Уйғур районида “йиғивелиш лагерлири” пәйда қилған бир қисим қошумчә ақивәтләр ашкариланди

Мухбиримиз шөһрәт һошур
2018.12.05
Share on WhatsApp
Share on WhatsApp
lager-uyghur-ayal-topa-toshughan.jpg Мәлум йезидики аяллар һарвида топа тошуватқан көрүнүш. 2018-Йили 21-сентәбир, хотән.
AP

Уйғур районидики йиғивелиш лагерлири һәққидә елип барған ениқлашлиримиз давамида алақидар хадимлар хитай даирилириниң йиғивелиш лагериға әкетилгәнләрниң аилә-тавабиатлириға қиливатқан аталмиш ғәмхорлуқлири һәққидә мәлумат бәрди.

Дейилишичә, лагерлар сәвәблик йезиларда әмгәк күчи қалмиғанлиқтин, даириләр, тәтилгә кәлгән алий мәктәп оқуғучилири вә төвәнгә чүшкән кадирлардин пидаийлар гурупписи тәшкилләп, аһалиләрниң деһқанчилиқ ишлирини шуларға қилдурған. Аһалиләр қәрз копиратиптин алған қәрзини төләшкә амалсиз қалғачқа, уларға берилгән қәрзниң өсүмини төвәнләткән.

Хитай даирилири хәлқара сәһниләрдә, уйғур районида тәсис қилған йиғивелиш лагерлирини кәспий тәрбийә орни дәп сүпәтләватқан вә униң хәлққә қулайлиқ яритип бериватқанлиқини тәшвиқ қиливатқан болсиму, әмма униң бир “җаза лагерлири” икәнлики униң уйғур җәмийитигә көрсәткән һәр хил тәсирлиридин ашкарилинип турмақта.

Мәлум болушичә, қәшқәрниң мәлум бир йезисида, нопусниң 50% и аталмиш тәрбийәләшкә әкетилгәнлики үчүн, мәһәллиләрдә әмгәк күчи асасән қалмиған. Алақидар хадимлардин бири һөкүмәтниң аталмиш тәрбийәләшкә әкетилгәнләрниң аилисини ташливәтмигәнлики; уларниң деһқанчилиқ ишлириға ярдәмлишиватқанлиқини тилға алди. Бу хадимниң дейишичә, даириләр аһалиләрниң түрлүк пәсил характерлик деһқанчилиқ ишлиридин башқа, өй ремонт қилиш ишлириға қәдәр җисманий әмгәкләрни “пидаийлар” гурупписиға қилдурған. Бу пидаийлар гурупписи юртиға қайтқан алий мәктәп оқуғучилири вә төвәнгә чүшкән хизмәт гуруппа әзалиридин тәшкилләнгән.

Йәнә алақидар хадимларниң паш қилишичә, йиғивелиш лагерлири пәйда қилған яман ақивәтләрдин бири йезилардики қәрз копиратиплири илгирики йилларда тарқатқан қәрзләрни йиғивелишқа амалсиз қалған. Копиратиплар лагерда җан үзгәнләрниң қәрзини суғурта ширкәтлиригә төләткүзгән, әмма қалғанлириниң қәрзиниң өсүмини төвәнлитишкә мәҗбур болған.

Йезидики мәлум бир сақчи хадими, һөкүмәтниң аталмиш тәрбийәләштикиләрниң аилә-тавабиатлириға көңүл бөлүп, уларға берилгән қәрзниң өсүмини төвәнләткәнликини илгири сүрди.

Өткән йили зияритимизни қобул қилған бир аилә аяли, өзигә партийә вә һөкүмәтниң ярдәм қилип ун вә көмүр билән тәминләватқанлиқини вә деһқанчилиқ ишлириға қаришип бериватқанлиқини билдүргән иди, әмма бу аял тәвә кәнтниң сақчиси бу аялға ярдәм қиливатқан бу партийә вә һөкүмәтниң униң йолдиши, бәш оғли һәм бир күйоғлини лагерға әкәткәнликини вә мәзкур аилини пүтүнләй әмгәк күчидин айривәткәнликини паш қилған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.