“5 миң кишилик намайиш тәшвиқат гурупписи” қурулди

Д у қ ниң тәшәббуси билән 26 – март күни “5000 кишилик намайиш тәшвиқат гурупписи” қурулуп хизмәтлирини башлиди.

26 – Март кәч саәт 8 билән д у қ рәиси долқун әйса йетәкчиликидә башланған бу йиғинға германийә, норвегийә, шветсийә, голландийә қатарлиқ әлләрдин иҗтимаий таратқуларда бәлгилик тәсири болған 7 нәпәр тәшвиқат маһирлири қатнашти. Йиғин 2 саәт давам қилди.

Нәқ мәйдандин игилигән учурларға асасланғанда, бу тәшвиқат гурупписиниң асаслиқ мәқсиди 4 – айниң 27 – күни белгийә пайтәхти бирюсселдики яврупа парламенти алдида өткүзүлидиған 5 миң кишилик намайишниң сәпәрвәрлик хизмәтлирини қанат яйдуруш шундақла хитайниң тәтүр тәшвиқатлириға зәрбә бериштин ибарәт болуп, д у қ бивастә орунлаштурған бу қетимқи намайишқа германийә, ән´гилийә, франсийә, норвегийә, голландийә, шветсийә, шветсарийә, финландийә, авистрийә, түркийә, японийә, австралийә, канада, америка қатарлиқ 10 дин артуқ дөләттин 5 миңдин артуқ киши қатнишидикән.

26 – Март қурулған “5000 кишилик намайиш тәшвиқат гурупписи” йиғиниға қатнашқан д у қ муавин рәиси пәрһат муһәммиди әпәнди бу һәқтә зияритимизни қобул қилғанда, бундақ бир гуруппини қурушниң зөрүрийити вә мәқсити һәққидә чүшәнчә берип өтти.

Пәрһат муһәммиди әпәндиниң изаһлишичә, 15 – март күни уйғур ханим – қизлириниң тәшкиллиши билән 14 дөләт, 18 шәһәрдә елип берилған “бир аваз, бир қәдәм” намайишидин кейин, хитай даирлири ғәрб әллиридә яшаватқан бир қисим уйғурларға телефон арқилиқ тәһдитләр селип, бирюсселда өткүзүлмәкчи болған 5 миң кишилик намайишқа тосалғу пәйда қилиш һәрикитини башлиған.

Д у қ ниң 5 миң кишилик намайиш чақириқи бундин 2 ай илгири башланған. Мәлум болушичә, муһаҗирәттики уйғур җамаитини бу қетимқи намайиш үчүн паал һәрикәтләндүрүш хизмитини ялғуз д у қ учур - тәшвиқат мәркизи асаслиқ вәзипә орнида зиммисигә елипла қалмай, йәнә ғәрб демократик әллиридики көплигән уйғур тәшкилатлири вә шәхсләрму өзликидин бәс – бәстә түрлүк усулларда тәшвиқат хизмәтлирини қанат яйдуруп, иҗтимаий алақә вастилирида паал сәпәрвәрлик қозғап, уйғур җамаитини д у қ ниң 5 миң кишилик намайиш тәшәббусиға йеқиндин аваз қошушқа риғбәтләндүрүп кәлгән. Бу саһәдә актип рол ойниған 7 нәпәр тәшвиқат маһири бу қетим “5000 кишилик намайиш тәшвиқат гурупписи” ға җәм болған.

Д у қ иҗраийә комитетиниң муавин рәиси, норвегийәдики уйғур зиялийси сәмәт абла әпәнди бу тоғрисида пикир баян қилғанда, д у қ орунлаштурған 5 миң кишилик намайишни қоллаш вә униңға иштирак қилишниң явропадики һәрбир уйғурниң вәзиписи икәнликини тәкитлиди. У сөзидә йәнә, 26 – март өткүзүлгән “5000 кишилик намайиш тәшвиқат гурупписи” йиғининиң әһмийәтлик болғанлиқини тилға алди.

“5000 кишилик намайиш тәшвиқат гурупписи” әзалири 26 – март ачқан йиғинида “қандақ қилғанда 27 – апрелдики намайишқа техиму көп уйғур җамаитиниң иштирак қилишини қолға кәлтүргили болиду? хитайниң муһаҗирәттики уйғурларни намайиштин совутуш үчүн тор сәһипилири вә иҗтимаий таратқуларда елип бериватқан сәпсәтилиригә қандақ қилғанда үнүмлүк зәрбә бәргили болиду? ” дегән асасий темида музакириләр елип барди һәмдә һәрбир әза өз имканлири даирисидә “facebook”, “skype ”, “whatsup ” қатарлиқ иҗтимаий таратқуларда түрлүк син филимлири, нәқ мәйдан зиярәтлири арқилиқ д у қ ниң 5 миң кишилик намайиш чақириқини қоллаш җәһәттә хизмәт тәхсиматлирини бәлгилиди.

Д у қ рәһбәрлириниң билдүришичә, д у қ тәшәббус қиливатқан 5 миң кишилик намайишниң мәқсити; хитай һөкүмитиниң нөвәттә уйғур диярида елип бериватқан “йепиқ тәрбийиләш мәркизи” намидики җаза лагеирлирини өз ичигә алған бастуруш сияситигә кәң көләмдә наразилиқ билдүрүш вә яврупа парламентини хитайға бесим ишлитишкә қисташтин ибарәт болуп, бу паалийәткә дуняниң һәр йәрлиридин кәлгән 5 миңдин артуқ уйғурниң қатнишидиғанлиқи мөлчәрләнмәктикән.

Буни бесиш арқилиқ, пикриңизни йезиң

• Принт
• Һәмбәһр
• Әвәтиш

Барлиқ пикир - баянларни көрүш.

• Бүгүнки аңлитиш
• Илгирики аңлитишлар