Cherchen nahiyelik partkom “Milliylar bilen xenzular toylashqan a'ililerni mukapatlash” toghriliq höjjet chiqarghan

Muxbirimiz qutlan
2014.08.28
Share on WhatsApp
Share on WhatsApp
milletler-ittipaqliqi-305 Sürette xitay saqchiliri ürümchidiki milletler ittipaqliqini küyleydighan bir teshwiqat wiwiskisi tüwidin ötmekte
Photo: RFA


“Shinjang xewer tori” ning 25 - awghusttiki xewirige qarighanda, cherchen nahiyelik partkom “Milliylar bilen xenzular toylashqan a'ililerni mukapatlash tedbirliri” namliq höjjet chiqirip tarqatqan.

Höjjette körsitilishiche, nahiye teweside Uyghurlarni asas qilghan yerlik milletler bilen xenzular toylashsa siyasiy, olturaq öy we perzentlirining ishqa orunlishishi jehette alahide teminattin behriman bolidiken.

Höjjette yene munular qeyt qilin'ghan: “Milliylar bilen xenzular toy xéti alghan haman uda 5 yilghiche yiligha 10 ming ywendin mukapat puli alalaydu. Ulardin tughulghan balilar yeslidin taki toluq ottura mektepkiche heqsiz oquydu. Egerde ular ottura téxnikom mekteplirige émtihan bérip kirse yiligha 3000 ywen, uniwérsitét yaki aliy téxnikom mekteplirige kirelise yiligha 5000 ywen mukapat élip oquydu. Bu xildiki a'ililerning dawalinish heqqini dawalinish sughurtisi kötürgendin sirt, qalghan qismining 90% ni xelq ishliri idarisi atchot qilip béridu. Undin bashqa, ikki millettin toylashqan a'ilide er - ayaldin birining muqim xizmiti bolmisa, medeniyet sewiyesige qarap derhal muwapiq xizmetke orunlashturilidu.”

Mezkur höjjette tilgha élin'ghan belgilimilerning cherchen nahiyeside bu yil 21 - awghusttin bashlap resmiy ijra qilinidighanliqi uqturulghan.

Biz bu heqte yenimu ilgiriligen halda uchur élish üchün cherchen nahiyelik milletler din ishliri idarisige téléfon qilduq. Téléfonimizni mezkur idarining bir xizmetchi xadimi aldi.

U mezkur höjjet heqqide munularni bildürdi:

“Shundaq, bu höjjet yéqinda chiqti hemde nahiye tewesidiki herqaysi idarilerge tarqitildi. Méning buningdin xewirim bar. Bashliqlarning déyishiche, nahiyelik partkom bu höjjetni chiqirishtin burun cherchendiki 99 pirsent xelqtin pikir élip, her millet xelqining rayi boyiche bu höjjetni chiqarghanmish…”

“Bizning bu idare nahiyening milletler we din ishlirini biwasite bashquridighan orun. Nahiyelik partkom bu höjjetni chiqirishtin burun bizning idarining pikrini aldimu - yoq, buni bilmeymen. Belkim bizning idare bashliqliri bilen sözleshken bolsa kérek, lékin shexsen méning bu ishtin xewirim yoq!”

“Bu höjjet chiqqandin kéyin idaride yighin boldi. Menmu yighin'gha qatnashtim. Mushu yighinda anglidimmu yaki bashqa bir yighinda anglidimmu héch ésimde yoq. Anglishimche, cherchen nahiyesidin bashqa aptonom rayonning herqaysi wilayet, oblast we nahiyeliridimu oxshimighan milletler öz - ara toylashsa hökümet mukapatlaydighan ichkiy siyaset barmish…”

“Men minkawxen (xenzuche oqughan Uyghurmen). Men téxi yéqinda nahiyemizning milletler, din ishliri idarisige xizmetke chüshtüm. Asasliq wezipem idarining arxip we höjjetlirini retlesh hemde ammiwiy lushyen'ge da'ir ishlarni bir terep qilishtur. Rastni désem, xenzu til yéziqigha puxta bolsammu, lékin Uyghurchini taza bilmeymen. Shunga idaridiki chong we muhim ishlardin anche xewirim yoq.”

“Men shexsen özüm balamning xenzular bilen toy qilishini xalimaymen. Chünki biz islam dinidiki millet, emma hökümet ornida ishlewatqan bolghachqa bu ishlargha héchnéme déyelmeymiz. Bu heqte méning sizge deydighanlirim shunchilik. Men yéngila bu idarige xizmetke chüshken addettiki kadir. Bu ishning tepsilatini idare bashliqimizgha téléfon qilip sorisingiz bolidu.”

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.