"5 Ming kishilik namayish teshwiqat guruppisi" quruldi

Ixtiyari muxbirimiz ekrem
2018-03-27
Élxet
Pikir
Share
Print
D u q bash katipi dolqun eysa ependi we qurultay programma yardemchisi lusiya xanim yawropa parlaménti kishilik hoquq komitétining mu'awin re'isi piréda ependining yardemchisi dalila xanim(otturida) bilen körüshti. 2017-Yili 7-féwral, bélgiye paytexti biryussél.
D u q bash katipi dolqun eysa ependi we qurultay programma yardemchisi lusiya xanim yawropa parlaménti kishilik hoquq komitétining mu'awin re'isi piréda ependining yardemchisi dalila xanim(otturida) bilen körüshti. 2017-Yili 7-féwral, bélgiye paytexti biryussél.
RFA/Ekrem

D u q ning teshebbusi bilen 26 – mart küni "5000 Kishilik namayish teshwiqat guruppisi" qurulup xizmetlirini bashlidi.

26 – Mart kech sa'et 8 bilen d u q re'isi dolqun eysa yétekchilikide bashlan'ghan bu yighin'gha gérmaniye, norwégiye, shwétsiye, gollandiye qatarliq ellerdin ijtima'iy taratqularda belgilik tesiri bolghan 7 neper teshwiqat mahirliri qatnashti. Yighin 2 sa'et dawam qildi.

Neq meydandin igiligen uchurlargha asaslan'ghanda, bu teshwiqat guruppisining asasliq meqsidi 4 – ayning 27 – küni bélgiye paytexti biryusséldiki yawrupa parlaménti aldida ötküzülidighan 5 ming kishilik namayishning seperwerlik xizmetlirini qanat yaydurush shundaqla xitayning tetür teshwiqatlirigha zerbe bérishtin ibaret bolup, d u q biwaste orunlashturghan bu qétimqi namayishqa gérmaniye, en´giliye, fransiye, norwégiye, gollandiye, shwétsiye, shwétsariye, finlandiye, awistriye, türkiye, yaponiye, awstraliye, kanada, amérika qatarliq 10 din artuq dölettin 5 mingdin artuq kishi qatnishidiken.

26 – Mart qurulghan "5000 Kishilik namayish teshwiqat guruppisi" yighinigha qatnashqan d u q mu'awin re'isi perhat muhemmidi ependi bu heqte ziyaritimizni qobul qilghanda, bundaq bir guruppini qurushning zörüriyiti we meqsiti heqqide chüshenche bérip ötti.

Perhat muhemmidi ependining izahlishiche, 15 – mart küni Uyghur xanim – qizlirining teshkillishi bilen 14 dölet, 18 sheherde élip bérilghan "Bir awaz, bir qedem" namayishidin kéyin, xitay da'irliri gherb elliride yashawatqan bir qisim Uyghurlargha téléfon arqiliq tehditler sélip, biryussélda ötküzülmekchi bolghan 5 ming kishilik namayishqa tosalghu peyda qilish herikitini bashlighan.

D u q ning 5 ming kishilik namayish chaqiriqi bundin 2 ay ilgiri bashlan'ghan. Melum bolushiche, muhajirettiki Uyghur jama'itini bu qétimqi namayish üchün pa'al heriketlendürüsh xizmitini yalghuz d u q uchur - teshwiqat merkizi asasliq wezipe ornida zimmisige élipla qalmay, yene gherb démokratik elliridiki köpligen Uyghur teshkilatliri we shexslermu özlikidin bes – beste türlük usullarda teshwiqat xizmetlirini qanat yaydurup, ijtima'iy alaqe wastilirida pa'al seperwerlik qozghap, Uyghur jama'itini d u q ning 5 ming kishilik namayish teshebbusigha yéqindin awaz qoshushqa righbetlendürüp kelgen. Bu sahede aktip rol oynighan 7 neper teshwiqat mahiri bu qétim "5000 Kishilik namayish teshwiqat guruppisi" gha jem bolghan.

D u q ijra'iye komitétining mu'awin re'isi, norwégiyediki Uyghur ziyaliysi semet abla ependi bu toghrisida pikir bayan qilghanda, d u q orunlashturghan 5 ming kishilik namayishni qollash we uninggha ishtirak qilishning yawropadiki herbir Uyghurning wezipisi ikenlikini tekitlidi. U sözide yene, 26 – mart ötküzülgen "5000 Kishilik namayish teshwiqat guruppisi" yighinining ehmiyetlik bolghanliqini tilgha aldi.

"5000 Kishilik namayish teshwiqat guruppisi" ezaliri 26 – mart achqan yighinida "Qandaq qilghanda 27 – apréldiki namayishqa téximu köp Uyghur jama'itining ishtirak qilishini qolgha keltürgili bolidu? xitayning muhajirettiki Uyghurlarni namayishtin sowutush üchün tor sehipiliri we ijtima'iy taratqularda élip bériwatqan sepsetilirige qandaq qilghanda ünümlük zerbe bergili bolidu? " dégen asasiy témida muzakiriler élip bardi hemde herbir eza öz imkanliri da'iriside "facebook", "skype ", "whatsup " qatarliq ijtima'iy taratqularda türlük sin filimliri, neq meydan ziyaretliri arqiliq d u q ning 5 ming kishilik namayish chaqiriqini qollash jehette xizmet texsimatlirini belgilidi.

D u q rehberlirining bildürishiche, d u q teshebbus qiliwatqan 5 ming kishilik namayishning meqsiti؛ xitay hökümitining nöwette Uyghur diyarida élip bériwatqan "Yépiq terbiyilesh merkizi" namidiki jaza lagé'irlirini öz ichige alghan basturush siyasitige keng kölemde naraziliq bildürüsh we yawrupa parlaméntini xitaygha bésim ishlitishke qistashtin ibaret bolup, bu pa'aliyetke dunyaning her yerliridin kelgen 5 mingdin artuq Uyghurning qatnishidighanliqi mölcherlenmektiken.

Toluq bet