Enqere uniwérsitétining aspiranti meryem sultanning apisi aygül sultanning lagérda ikenliki delillendi

Muxbirimiz shöhret hoshur
2018-10-22
Élxet
Pikir
Share
Print
Enqere uniwérsitétining magistir aspiranti meryem sultan.
Enqere uniwérsitétining magistir aspiranti meryem sultan.
Meryem Sultan teminligen

Enqere uniwérsitétining magistir aspiranti meryem sultan yéqinda ijtima'iy taratqularda guwahliq bérip, özining aqsu onsu nahiyesidiki apisi, pénsiyege chiqqan péshqedem oqutquchi aygül sultanning bir yildin béri yighiwélish lagérida ikenlikini, uning salametlik ehwalidin qattiq endishe qiliwatqanliqini bayan qilghan idi. Muxbirimizning onsu nahiyesige qarita élip barghan téléfon ziyaretliri dawamida aygül sultan xanimning bultur‏‏ 10‏-ayda lagérgha élip kétilgenliki delillendi. Éniqlashlirimiz dawamida uning lagérgha onsu nahiye baziridiki shichéng (gherbi sheher) saqchixanisi xadimliri teripidin élip kétilgenliki aydinglashti.

Anglawatqininglar enqere uniwérsitétining magistir aspiranti meryem sultanning apisi aygül sultan heqqidiki guwahliq bayanati. Bayanattin melum bolushiche, magistir oqughuchi meryem sultan mu'ahjirettiki köp sandiki Uyghurlargha oxshashla bultur 3‏-aydin bashlap yurtidiki a'ilisi bilen alaqilishishke imkansiz qalghan. U kéyin ündidardiki dostliri arqiliq apisining yighiwélish lagérida ikenlikinidin xewer tapqan.

Biz bu uchurning toghra-xataliqini delillesh üchün aqsuning onsu nahiyesidiki alaqidar orunlargha téléfon qilduq. Onsu nahiye onsu bazarliq edliye ponkitining xadimi aygül sultaning bir yildin buyan lagérda ikenliki ashkarilidi. Biz aygül sultanning qaysi lagérda ikenlikini sorighinimizda u uning onsu nahiye 1‏-ottura mekteptin pénsiyege chiqqanliqini tilgha élip, bu heqte nahiyelik ma'arip idarisi yaki 1‏-ottura mekteptin melumat élishimizni tewsiye qildi. Nahiyelik ma'arip idarisining xadimi bolsa özlirining aygül sultanning qaysi lagérda ikenliki heqqide melumat bérish hoquqining yoqluqini éytti. U hetta yuqirining telipi boyiche, 1‏-ottura mektepning téléfon nomurinimu dep bérelmeydighanliqini bayan qildi.

Bizning ilgiriki éniqlashlirimiz dawamida onsuning yangaq meydani, 2‏-ottura mektep, partiye mektipi we qizil yézisi qatarliq 4 orunda yighiwélish lagéri barliqi aydinglashqan idi. Biz onsu bazarliq saqchi xadimidin aygül sultan xanimning yuqiriqi 4 lagéridin qaysida ikenlikini soriduq we lagérgha qaysi saqchixana teripidin ekétilgenliki heqqide melumat telep qilduq. Saqchi xadimliridin biri aygül sultanning nahiye bazar ichidiki "Shichéng" yeni gherbiy sheher saqchixanisi teripidin lagérgha apirilghanliqini ashkarilidi.

Magistir aspirant meryem sultanning apisi heqqide élan qilghan in'glizche bayanatida apisining özige western union shirkiti arqiliq pul salghanliqi üchün tutulghanliqini ilgiri sürgen. Biz onsu nahiye baziridiki alaqidar saqchi xadimidin aygül sultan xanimning tutqun qilinish sewebi heqqide melumat soriduq. Bu xadim aygül xanimning lagérda ikenlikini inkar qilmasliq bilen birlikte bu heqte saqchixana bashliqidin melumat élishimizni tewsiye qildi. U bu jeryanda özining aygül sultan xanimning tutulush sewebidin xewiri barliqini yoshurmidi.

Magistir aspirant meryem sultan guwahliq bayanida apisining salametlik ehwalidin qattiq endishe qiliwatqanliqini bildürüsh bilen birlikte apisining ehwalidin uchur élish we lagérdin qoyup bérilishi jehette xelq'ara jama'ettin yardem telep qilghan. U bayanatida özining türkiyege xitay özi bergen pasport we oqughuchiliq wizisi bilen kelgenliki, türkiyediki oqush hayati dawamida xitay yaki türkiyening qanunlirigha qarshi héchqandaq bir pa'aliyette bolmighanliqini eskertken.

Yuqiriqi éniqlashlirimiz dawamida xadimlarning témidin özini qachurush sewebidin aygül sultan xanimning qizigha pul salghanliqi üchün tutulghanliqi téxi delillenmidi. Emma ötken yili ghulja nahiyesidiki yighiwélish lagérida solinip yatqan bir tutqunni ziyaret qilghan waqtimizda u inisining türkiyede oquwatqan oghligha pul salghanliqi üchün üchün béshigha qara xalta kiydürülüp yighiwélish lagérigha élip kétilgenlikini bayan qilghan idi.

Toluq bet