. 

Һөрмәтлик радио аңлиғучилар, юқириқи учурлардин уйғур районида даириләрниң йеқин мәзгилдә келидиған бир тәкшүрүш гурупписи үчүн сүний сәһнә һазирлаватқанлиқи ашкариланди; әмма келидиған бу тәкшүрүш өмикиниң кимләр икәнлики техи айдиңлашмиди.

Пикирләр (0)
Share
Толуқ бәт