Җәнубий моңғулийә қурултийи тәйярлиқ комитети токйода хитай даирилирини әйиблиди

Ихтиярий мухбиримиз һаҗи қутлуқ
2016-11-09
Елхәт
Пикир
Share
Принт
Җәнубий моңғулийә қурултийи тәйярлиқ комитетиниң мәсуллири соз қилмақта. 2016-Йили 9-ноябир, токйо.
Җәнубий моңғулийә қурултийи тәйярлиқ комитетиниң мәсуллири соз қилмақта. 2016-Йили 9-ноябир, токйо.
RFA/Qutluq

10-Ноябирдин башлап токйода чақирилидиған җәнубий моңғулийә қурултийиниң тәйярлиқ комитети бүгүн токйодики мита меһман-сарийида йиғин чақирип, хитай һөкүмитиниң қурултай ечилиш алдида йиғинға қатнишидиған чәтәлләрдики бир қисим моңғул кишилик һоқуқ паалийәтчилири вә оқуғучиларниң ички моңғул аптоном районидики аилә тавабиатлириға түрлүк тәһдитләрни селиватқанлиқини әйиблиди.

Йиғин әтигән саәт 9:30 дин 11:30 йеримиғичә давам қилди. Йиғинға һәр саһә кишилиридин қатнашти.

Токйода чақирилған җәнубий моңғулийә қурултийи тәйярлиқ комитети мәсуллири йиғинда ечилиш алдида турған җәнубий моңғулийә тунҗи қурултийиға тосқунлуқ қилиш үчүн ички моңғул аптоном районидики қанун даирилириниң мәзкур қурултайға тәйярлиқ көрүватқан вә йиғинға қатнишидиған бир қисим моңғулларниң аилә тавабиатлириға түрлүк тәһдитләрни селиватқанлиқини билдүрүш билән биргә бейҗиң даирилирини бу хил васитиләрни қоллиниш арқилиқ қурултайниң ечилишини тосуп қалалмайдиғанлиқини әскәртти.

Тәйярлиқ комитети мәсуллириниң билдүрүшичә, ички моңғул аптоном районлуқ дөләт бихәтәрлик идарисиниң хадимлири бир айдин буян японийәдә қурултайниң ечилишиға тәйярлиқ көрүватқан моңғул паалийәтчилириниң аилисигә берип: «әгәр, пәрзәнтлириңларға нәсиһәт қилип қурултайниң ечилишини тосуп қалмисаңлар,силәрни қолға алимиз,һәммиңларни вәйран қилимиз»дәп тәһдит салған вә бәзи аилиләргә мәҗбури һалда пәрзәнтлиригә телефон урғузуш, елхәт йоллутуштәк васитиләрни қолланған икән.

Җәнубий моңғулийә қурултийи тәйярлиқ комитети мәсуллириниң илгири сүрүшичә,японийәдә нәшр қилинидиған хитай игидарчилиқидики «япон-хитай достлуқи»гезитидә җәнубий моңғулийә қурултийиниң ечилишиға қарши бәзи мақалиләр елан қилинған болуп, униңда: «моңғул мустәқилчилириниң токйода қурултай чақириши японийә билән хитайниң достлуқиға дәхли йәткүзиду. Америка башчилиқидики бир қисим дөләтләрниң иқтисадий ярдими билән шәрқий түркистан вә тибәт мустәқилчилири хәлқарада баш көтүргән иди. Әмдиликтә моңғул мустәқилчилири улардин илһам алди» дейилгән.

Тәйярлиқ комитети мәсуллириниң дейишичә, хитайниң токйодики әлчиханиси вә осакадики консулханиси японийәдә оқуватқан ички моңғулийәлик оқуғучиларға йиғин чақирип, уларға түрлүк идийиви хизмәтләрни ишләп, уларниң қурултайға қатнашмаслиқини вә ярдәмдә болмаслиқини билдүргән.

Йиғиндин кейин зияритимизни қобул қилған җәнубий моңғулийә қурултийи тәйярлиқ комитетиниң мәсуллиридин улхунуд дайчин бу һәқтә тохтилип: «хитай һөкүмити бәзи кишилик һоқуқ паалийәтчилириниң аилисигә охшимиған муамилиләрдә болған. Бир қисмиға юмшақ сөзләр билән уларға иқтисадий ярдәмдә болуш, аилә қийинчилиқини һәл қилип бериш арқилиқ уларни өз хизмитигә маслишип беришкә дәвәт қилған.Бир қисмиға болса қорал чиқирип тәһдит селип компартийигә қарши һәрқандақ адәмни чәтәлдә болсиму тутуп келәләйдиғанлиқини билдүрүш арқилиқ уларға қорқунч салған» деди.

Йиғинға иштирак қилған җәнубий моңғулийәлик оқуғучи арча өз аилисиниң ички моңғулийәдә хитай қанун даирилириниң тәһдитигә дуч кәлгәнликини билдүрүп:«аиләм сақчиларниң түрлүк бесимлириға дуч кәлгән болсиму, әмма мән йәнила өз хәлқимниң дәрдини дуняға аңлитиш үчүн токйодики бу кишилик һоқуқ паалийәтчлирини қоллаш вә улар билән һәмкарлишиш үчүн қәтий нийәткә келип, қурултайға қатнишишни лайиқ көрдүм. Мени һәрқандақ күч бу йолдин тосуп қалалмайду»деди.

Японийәниң осака шәһиридин йиғинға иштирак қилған җәнубий моңғулийәлик кишилик һоқуқ паалийәтчиси ургин бу һәқтә пикир баян қилип:«хитай компартийисиниң ата-анамға селиватқан зулумдин қорқсам, хәлқимниң һөрлүк йолидин ваз кәчсәм болиду.Хитай һөкүмити илгири дадамға өз хәлқиниң һәқ гепини қилмай,сүкүт ичидә яша дәп көп қетим дадамни тәқиб астиға алған иди.Мән әркин дунядики бир адәм шуңа өз хәлқим үчүн һәрқандақ бесимларға бәрдашлиқ беришкә тәйяр» деди.

Токйода чақирилған җәнубий моңғулийә қурултийи тәйярлиқ комитетиниң хитайни әйибләш йиғиниға германийә, голландийә вә моңғулийә қатарлиқ дөләтләрдә паалийәт елип бериватқан җәнубий моңғулийә кишилик һоқуқ тәшкилатлириниң вәкиллириму қатанашти.

Җәнубий моңғулийә қурултийи тәйярлиқ комитетидин игилишимизчә,10-ноябирдин башлап 12-ноябирғичә дуняниң һәр қайси җайлирида паалийәт елип бериватқан моңғул кишилик һоқуқ паалийәтчилири токйоға җәм болуп җәнубий моңғулийә қурултийи йиғинни чақиридикән.

Мәлум болушичә,2012-йили 5-айда 4-нөвәтлик дуня уйғур қурултийи токйода чақирилиштин илгириму хитай даирилири бир қисим уйғур кишилик һоқуқ паалийәтчилириниң вәтән ичидики аилисигә түрлүк бесим вә тәһдитләрни салғанлиқи инкас қилинған иди.

Юқириқи аваз улинишидин тәпсилатини аңлаң.

Пикирләр (0)
Share
Толуқ бәт