Чәрчән наһийәлик партком “миллийлар билән хәнзулар тойлашқан аилиләрни мукапатлаш” тоғрилиқ һөҗҗәт чиқарған

Мухбиримиз қутлан
2014.08.28
Share on WhatsApp
Share on WhatsApp
milletler-ittipaqliqi-305 Сүрәттә хитай сақчилири үрүмчидики милләтләр иттипақлиқини күйләйдиған бир тәшвиқат вивискиси түвидин өтмәктә
Photo: RFA


“шинҗаң хәвәр тори” ниң 25 - авғусттики хәвиригә қариғанда, чәрчән наһийәлик партком “миллийлар билән хәнзулар тойлашқан аилиләрни мукапатлаш тәдбирлири” намлиқ һөҗҗәт чиқирип тарқатқан.

Һөҗҗәттә көрситилишичә, наһийә тәвәсидә уйғурларни асас қилған йәрлик милләтләр билән хәнзулар тойлашса сиясий, олтурақ өй вә пәрзәнтлириниң ишқа орунлишиши җәһәттә алаһидә тәминаттин бәһриман болидикән.

Һөҗҗәттә йәнә мунулар қәйт қилинған: “миллийлар билән хәнзулар той хети алған һаман уда 5 йилғичә йилиға 10 миң йвәндин мукапат пули алалайду. Улардин туғулған балилар йәслидин таки толуқ оттура мәктәпкичә һәқсиз оқуйду. Әгәрдә улар оттура техником мәктәплиригә емтиһан берип кирсә йилиға 3000 йвән, университет яки алий техником мәктәплиригә кирәлисә йилиға 5000 йвән мукапат елип оқуйду. Бу хилдики аилиләрниң давалиниш һәққини давалиниш суғуртиси көтүргәндин сирт, қалған қисминиң 90% ни хәлқ ишлири идариси атчот қилип бериду. Ундин башқа, икки милләттин тойлашқан аилидә әр - аялдин бириниң муқим хизмити болмиса, мәдәнийәт сәвийәсигә қарап дәрһал мувапиқ хизмәткә орунлаштурилиду.”

Мәзкур һөҗҗәттә тилға елинған бәлгилимиләрниң чәрчән наһийәсидә бу йил 21 - авғусттин башлап рәсмий иҗра қилинидиғанлиқи уқтурулған.

Биз бу һәқтә йәниму илгирилигән һалда учур елиш үчүн чәрчән наһийәлик милләтләр дин ишлири идарисигә телефон қилдуқ. Телефонимизни мәзкур идариниң бир хизмәтчи хадими алди.

У мәзкур һөҗҗәт һәққидә мунуларни билдүрди:

“шундақ, бу һөҗҗәт йеқинда чиқти һәмдә наһийә тәвәсидики һәрқайси идариләргә тарқитилди. Мениң буниңдин хәвирим бар. Башлиқларниң дейишичә, наһийәлик партком бу һөҗҗәтни чиқириштин бурун чәрчәндики 99 пирсәнт хәлқтин пикир елип, һәр милләт хәлқиниң райи бойичә бу һөҗҗәтни чиқарғанмиш…”

“бизниң бу идарә наһийәниң милләтләр вә дин ишлирини биваситә башқуридиған орун. Наһийәлик партком бу һөҗҗәтни чиқириштин бурун бизниң идариниң пикрини алдиму - йоқ, буни билмәймән. Бәлким бизниң идарә башлиқлири билән сөзләшкән болса керәк, лекин шәхсән мениң бу иштин хәвирим йоқ!”

“бу һөҗҗәт чиққандин кейин идаридә йиғин болди. Мәнму йиғинға қатнаштим. Мушу йиғинда аңлидимму яки башқа бир йиғинда аңлидимму һеч есимдә йоқ. Аңлишимчә, чәрчән наһийәсидин башқа аптоном районниң һәрқайси вилайәт, област вә наһийәлиридиму охшимиған милләтләр өз - ара тойлашса һөкүмәт мукапатлайдиған ичкий сиясәт бармиш…”

“мән минкавхән (хәнзучә оқуған уйғурмән). Мән техи йеқинда наһийәмизниң милләтләр, дин ишлири идарисигә хизмәткә чүштүм. Асаслиқ вәзипәм идариниң архип вә һөҗҗәтлирини рәтләш һәмдә аммивий лушйәнгә даир ишларни бир тәрәп қилиштур. Растни десәм, хәнзу тил йезиқиға пухта болсамму, лекин уйғурчини таза билмәймән. Шуңа идаридики чоң вә муһим ишлардин анчә хәвирим йоқ.”

“мән шәхсән өзүм баламниң хәнзулар билән той қилишини халимаймән. Чүнки биз ислам динидики милләт, әмма һөкүмәт орнида ишләватқан болғачқа бу ишларға һечнемә дейәлмәймиз. Бу һәқтә мениң сизгә дәйдиғанлирим шунчилик. Мән йеңила бу идаригә хизмәткә чүшкән аддәттики кадир. Бу ишниң тәпсилатини идарә башлиқимизға телефон қилип сорисиңиз болиду.”

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.