Zeytinburnu milliy medeniyet pa'aliyetliri bashlandi

Ixtiyariy muxbirimiz arslan
2016-10-06
Share
zeytinburnu-milliy-medeniyet-paaliyiti.jpg Zeytinburnu milliy medeniyet pa'aliyitide Uyghur polusi. 2016-Yili öktebir, istanbul.
RFA/Arslan

Istanbulning zeytinburnu nahiyilik hökümetning uyushturushi bilen yilda bir qétim ötküzülüp kéliwatqan milliy medeniyet künliri pa'aliyetliri, zeytinburnu sheher bashliqi murat aydinning échilish nutqi bilen bashlandi.

Bu pa'aliyet türkiye we ottura asiyadin zeytinburnugha kélip olturaqlashqan her qaysi milletlerning milliy medeniyetlirini tonushturush, öz-ara tonushush, ariliship munasiwet qurup ötüshi meqsitide uyushturulghan.

9 Kün dawam qilidighan bu pa'aliyet 10-ayning 1-küni bashlan'ghan bolup, her küni kech terepte, naxsha éytish, usul oynash, shé'ir oqush, nutuq sözlesh qatarliq pa'aliyetler bilen dawam qiliwatidu.

Bu pa'aliyette türkiye we türk dunyasi üchün pa'aliyet qilidighan zeytinburnudiki 24 ijtima'iy jem'iyet körgezme achqan bolup, körgezmide her qaysi milletler özlirining medeniyet, örp-adetliri, yémek-ichmek, kiyim-kéchek, chalghu eswablirini tonushturup kelmekte.

Bu pa'aliyetke Uyghur diyaridin kélip zeytinburnuda olturaqlashqan qazaqlar qatniship körgezme achti. Merkizi zeytinburnugha jaylashqan qazaq türkliri telim-terbiye we hemkarliq jem'iyiti, qazaq türkliri wexpi qatarliq jem'iyetler ayrim-ayrim körgezme échip qazaqlarning medeniyet, örp-adetlirini tonushturdi.

Pa'aliyette zeytinburnu sheher bashliqi murat aydin söz qilip, bu pa'aliyette 24 jem'iyetning 9 kün boyiche pa'aliyet körsitidighanliqini bildürdi.

Murat aydin mundaq dédi: “Bu pa'aliyetning tunji küni türk dunyasidin, sherqiy türkistandin, ata yurtimizdin nechche yillar ilgiri kélip zeytinburnuda olturaqlashqan qérindashlirimizning jem'iyetliri bu yerde pa'aliyet körsitidu. Men bu yerde 9 kün boyiche bizler bilen birlikte bolidighan zeytinburnu xelqige we 24 ammiwi teshkilatqa teshekkür éytimen.”

Zeytinburnu medeniyet künliri pa'aliyiti munasiwiti bilen bir qanche parche höjjetlik filim ishlen'gen bolup, buning bir bölümi mexsus Uyghurlarning tarixi, jughrapiyisi, medeniyet, örp-adetliri we hazirqi ehwalini teswirligen.
Bu höjjetlik filimda murat aydin bilen sherqiy türkistan ma'arip we hemkarliq jem'iyiti re'isi hidayetullah oghuzxanning Uyghurlar heqqidiki pikir-qarashlirighimu yer bérilgen.

Igilinishiche, bu pa'aliyetke Uyghurlargha wakaliten sherqiy türkistan ma'arip we hemkarliq jem'iyiti qatnishidighanliqini bildürüp, zeytinburnu sheherlik hökümet medeniyet pa'aliyet mudirigha iltimas sun'ghan bolsimu, bu yil kéchikip qalghanliqi sewebidin qatnishalmaydighanliqini bildürgen we kéler yili Uyghurlar üchün mexsus orun ajritidighanliqini ipadiligen.

Biz bu pa'aliyetler toghrisida pikir-qarashlirini élish üchün pa'aliyette körgezme achqan qazaq türkliri telim-terbiye we hemkarliq jem'iyitining pexri re'isi yaqupjan we re'isi serkan dénchtürk bilen söhbet élip barduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet